Саха сирэ "Безопасная Арктика" диэн бөдөҥ үөрэтиигэ кииристэ

Дойду ыксаллах быһыыга-майгыга министиэристибэтэ "Безопасная Арктика" диэн биэдэмстибэлэр икки ардыларынааҕы бөдөҥ үөрэтиини 2-с төгүлүн тэрийдэ. Тустаах үөрэтиигэ Россия 9 субъега кытынна, олор истэригэр Саха сирэ эмиэ киирдэ. Дьокуускайга уонна Дьааҥы улууһугар үөрэтии чэрчитинэн араас тэрээһиннэр ыытыллыннылар.

"Россия - мин историям" музейга Арктика олоҕор-дьаһаҕар анаммыт төгүрүк остуолга ыксаллаах быһыы-майгы министиэристибэтин салататын, былаас уорганнарын, судаарыстыба тэрилтэлэрин бэрэстэбиитэллэрэ, учуонайдар уонна үрдүк үөрэх кыһаларын устудьуоннара кытыннылар. Манна ирбэт тоҥу кэтээн көрүү, ойуур уонна техногеннай баһаардары сэрэтии, транспорт кыһалҕатын, цифровой технологиялары олоххо киллэрии, итиэннэ экологическай уонна энергетическай куттал суох буолуу боппуростарын дьүүллэстилэр.

"Арктическэй улуустарбытыгар хайдах климат уларыйарын, бу климат хайдах ыксаллаах быһыы-майгы түгэнигэр дьайарын ырытан көрүөхпүт. Салҕыы ханнык ньымаларынан, миэрэлэринэн, хайдах быһыы-майгы көрдөрөрүнэн биһиги бу наукабыт чинчийиитин, айылҕабыт уларыйыытыгар хайдах туһаныахха сөбүн көрүөхпүт", - диэн РФ ЫБММ СӨ салалтатын начальнигын гражданскай оборонаҕа уонна нэһилиэнньэ көмүскэлигэр солбуйааччы Александр Никифоров иһитиннэрдэ.  

Россия ыксаллах быһыыга-майгыга министиэристибэтэ "Безопасная Арктика" диэн бөдөҥ биэдэмстибэлэр икки ардыларынааҕы үөрэтиини 2-с төгүлүн тэрийдэ. Тустаах үөрэтиигэ Россия 9 субъега кытынна, олор истэригэр Саха сирэ эмиэ киирдэ. Дьокуускайга уонна Дьааҥы улууһугар үөрэтии чэрчитинэн араас тэрээһиннэр ыытыллыннылар. Маны тэҥэ, үөрэтии бир сүрүн хайысхатынан тустаах анал техникэ, техническэй тэрил, оборудование, экипировка быыстапката буолла. Дьокуускайга бу хайысхаҕа ылсан дьарыктанар тэрилтэлэр бэйэлэрин бородууксуйаларын көрдөрүүгэ таһаардылар.

"Биһиги үксүн палааткаларынан, ураһаларынан, ититиллибиттэри, сайыҥҥылары барытын оҥоробут. Ыһыахха, табаһыттарга аналлаах. Итиэннэ сылаас таҥаһы, барыта инновационнай технологиянан. Таҥастарбыт барыта тымныы полюһугар Өймөкөөҥҥө холоон көрүүнү ааһаллар. Ол иһин хаачыстыбата үчүгэй. Дьокуускай куоракка сыахтаахпыт, барыта илиинэн тигиллэр", - диир чааһынай хампаанньа менеджера Александр Авелов.

Музей территориятыгар ыксаллаах быһыы-майгы министиэристибэтин суһал сулууспаларын, быыһыыр тэрилтэлэрин техникэлэрин саҥа көрүҥнэрэ эмиэ быыстапкаҕа турдулар. Бу анал, улахан кыамталаах техникэ: баһаарынай массыыналар, вездеходтар, квадроцикллар сорох чаастара тустаах экспедицияҕа сылдьан тургуутуну ааспыттара. Онон саҥа техникэ аны күһүн, Саха сиригэр баһаарынайдарга уонна быыһааччыларга кэлэрэ күүтүллэр.

"Биһиэхэ быыстапкаҕа ордук аныгылыы арктическай климакка сыһыаннаах баһаарнай оборуудабанньаларын уонна атын тэрилтэлэр оҥоһуктарын аҕалбыттара", - диэн РФ ЫБММ СӨ салалтатын баһаары туоратыыга уонна аварийнай үлэлэргэ салалтатын начальнигын солбуйааччы Александр Фёдоров кэпсээтэ.

Үөрэтии чэрчитинэн мунньахтары, көрсүһүүлэри, быыстапкалары тэҥэ, практическай тэрээһиннэр эмиэ буоллулар. Ол курдук Дьааҥы улууһун Баатаҕай бөһүөлэгэр нефтебазаҕа быһылаан тахсар түгэнигэр, содулу туоратыыга саҥа ньымалары, техникэлэри туттан тургуттулар.