Дьокуускайга биллэр нуучча худуоһунньуга Иван Шишкин быыстапката турда

30

Саха Өрөспүүбүлүкэтин национальнай художественнэй түмэлигэр биллэр нуучча худуоһунньуга Иван Иванович Шишкин 80 тахса үлэтэ Татарстан Өрөспүүбүлүкэттэн кэллэ. Иван Шишкин быыстапката балаҕан ыйыгар диэри туруоҕа.

Иван Шишкин быыстапката Саха Сиригэр аан бастакытын көрдөрүүгэ турар. Быыстапкаҕа Татарстан Өрөспүүбүлүкэтиттэн ойуулуур-дьүһүннүүр түмэлиттэн худуоһунньук 33 живопись хартыыната, 50 графическэй үлэтэ кэллэ. Бу быыстапканы тэрийэргэ национальнай ойуулуур-дьүһүннүүр түмэл былааннаабыта ыраатта. Былырыын Саха Сирин күннэрин Татарстан Өрөспүүбүлүкэтигэр ыыта сылдьан сүбэлэн түһэрсибиттэрэ.

“Иван Шишкин үлэлэрэ - бу бэс чагдалар. Биһиги бэйэбит музейбытыгар турбут үлэлэр сорохторо эмиэ манна бааллар. Сэбиэскэй бириэмэҕэ кэлбиттэртэн. Онон манна кэлбит киһи, эн тыаҕа киирбиккин диэн. Саха сирин бары олохтоохторун ыҥырыахпын баҕарабын, кэлэн Иван Иванович Шишкин биһиэхэ хаалларбыт эйгэтигэр, кини санаатынан бу Татарстан сириттэн Елабуга куорат тула үүнэн турар бэс чагдалар биһиэхэ Саха сиригэр кэлбит тыынын   кэлэн көрүн”, - диэн СӨ култуураҕа уонна духуобунай сайдыыга миниистирэ Юрий Куприянов этэр.

Бу ыйдар устата түмэл үлэһиттэрэ саалаларын оҥорон, киэргэтэн көрөөччүлэргэ хас биирдии айымньы ис хоһоонун сиһилии тириэрдэргэ үлэлэстилэр. Быыстапка биир сонун көстүүтүнэн, аныгы технологияны туһанан интерактивнай эйгэни тэрийии буолла. Ол курдук түмэл үлэһиттэрэ ботаническай саады кытта биир ситимнээхтик үлэлээн, худуоһунньук хас биирдии айымньыларыгар олоҕуран, ис хоһоонун байытарга көмөлөстө.

“Быыстапканы көрөн киһи толору дуоһуйууну ыларыгар, биһиги ботаническай саадка махтаныахпытын баҕарабыт. Аныгы тылынан этэллэрин курдук, коллаборация диэн. Ол иһин биһиги музейбыт араас тэрилтэлэри, компаниялары кытта үлэлэһэр. Онон Наука академиятын иһинэн үлэлиир ботаническай саады кытта тэҥҥэ үлэлэһэммит, Иван Шишкин быыстапкатыгар интерактивнай эйгэни үөскэттибит. Ол курдук Сахабыт сиригэр үүнэр мастары, үүнээйилэри, бу Иван Иванович хартыыналарыгар ханнык айылҕа кэрэ көстүүлэрин хоһуйбутун барытын бэлэмнээтибит. Инклюзивнай бырагырааммалары ыытарга, хас биирдии киһиэхэ табыгастаах, чугас буоллун диэн өйтөн-санааттан маннык үлэ ыытыллар. Хас биирдии киһи саалаҕа киирдэҕинэ, айылҕаҕа сылдьарын курдук”, - диэн СӨ национальнай ойуулуур-дьүһүннүүр түмэл социокультурнай алтыһыылар хайысхаларыгар салаатын сэбиэдиссэйэ Сардаана Посельская иһитиннэрдэ.

Быйыл национальнай ойуулуур-дьүһүннүүр түмэл төрүттэммитэ 95 үбүлүөйдээх сылын бэлиэтиир. Онон көрөөччүлэригэр, өссө элбэх саҥа, сонун быыстапкалары, бырайыактары бэлэмнээтэ. Бу быыстапка эмиэ үбүлүөйдээх сыл чэрчитинэн ыытыллар.

Быыстапка национальнай ойуулуур-дьүһүннүүр түмэлигэр, бала5ан ыйын бүтүүтүгэр диэри көрдөрүүгэ туруоҕа. Онон искусство  кэрэ эйгэтин сэҥэрээччилэри, Иван Шишкин сүгүрүйээчилэрин түмэл быыстапкаҕа ыҥырар.