М. К. Аммосов аатынан ХИФУ идэни талыыга тэрээһин ыытта

Сэргэлээх уоттара култуура киинигэр Максим Аммосов аатынан Хотугулуу-Илиҥҥи федеральнай университет орто үөрэх устудьуоннарыгар уонна бүтэрээччилэригэр анаан идэни талыыга туһуламмыт тэрээһини ыытта. Манна  үөрэх кыһатын бары институттара, салаалара  бэйэлэрин хайысхаларын,  үөрэтии ньымаларын, устудьуон олоҕун  туһунан сиһилии кэпсээтилэр,  идэ араастарын уонна уратыларын сырдаттылар. Бу тэрээһиҥҥэ үөрэх кыһатын 18 араас техническэй, гумантирнай хайысхалаах  салаалара кыттыыны ыллылар.

"Кэлбит устудьуоннар үрдүк үөрэххэ туттарсыы туһунан билсиһиэхтэрэ. Баҕарбыт үөрэхтэригэр сиһилии консультация ылыахтарын сөп. Уопсайынан, былырыыҥҥы сылтан профориентационнай үлэбит уларыйан эрэр. Өссө хас даҕаны тэрээһини айбыппыт. Холобура, “Стань студентом СВФУ на один день” диэн аахсыйа баар. Онно оскуола оҕолоро биир күн кэлэн, устудьуон курдук үөрэнэллэр", - диир М.К. Аммосов аатынан ХИФУ  киин тутар хамыыһыйатын сүрүн исписэлииһэ Пётр Кычкин.

Маны таһынан, университет киин тутар  хамыыһыйата оскуола оҕолоругар анаан сайаапка хомуйан профориентационнай эксурсиялары тэрийэр.  Инники идэлэрин өссө тала илик оҕолорго кэскиллээх үөрэх хайысхаларын билсии, университет корпустарын көрүү бэйэлэрин суолларын булалларыгар күүс-көмө буолуоҕа.  Ордук 9-11 кылаас оҕолоро маннык сырдатар тэрээһиннэргэ көхтөөхтүк кытталлар.