Быйыл Өрөспүүбүлүкэ үрдүнэн 260 км тахса суолу өрөмүөннүөхтэрэ

Барыта 8 млрд. тахса үп көрүллүөҕэ, онтон 4 аҥаар млрд. тахсата федеральнай харчы. 2019 сылтан Саха сиригэр "Куттала суох хаачыстыбалаах массыына суоллара" национальнай бырайыак үлэлиир. Ол чэрчитинэн кэккэ улууска уонна киин куоракка суоллар саҥардыллыахтара.

Намныыр суол өрөмүөнэ салҕанар. Ааспыт сылга Үс Хатыҥ эргин 7 килэмиэтирдээх суол оҥоһуллан, болдьох иннинэ туттарыллан үлэҕэ киирбитэ. Быйыл Марха бөһүөлэгэр киирэр суолтан тахсыыга диэри, уопсайа 3 аҥар килэмиэтир усталаах суол өрөмүөннэнэр. Манна ааспыт күһүҥҥүттэн бэлэмнэнии үлэлэрэ ыытыллыбыттара. Билигин суолга улахан хаһыы үлэлэрэ бара тураллар. Салгыы сири таҥастаан буор кутан баран, бырайыак быһыытынан 3 турбаны ууруохтара.

"Билигин биһиги турба туруора сылдьабыт. Биири бүтэрбиппит. Уопсайа 3 турба баар, онтон иккитин саҕалаатылар. Бэдэрээччиппит суолга үлэлиир, 35 анал техникалаах. Манна эбии 25 суол үлэһитэ үлэлии-хамныы сылдьар", - диэн "Дороги Саха" тэрилтэ инженерэ Владислав Аргунов иһитиннэрдэ.

Манна оҥоһуллар суол кэҥээн улаатан, эмиэ 4 балаһалаах буолуоҕа. Ортотунан балаһалары араар ограждениелаах, суол икки өттүттэн туһаанаах сырдатыылаах буолуоҕа, онон уот баҕаналарын туруоруохтара. Сатыы сылдьааччыларга эмиэ усулуобуйа оҥоһуллуоҕа, ол курдук тротуардар, светофордар, автобус тохтобуллара киириэхтэрэ. Өрөмүөн кэмигэр суолу бүтүүннүү саппаттар. Улахан мэһэй үөскээбэтин туһуттан  бу кэрчиккэ уонна Можайского уулуссаҕа өрөмүөн барарыгар кыйа ааһар быстах хайысхалары бэлэмнээбиттэр.

"Турбаларбытын тумнар суолунан оҥотторо сылдьабыт. Онтон киэҥ буор суолунан туруоҕа. Эбийиэк уратыта диэн, манна уоту биэрии, газ ситимэ наһаа элбэх. Онон үлэ элбэх буолара буолуо. Былаан быһыытынан, быйыл сүрүн бэлэмниир үлэлэрбитин бүтэриэхтээхпит", - диир “Дороги Саха" тэрилтэ инженерэ Гаврил Рожин.

Саха сиригэр 2019 сылтан "Куттала суох хаачыстыбалаах массыына суоллара" национальнай бырайыак салгыы түһүмэҕэ олоххо киирэр. Ол чэрчитинэн, региональнай Нам, Умнас, Амма, Харбалаах, Бүлүү, Тиксии суоллара уонна киин куорат уулуссалара чөлүгэр түһэриллэн саҥардыллыахтара. Ону тэҥэ, өрүстэр, үрэхтэр  нөҥүө хас даҕаны муоста тутуллан киириэхтээх.

Былаан быһыытынан, Нам суолун салгыы кэлэр сылларга Үс Хатыҥтан Сыырдаахха диэри учаастагын өрөмүөннүөхтэрэ. Ону тэҥэ Кангаласс бөһүөлэгэр киирии суолун эмиэ оҥорор сорук турар. Бу курдук 2030 сылга диэри өрөспүүбүлүкэ суолларын сыллата төһө кыалларынан саҥардан иһиэхтэрэ.