Хас да сыллаах сыралаах үлэ түмүгэ

37

Дойду президенэ Россия үтүөлээх бырааһа ааты Саха сирин бырааһыгар Анатолий Комиссаровка биэрдэ. Анатолий Николаевич Комиссаров 30 сыл медицинэ эйгэтигэр үлэлиир. Бу сыллар тухары элбэх киһини эмтээн, маны тэҥэ эдэр быраастары үөрэтэн таһаарда.

Дьону атаҕар туруорар үрүҥ халааттаах аанньал. Анатолий Николаевич сарсыардаттан палаталары кэрийэн эпирээссийэни ааспыт ыарыһахтарын туругун көрөр. Манна даҕатан эттэххэ, кини күҥҥэ 6 эпирээссийэни оҥорор. Бу уустук, дьон олоҕун быыһыыр идэтэ оҕо сааһын кытта быһа ситимнээх. Ол курдук, Анатолий Комиссаров оҕо сылдьан атаҕын тоһутан баран хирург буоларга санаммыт.

“Нууччалыы эттэххэ, профориентация бардаҕым дии, оҕо сылдьаммын. Ол бырааһым билиҥҥэ диэри харахпар көстөр. Кыра уҥуохтаах, маҥан халааттаах , бэргэһэлээх, бигэ-таҕа көрүҥнээх. Ол иһин оччолорго мин кини курдук буолуохпун баҕарбытым буолуо. Онтон ыла наар быраас буолбут киһи диэн санаалааҕым. Оннооҕор, ; кылааска үөрэнэ сылдьан, библиотекартан бараммын “Внутренние болезни” диэн кинигэни ааҕар этим”, - диэн Өрөспүүбүлүкэтээҕи 2-с нүөмэрдээх балыыһа травматология-ортопедия салаатын сэбиэдиссэйэ, Россия үтүөлээх бырааһа Анатолий Комиссаров кэпсээтэ.

Күн бүгүн, Анатолий Комиссаров суһал медициинэ киинин травматология-ортопедия салаатын салайар. Номнуо 30 тахса сыл медицинэ эйгэтигэр бэриниилээхтик үлэлиир. Бу сыллар тухары тыһыынчаттан тахса киһини атаҕар туруорда. Араас таһымнаах уустук эпирээссийэлэри оҥордо. Бииргэ үлэлиир дьоно кинини баай уопуттаах, үлэтигэр бэриниилээх, киһи быһыытынан көнө майгылаах диэн бэлиэтииллэр. Онон Россия үтүөлээх быраас аатын ылыан ылла.

Анатолий Николаевич быраас үлэтин таһынан өссө научнай үлэнэн дьарыктанар. Кини номнуо 60 тахса үлэлээх, 3 патен ааптара. Итиэннэ билигин докторскай диссертациятын көмүскүү сылдьар. Маны тэҥэ, Анатолий Николаевич уһуйааччы быһыытынан эмиэ биллэр. Сыллата бэйэ таһымын эрэ буолбакка, эдэр быраастар таһымнарын эмиэ үрдэтэр.

“Анатолий Николаевичтыын мин өссө устудьуон сылдьан билсибитим. Бастаан бэйэбит циклбытыгар үөрэнэ кэлэн баран, травмотологияны тута сөбүлээбитим. Ол кэнниттэн, 2001 сыллаахха ординатураҕа киирбитим. Онтон ыла кини көрүүтүгэр-истиитигэр сылдьыбытым. Анатолий Николаевич миигин үөрэтэр, үлэлэтэр, иитэр-такайар киһи буолар. Икки сыл ординатуралаан баран, бу кинини кытта үлэлии-хамсыы олоробут”, - диир Өрөспүүбүлүкэтээҕи 2-с нүөмэрдээх балыыһа травматология киинин сэбиэдиссэйэ, СӨ доруобуйа харыстабылын министиэристибэтин кылаабынай травматолог бырааһа Анатолий Горохов.

Анатолий Комиссаров үөрэппит-такайбыт оҕолоро билигин бэйэлэрэ үрдүк квалификациялаах быраастар. Биллэн турар, кинилэр травмотология салаатын талалларыгар Анатолий Николаевич өҥөтө улахан. Оттон биһиги геройбут хирург, инникитин да былаана киэҥ. Бу үрдүк ааты ылбытынан тохтуур санаата биллэн турар суох. Өссө да травмотология-ортопедия салаата сайдарыгар бары күүһүн-уоҕун ууран турар үлэлиир сыаллаах.