Тыа хаһаайыстыбатын табаары оҥорооччуларын сийиэһэ

Киэҥ мунньах хас даҕаны хайысханан тэриллэр. Сүрүн болҕомтону - оҥорон таһаарыыны уонна олохтоох тыа хаһаайыстыбата бэлэмниир аһын-үөлүн элбэтиигэ, үрдэтиигэ ууруохтара.

Тыа хаһаайыстыбатын бородууксуйатын оҥорон таһаарааччыларын сийиэһэ Бырабыытылыстыба бэрэссэдээтэлин солбуйааччы Михаил Никифоров анал мунньаҕынан саҕаланна. Манна улуустартан тыа хаһаайыстыбатын салалтатын салайааччылара кытыннылар. Кэпсэтии тыа хаһаайыстабытыгар оҥорон таһаарыыны өйүүргэ судаарыстыбаттан көрүллэр көмө боппуруостарыгар ананна. Ол кэннэ өрөспүүбүлүкэҕэ саҥа инновационнай агротехнологиялары олоххо киллэриигэ туһуламмыт төгүрүк остуол буолла. Мунньахха бэлиэтээбиттэринэн, тыа хаһаайыстыбатын салаатыгар саҥа технологиялары киллэрии бэрт бытаан, онон бу хайысхаҕа былааннаах үлэ ирдэнэр.

"Коптердар, дроннар хайдах көмөлөһөллөрүн, бэтэрэнээрдэргэ саҥа информационнай технология хайдах киирэрин, чипирование, дааннайдар базалара хайдах оҥоһулларын, ити барыта көмө. Тыа хаһаайыстыбатыгар оҥорон таһаарааччылар хайдах бэйэлэрин бородууксуйаларын атыылыылларын, уо.д.а. саҥа технологияҕа киллэрэн үөрэтиэхтээхпит биһиги", - диир Арктикатааҕы агротехнологическай университет научнай үлэҕэ уонна инновацияҕа проректорын эбээһинэһин толорооччу Константин Нифонтов.

Сийиэс чэрчитинэн университет дьиэтигэр тыа хаһаайыстыбатын научнай-чинчийэр институтун быыстапката турда. Манна бэйэ чинчийэн таһаарбыт  бэтэринээрнэй эмп-том көрүҥнэриттэн саҕалаан төрүт ас-үөл турда. Ол курдук, Саха сиригэр үүнэр бурдуктан, сир аһыттан астар, утахтар дьон дьүүлүгэр таҕыстылар.

"От үөрэтэ баар, бу былыргы национальнай үгэс. Ол үгэһи биһиги сокуонунан докумуон оҥороммут, оҥорон таһаарааччылар билигин маннык аһы астыылларын курдук гына усулуобуйа оҥорбуппут", -  диэн ТХНЧИ сүрүннүүр научнай үлэһитэ Валентина Васильева кэпсиир.

Ньурба улууһуттан төрүттээх, билигин Арктикатааҕы агротехнологическай университет инженернай факуьтетын магистрана Айсен Григорьев, бэйэтин үөрэнэр бөлөҕүн кытта таҥан таһаарбыт туорахтаах култуура араас көрүҥнэрин ыраастаан таһаарар тэрилин көрдөрөр. Холобура, бу нөҥүө салгынынан сэлиэһинэйгэ ол-бу буккаас киирбитин ыраастаан, наардаан бириэххэ сөп. 

Сийиэскэ икки күн устата кэккэ хайысхаларынан тэрээһинэр буолаллар. Биир сүрүн кэпсэтиинэн, тыа хаһаайыстыбатын табаары оҥорооччуларыгар ананар, методическай көмө туһунан дьүүллэһэллэр. Маныаха улуустар бэрэстэбиитэллэрэ бэйэлэрин тус этиилэрин киллэрэр кыахтаахтар. 

"Биһиги туруорсуубут саамай сүрүн боппуруоһа – сир боппуруоһа. Билигин сир урукку сокуонунан хаһаайыстыбаларга бэриллэн хаалла. Саҥа тэринэр киһи сирэ суох, эбэтэр хаһаайыстыбатын кэҥэтэр киһи сирэ суох. Ол иһин сир реформата буолуон наада. Сир сокуонугар уларытыылар киириэхтэрин наада, тыа хаһаайыстыбатын ананыытыгар туттуллар сир аналынан туттуллуохтаах диэн этиилээхпин", - диэн Таатта улууһун тыа хаһаайыстыбатыгар салалтатын начальнига Михаил Хаптагаев бэлиэтиир.

Маны тэҥэ, эдэр фермердар сүбэлэрин мунньаҕа буолла. Эргиэни сайыннарыы фондата, агропромышленнай комплекс уонна "Мой бизнес" кииннэр бииргэ үлэлэһиигэ сөбүлэҥ баттаһыахтара. Тэрээһин киэҥ ыҥырыылаах пленарнай мунньаҕынан түмүктэниэҕэ.