Тыа сиригэр култуура киинэ дьону түмэр, сомоҕолуур

Уус-Майа улууһун Эдьээн национальнай нэһилиэгэр "Геван" этнокультурнай киин аныгы  олоҕу кытары тэҥҥэ хардыылаан материальнай-техническай хааччылыытын саҥардар. Олохтоох нэһилиэнньэ олоҕун хаачыстыбатын тупсарар.

Кыра оҕолоох дьиэ кэргэҥҥэ саҥа сүүрээн киллэрии. Эдьээн национальнай нэһилиэгин "Геван" этнокультурнай киинигэр оҕолор оонньуур-көрүлүүр сирдэрэ арыллан, төрөппүтэргэ бэртээхэй бэлэх кэриэтэ буолла.  Аныгы олох ирдэбилигэр эппиэттиир: шариктардаах бассейн, ыттар, тардынар турниктар, онтон да атын оҕо доруобуйатыгар, эт-сиин өттүннэн эргиччи сайдалларыгар туһуламмыт оонньуур хоско, күннэтэ оҕо-аймах саҥата тохтообот.

"Бу этнокультурнай киин оҕо оонньуур хоһун оҥордо. Холобура, кэнсиэргэ кэлбит дьон сынньанарыгар үчүгэй. Кыра оҕолоох киһи сатаан көрө кэлбэт. Оҕоҕо хаайтаран олорор дьон, кэлэн оҕолорун хааллараллар. Манна көрөллөр-харайаллар. Олус үчүгэйдик толкуйдаабыттар дии саныыбыт. Кэнсиэргэ кыттааччылар репетиция кэмигэр оҕолорун кытта сылдьаллар", - диэн тус санаатын элбэх оҕолоох аҕа Вячеслав Атласов үллэһиннэ.

Бу хоһу арыйары "Геван" этнокультурнай киин дириэктэрэ Аайа Атласова толкуйдаан, анал бырагыраамма суруйан, куонкуруска кыттан, кыайыыны ситиһэн, оҕолорго да, төрөппүтэргэ да улахан үөрүү. 

"Эдэр саас диэн манна эдэр кыргыттар, ийэлэр үҥкүүгэ сылдьаллар, ыллыыллар. Оҕолоох репетицияҕа кэлэллэр. Ону оҕолору хайдах эмит аралдьытар сыалтан, оонньуур хоһу толкуйдаабытым. Оройуоннааҕы ахитектура уонна дизайн диэн күрэххэ кыттан бастакы миэстэни ылбытым. Оройуон 10 тыһыынча биэрбитэ уонна баһылыкпыт Анастасия Викторовна өйөөн, 70 тыһыынча биэрбитэ. Онон оҕо хоһун туппуппут", - диир "Геван" этнокультурнай киин дириэктэрэ Аайа Атласова.

Онон эдэр ийэлэр, кэрэ аҥардар төһө баҕар холкутук кэлэн, уус-уран, култуура эйгэтин абылаҥар ыллараллар. Холобура, манна иис, декоративно-прикладной бөлөх олохтоох нэһилиэнньэ далбардарын, кэрэ аҥардарын түмэр.

Бу курдук, бастатан туран нэһилиэнньэ олохтоохторугар улахан болҕомтону ууран "Геван" этнокультурнай киин улууска эрэ буолбакка, бутун Өрөспүүбүлүкэ үрдүнэн үтүө холобур эрэ буолар.