II Өрөспүүбүлүкэ түөлбэлэрин форума

Бу күннэргэ, Мэҥэ Хаҥалас Майа сэлиэнньэтигэр II Өрөспүүбүлүкэ түөлбэлэрин форума буолла. Манна барыта 14 улуустан 289 бэрэстэбиитэл кэлэн кыттыыны ылла. Күн устата барбыт киэҥ  далааһыннаах көрсүһүүгэ түөлбэ сайдыытын дьүүллэстилэр.

Майа сэлиэнньэтигэр ыытыллыбыт "Төрүт түөлбэм төлкөтө" диэн түөлбэлэргэ анаммыт  II Өрөспүүбүлүкэтээҕи форумҥа, 14 улуустан уопсайа 289  бэрэстэбиитэл кэлэн кыттыыны ылла.  Күн устата ыытыллыбыт тэрээһин  икки былаһаакканан барда. Ол курдук, бастакы былааһааккаҕа түөлбэ салайааччылара, активистар. Оттон иккис былаһааккаҕа улуус, нэһилиэк дьаһалталарын баһылыктара, исписэлиистэрэ кытыннылар. ТОС бэрэссэдээтэллэрэ бэйэлэрин түөлбэлэригэр ыытар үлэлэрин холобур быһыытынан билиһиннэрдилэр.

"Бу икки былаһааккаҕа олус үчүгэй кэпсэтиилэр ыытылыннылар. Ол курдук,  кэлбит форум кыттыылаахтара бэйэлэрин санааларын эттилэр, туруорустулар. Бастакы боппуруоһунан, түөлбэ сайдыытыгар аналлаах нормативно-правовой акт оҥоһуллуута буолла", - диир Саха сирин түөлбэлэрин холбоһугун бэрэссэдээтэлэ, Бэрдьигэстээх нэһилиэгин баһылыгын солбуйааччы Ксения Васильева.

Дмитрий Ходулов аатынан култуура киинин толору киһилээх саалатыгар,  түөлбэ таһымыгар  араас көдьүүстээх үлэни-хамнаһы иилээн нэһилиэнньэ олоҕун тупсара сылдьар  дьону чиэстээтилэр. Биир оннук киһинэн Сунтаар нэһилиэгин "Сомоҕо" түөлбэтин бэрэссэдээтэлэ  Константин Тотонов, кини түөлбэтин салайбыта 10 тахса сыл буолбут, Константин Тойбохоевич маны таһынан, өрөспүүбүлүкэ түөлбэлэрин холбоһугун эмблемэтин толкуйдаан,  ааспыт сылга оҥорон таһаарбыт.

"Биһиги Сунтаарбыт нэһилиэгэр түөрт түөлбэ буолан тэриллиннибит. Бу номнуо, уонтан тахса сыл буолла үлэлээбиппит.  Бары юридическэй сирэйдэрбит. Бырайыак оҥорон граннарга кыттыы буолар, ону таһынан нэһилиэкпит социальнай бырагыраамматыгар сөп түбэһиннэрэн үлэ-хамнас барар", - диэн Сунтаар нэһилиэгин "Сомоҕо" түөлбэтин бэрэссэдээтэлэ Константин Тотонов кэпсээтэ.

Горнай улууһуттан Бэрдьигэстээх, Одуну, Маҥаны, Кировскай, Атамай, Октябрьскай нэһилиэктэрин салайааччылара, ТОСтарын активистара, бэрэссэдээттэллэрэ Форумҥа сырыттылар. Холобур, Бэрдьигэстээх нэһилиэгин дьаһалтата ТОСтарга анаан бүддьүөттэн 1 мөл. 200 тыһ. солк үбү сыллата көрөр. Ону таһынан, кэлиҥҥи үс сыл түмүгүнэн,  нэһилиэк түөлбэлэрэ араас бырайыактарынан гран куонкурустарыгар кыттаннар,  4 мөл. солк. үбү киллэрэри ситиспиттэр.

Амма нэһилиэгэ  түөлбэнэн  үлэни ыытыыга, Өрөспүүбүлүкэҕэ  биир бастыҥнар кэккэлэригэр киирэр. Нэһилиэк иһигэр күн бүгүн, 13 түөлбэ баарыттан, 10 ТОС үчүгэй үлэлээхтэр. Аммалар  сылга 1 мөл. 900 кэриҥэ солк. үбү ТОСтарга көрөллөр.

Форум кыттыылаахтара аны биэс сылынан бэйэлэрин түөлбэлэрин хайдах быһыылаахтык көрөллөрүн, үлэлэрин былаанын кумааҕыга суруйан, анал хоппоҕо уктулар, бу хоппону аны биэс сылынан арыйан суруктары ааҕыахтара. Тэрээһин сүрүн чааһынан, түмүктүүр түһүмэҕинэн резолюция ылыныыта буолла.  Бу ылыныллыбыт резолюцияҕа олоҕуран, инники өттүгэр түөлбэлэр үлэлэрин суола-ииһэ ыйылынна, хайысхата бигэргэннэ. Бу курдук иккис төгүлүн ыытыллар түөлбэлэр киэҥ далааһыннаах сүбэ көрсүһүүлэрэ, быйылгы сылга үгүс дьону түмпүтэ, уопсастыба бэйэтэ олох сайдыытыгар  быһаччы кыттыһар буолбутун бэлиэтэ. Оттон эһиил тустаах форум Амма нэһилиэгэр ыытыллар буолла.