Саха сиригэр 10 тыһыынча оҕо маҥнайгы кылааска киирээри суруттарара күүтүллэр

Муус устар 1 күнүттэн өрөспүүбүлүкэ үрдүнэн бастакы кылааска киирии сайабылыанньатын ылыы саҕаламмыта. Быйыл төрөппүттэргэ сайаапканы эрдэттэн суруйан бэлэмнииргэ кыах бэриллибитэ. Электроннай сайабылыанньа Госуслуги портал нөҥүө толоруллан бастакы түһүмэҕэ бэс ыйын 30 күнүгэр диэри хомуллуоҕа. Салгыы от ыйын 6 күнүттэн иккис түһүмэх ыытыллыаҕа.

Эһиилги үөрэх дьылыгар оскуолаҕа киириэхтээх оҕолор аан бастаан кылааска үктэнэллэригэр, саха үгэһинэн алгыһынан арыалланан, чуораанчыгы тыаһатан киирэллэр.  Бу кырачааннар быйыл уһуйааннарын бүтэрэн,  аны эһиилги үөрэх дьылыттан билиини сомсорго бэлэмнэнэллэр. Айыы кыһата оскуолаҕа кэлэн билии киэҥ аартыгар үктэниэхтээх сирдэрин билсэ, көрө сылдьаллар. Дьокуускай куорат 24 №-дээх "Сардаана" уһуйаанын сахалыы иитиллэр бөлөҕө Айыы кыһатыгар ыалдьыттыыр. Манна кинилэр үөрэниэхтээх кылаастарын, учууталларын кытары билсэллэр.

Марианна Иванова, Дьокуускай куорат 24№ - дээх "Сардаана" уһуйаан сэбиэдиссэйэ: “Саас аайы биһиги иитиллээччилэрбитигэр оскуоланы кытары билсиһиннэрии тэрээһин оҥоробут. Манна оҕолор үөрэх тэрилтэтин кэрийэн көрөллөр, оскуолаөҕа үөрэнии диэн хайдах эитий диэн билсэллэр. Хас биирдии оҕо оскуолаҕа бэлэм киириэхтээх. Онуоха бу курдук тэрээһиннэр көмө буолаллар”.

Уһуйааны бүтэриэхтээх оҕолор  оскуолаларга кэлэн ыалдьыттыыллара үгэскэ кубулуйбута ыраатта. Быйыл бастакы кылааска суруттарыы муус устар 1 күнүттэн саҕаланар. Ол эрэн быйыл төрөппүттэргэ табыгастаах буоллун диэн кулун тутар 20 чыыһылатыттан Госуслуги порталга сайабылыанньаны эрдэттэн толорон бэлэмнииргэ кыах бэриллибитэ.

Александра Дмитриева, "Айыы кыһата" оскуола дириэктэрин үөрэх чааһыгар солбуйааччы: “Бастакы түһүмэххэ бу аадырыска сыһыарыллыбыт оҕолору ылабыт. Балар истэригэр ис дьыала уорганнарыгар үлэлиир эбэтэр байыаннай сулууспалаах дьон оҕолоро быһа киирэллэр. Оҕо бииргэ төрөөбүтэ үөрэнэр буоллаҕына киирэр кыаҕа эмиэ улаатар”.

Бүтүн өрөспүүбүлүкэ үрдүнэн эһиилги үөрэх дьылыгар уопсайа 863 кылаас арыллыаҕа. онно 17000 оҕону ыларга бэлэмнэр. Бу туһунан үөрэх министиэристибэтэ иһитиннэрэр.  6-7-тигэр диэри саастаах оҕо ахсаана 14 тыһыынча. Оттон быйыл бастакы кылааска 10 тыһыынча оҕо оскуолаҕа киирэр былааннаах. Онтон киин куорат оскуолаларыгар быйыл 6 тыһыынча кэриҥэ оҕону ыларга бэлэмнэр.

Анна Родионова, Дьокуускай куорат үөрэх салалтатын уопсай үөрэхтээһин салаатын сүрүн исписэлииһэ: “Быйыл сүрүн уларыйыыбыт диэн сабайылыанньа барыта Госуслуги портал нөҥүө ылыллаата. Маны таһынан сайаапканы эрдэ суруйан бэлэмниир кыах баар буолбута. Иккис түһүмэх от ыйын 6 күнүттэн саҕаланыаҕа. Манна сыһыарыллыбыт аадырыстарынан буолбакка, хаалбыт миэстэлэргэ бары оҕолору ылыахпыт. Быйыл киин куоракка 6 тыһ. оҕо оскуолаҕа киирэрэ сабаҕаланар”.

Оскуолаларга миэстэ тиийбэт түгэнигэр эбии кылаастары арыйыахтарын сөп. Киин куоракка биир кылааска 30-40 оҕо үөрэнэрэ сабаҕаланар.