Доруобуйа туһугар киэҥ эйгэни түмүү

Хотугулуу илиҥҥи федеральнай университет үлэһиттэригэр, преподавателлэригэр уонна устудьуоннарыгар анаан "Будь здоров!" диэн норуоттар икки ардыларынааҕы аһымал аахсыйа буолла. Тэрээһин кыттааччылара күн устата араас быраастары кэрийэн, доруобуйаларын туругун босхо көрдөрдүлэр. Оттон аахсыйа  сүрүн сыала-соруга, доруобуйаларыгар хааччахтаах дьону өйөөһүн буолла. Маныаха аһымал аахсыйа 3 хайысханан ыытылынна. Көрбөт, истибэт уонна сүһүөхтэригэр хааччахтаах дьон уопсастыбаҕа сылдьыылара хайдах кыһалҕалааҕын кэлбит дьон эттэринэн- хааннарынан биллилилэр.  

“Волонтердар, устудьуоннар, преподователлэр үс хайысханан кытталлар. Холобур, харахтарын баайаллар, кулгаахтарын бүөлүүллэр, бу хараҕа суох,  истибэт киһи хайдах бу олоххо олорор эбитий диэн. Коляскаҕа олороллор, айаннаан көрөллөр. Биһиги куораппыт сылдьарга төһө тоҕоостооҕун, бэйэлэрин эттэринэн-хааннарынан билэннэр, санааларын кэпсиэхтээхтэр”, - диир ХИФУ инклюзивнай киинин дириэктэрэ  Пантелеймон Егоров.

Анал аахсыйаҕа университет иһинэн үлэлиир оскуола  оҕолорун эмиэ хаптылар. Кинилэргэ идэлээх дьон медициинэ эйгэтин сэгэтэн кэпсээтилэр.  Доруобуйаларыгар хааччахтаах дьон олоҕуҥ кытары тэҥҥэ хаамсан,  уопсастыбаҕа холкутук сылдьар усулуобуйаларын тэрийии барыбыт болҕомтобутугар туруохтаах. Ыччат кыттыһарын биллэрэн,  "Ыччат доруобай олох туһугар" диэн флешмобу тэрийдэ. Оттон тэрийээччилэр маннык аахсыйа үгэс быһыытынан ыытылларыгар эрэллээхтэрин биллэрдилэр.