"Саха сирин көдьүүстээх оскуолата" форум 500 киһини түмтэ

Учуутал уонна уһуйааччы сылын чэрчитинэн, Дьокуускайга "Саха сирин көдьүүстээх оскуолата" диэн үөрэх тэрилтэлэрин салайааччыларыгар анаммыт форум буолла. Тэрээһиҥҥэ Өрөспүүбүлүкэ улуустарыттан оскуола, оҕо кииннэрин дириэктэрдэрэ, солбуйааччылара, уопсайа 500 киһи кытынна. Сүрүн болҕомтону, үөрэх тэрилтэтин көдьүүстээхтик салайыы, үөрэх хаачыстыбатын үрдэтии боппуруостара ыллылар. Маны тэҥэ, Форумҥа "Сыл дириэктэрэ" бүтүн россиятааҕы күрэх Саха сиринээҕи түһүмэҕин ыыттылар.

Сыл бастын дириэктэрэ Өрөспүүбүлүкэтээҕи күрэх быйыл 3 төгүлүн ыытыллар. Күрэхтэһии үөрэҕирии үлэһиттэрин идэлэрин таһымын үрдэтэр институтун көҕүлээһининэн тэриллэр. Куонкуруска араас улуустартан барыта 21 оскуола, гимназия, салайааччылара кэлэн кытыннылар. Икки күн устата күрэхтэһээччилэр үлэлэринэн араас тургутууну аастылар. Бэйэни, оскуолаларын билиһиннэрии, бырайыактары көмүскээһин, пресс-конференция, маастар-кылаастар. 

"Бу куонкурска кыттан, биһиги уопуппут улаатар. Бэйэбитигэр даҕаны сыана биэрэбит. Эффективнай салайаачы диэн термин баар, ол эбэтэр барытын билэ-көрө сылдьыахтаах, дьонун кытта тэҥҥэ үлэлэһиэхтээх. Инники үлэлиир былаанын хонтуруолга тутуохтаах", - диир Горнай улууһун В.В.Филиппов аатынан гимназиятын дириэктэрэ  Владимир Ноговицын.

Оскуола дириэктэрэ диэн үөрэх тэрилтэтин сирэйэ. Кини хайдах салайара, дьону, үлэһиттэри түмэрэ, оскуола олоҕор, үөрэнии тутулугар быһаччы дьайар. Аныгы балысханнык сайдар үйэҕэ, салайааччы уларыйыылары кытта тэҥҥэ хардыылаан, саҥаны киллэрэн иһэрэ ирдэнэр. Быйылгы күрэх ыҥырыылаах ыалдьытынан Москваттан ааспыт сыллааҕы бүтүн россиятааҕы дириэктэрдэр күрэҕин кыайыылааҕа Павел Терехов буолла. Кини Покровскай кыбаартал диэн оскуоланы салайаар, Дьокуускайга бэйэтин хамаандатын илдьэ кэлбит.

"Биһиги бу дириэктэрдэрбит бэйэлэрин уопуттарын, үлэлэрин мэтиэдикэтин, ньымаларын көрдөрөллөрүгэр, кини сүрдээх элбэх маастар кылаас биэрдэ. Уонна кини сүбэҕэ киирэн дьүүллэспитэ, биллэн туран куонкурспут таһымын быдан үрдэттэ", - диэн СӨ үөрэҕирии үлэһиттэрин идэлэрин таһымын үрдэтэр институт дириэктэрин бастакы солбуйааччы Галина Алексеева иһитиннэрэр.

Күрэхтэһии таһыма сыллата үрдээн иһэр. Ааспыт сыларга кыттааччы ахсаана аҕыйах эбит буоллаҕына, быйыл 21 салайааччы бэйэтин тургута кэллэ. Мичил Лонгинов ааспыт сыллааҕы Өрөспүүбүлүкэтээҕи күрэх кыайыылааҕа, быйыл эксперт быһыытынан кыттар.

"Өрөспүүбүлүкэ үрдүнэн, дириэктэрдэр бэйэ бэйэбитин кытта алтыһыыбыт аҕыйах буолуо дии саныыбын. Форумҥа туруоруллар боппуруостары бары бииргэ мустан, көрсөн сүбэлэһэрбит, уопуппутун атыстаһарбыт улахан суолталаах. Икки күн буолбут форумҥа, мин тус бэйэм эмиэ, элбэх саҥаны биллим, оскуолабыт иһигэр баар кыһалҕалары быһаарарга чопчу суоллары көрдүбүт. Уонна соруктары туруоруннубут диэххэ наада", - диэн Өктөмнөөҕү научнай-үөрэтэр киин дириэктэрэ Мичил Лонгинов үллэһиннэ.

Түмүккэ, хас даҕаны түһүмэҕи ситиһиилээхтик ааспыттартан 5 финалист талыллан, салгыы кыайыылааҕы таллылар. Хамыыһыйа, экспердэр быһаарыыларынан, саамай үрдүк көрдөрүүлэри ситиспит Мэҥэ Хаҥалас улууһун Аллараа Бэстээх бөһүөлэгин 2 нүөмэрдээх оскуолатын салйааччы Ольга Колмакова "Сыл дириэктэрэ" диэн үрдүкү ааты сүктэ.  

Кыайыылаах салгыы бүтүн дойдутааҕы куонкуруска Саха сирин чиэһин көмүскүү барыаҕа.