Саха сирин спортивнай медициинэ уонна реабилитация киинин үлэтэ

Киин оҕо доруобуйатын чөлүгэр түһэрэр салаалара материальнай-техническэй баазалара бөҕөргүүр уонна оҕону эмтиир көрүҥнэрэ хаҥыыр. Сыллата хас даҕаны тыһыынчанан оҕо доруобуйатын туругун көннөрөр. Эмтэниигэ ананыы уочарата аччыыр.

Оҕону оонньото кэриэтэ таарыччы эрчийэр аппарааттар Сахабыт сирин реабилитационнай кииннэригэр баар буоллулар. Саҥа аппараат оҕо координациятын, атаҕынан аппараакка сигнал биэрэн, сайыннарар. Манна сүһүөх, былчыҥ, ньиэрбэ ыарыылаах оҕолор дьарыктаналлар. Уопсайынан, ааспыт сыл бүтэһик ыйдарыгар Саха сиригэр кэлбит саҥа аппарааттар номнуо толору үлэлии тураллар.

Кэнники кэмҥэ Өрөспүүбүлүкэҕэ ньиэрбэ ыарыһах оҕо элбээбитэ бэлиэтэнэр. Урукку сылларга тарбахха баттанар эбит буоллахтарына, билигин хас иккис оҕо диагнозтаах диэн быраастар бэлиэтииллэр. Үгүс оҕо кыайан саҥарбат, үөрэх ылыммат буолбута, төрөппүт оҕотун кытта ыкса дьарыктаммата буолар диэн дириҥ уопуттаах логопед Виктория Иванова этэр:

"Гаджет көрүүтүн тохтотун. Кыаллар буоллаҕына, кыччатыаххытын да сөп. Уруһуйдаан, глинанан, пластилинынан, кинетическэй кумаҕынан оҕону кытта дьарыктанын. Ылаан, хоһоонно, остуоруйата ааҕыҥ. Остуоруйанан оҕоҕутун кытта дьиэҕэ кыра испиктээкил да оҥоруоххутун сөп".

Урукку сыллартан реабилитация үлэтэ лаппа тупсубутун 5 оҕолоох төрөппүт бэлиэтиир. Кини кыра оҕолорун доруобуйаларын чөлүгэр түһэрэ сылдьар.

"Коллектив биир хамаанда курдук үлэлиир эбит, оҕолору сиэтэ сылдьан. Тупса уларыйбыттара көстөр. Биир нэдиэлэ иһигэр үчүгэй көрдөрүү баар оҕолорбор", - диир төрөппүт Анастасия Бурнашёва.

Билигин 2№ о5о доруобуйатын чөлүгэр түһэрэр салааҕа рефлексотерапия,  спа капсула, галотерапия уо.д.а  эмтиир көрүҥ саҥа ньымата баар буолла. Сайдыы тохтообот. Бу сылга эмиэ саҥа аппарааттар, тэриллэр кэлэллэрэ былааннанар. Маны таһынан, өрөмүөн үлэтэ эмиэ ыытыллыахтаах.

“Иккис, үһүс этээскэ кабинеттага, коридордарга өрөмөүн оҥоруохтаахпыт уонна улахан баҕа санаабыт диэн хапытаалынай өрөмүөн. Былырыын сыл бүтүүтэ этэҥҥэ бэрэбиэркэ ааспыппыт. Ол гынан баран, балыаһабытыгар хааччахтаах оҕолор сылдьаллар. Ол иһин лифт оҥотторуохпутун баҕарабыт. Пандустар баар буолуохтаахтар. Олоххо киллэрэргэ бигэ эрэллээхпит”, - диэн  СӨ спортивнай медициинэ уонна реабилитация киинин 2№ о5о доруобуйатын чөлүгэр түһэрэр салаатын сэбиэдиссэйин эбээһинэһин толорооччу Евдокия Васильева этэр.

Онтон биир халыыбынан үлэлиир, ол эрэн сытыаран эрэ оҕолору эмтиир аналлаах салаа саҥа дьиэҕэ саҥалыы тыыннанан үлэлиир. Уопсайынан, урукку өттүгэр төрөппүт оҕотун рефлексотерапия, мануальнай терапия, остеопатия өҥөтүн үксүн харчыга оҥорторор, оҕотун туһугар элбэх харчыны төлүүр эбит буоллаҕына, билигин маны барытын босхо барар кыахтанна. 

Сытан эрэ эмтэнэр оҕолорго манна эмиэ туспа сыһыан, туспа усулуобуйа олохтонон турар. Кыайан турбат, хаампат оҕолор эттэрин-хааннарын оргууй эрчийэргэ анаан-минээн дьарыктыыр тэриллэр бааллар.  

Саха сириттэн атын сиргэ талаһан, оҕолорун киин сайдыылаах куораттарга илдьэн эмтэтии билигин төрөппүттэргэ көдьүүһэ сүттэ диир омун буолбатах. Бэйэбит Өрөспүүбүлүкэбитигэр бары усулуобуйа баар буолла.