Бүтэһик күннэри баттаһа муус аннынан балыктааччылар эбэттэн тахсыбаттар

Уус Майа оройуонун көмүс хатырыктааҕын хабааччыларыгар билигин саамай тоҕоостоох кэм. Сорохторго олохторун уобараһа.  Бу эҥэр балыксыттар билигин сыалыһарга болҕомтолорун уураллар.

Балык диэн баран муннукка ытаабыт, Винокуровтар дьиэ кэргэн аҕа баһылыга Алексей Винокуров илим ииппит ойбонун алларар. Быйыл кини кэргэнинээн Тамара Егоровналыын  Эдьээнтэн 3 биэрэстэ тэйиччи, Алдан эбэ аннараа кытылыгар турар сиргэ кыстаатылар. Уһун унньуктаах кыһын устата көмүс хатырыктааҕы хаптаран, бэйэлэригэр, дьонноругар сөп соҕус гына туттулар. Билигин бүтэһик кэмнэри баттаһа, эбэттэн тахсыбаттар. Алексей сүрэҕин аҥара Тамара, кэргэнин кытары тымныыны, тыалы ахсарбакка тэбис тэҥҥэ сылдьыһар.

"Бастыкыбытын, оҕонньорбун кытта бу Кээлбиккэ кыстаатыбыт. Уһун кыһыны быһа илимнээтибит. Үс илимнээх хааллыбыт. Сыалыһар, сордоҥ тутар. Биирдэ эмит алыһар тутар. Тоҥустар балыктаан аһыы олоробут диэххэ сөп. Алдаммыт аһата олорор", - диир  Эдьээн национальнай нэһилиэгин олохтооҕо Тамара Винокурова.

Балыксыттар кэтээн көрүүлэринэн, быйыл муус олус халыҥ. Онон сыра сылба үгүһэ баранар. Ол диэбэккэ, балыксыт дьиэ кэргэҥҥэ,  күөх боллох мичик гынар.

"Аҕыйах сыллааҕыта 36 киилэлээх били тутан турардаахпын. Мин үрдүгүм саҕа уһуннаах этэ. Илимтэн нэһиилэ соҕотох хостообутум. Олунньу 23 күнүгэр, чопчу Сэбиэскэй Аармыйа күнүгэр түбэспитэ. Дьэ мин үҥкүү бөҕөнү үҥкүүлээтим онно", - диэн Эдьээн национальнай нэһилиэгин олохтооҕо Алексей Винокуров кэпсээтэ.

Бу да сырыыга күөх боллох балыксыттары матарбата. Иккис илимҥэ сыалыһар балык барахсан хаптарыллан, ойбонтон хостооһун үөрүүлээх түгэнэ тосхойор.

Балыскыт үөрүйэхтик туттан-хаптан, хас эмэ сиринэн иилистибит  илимтэн  көмүс хатырыктааҕы босхолуур. Салгыы үһүс ойбон мустубут дьону эмиэ үөртэ. Алдан эбэ күндүлүөҕүнэн күндүлээтэ.

Эбэҥки норуота түөлбэлэнэн олорор дойдутугар – Уус Майаҕа былыр былыргыттан булт-алт, көмүс хатырыктаах дэлэй. Оройуоҥҥа билигин Алдан эбэҕэ 5, Аллах Үүҥҥэ 2 уонна Юдома5а 1  миэстэ5э уопсай балыктааһын көҥүллэнэр, онно олохтоохтор бэйэлэрин айахтарыгар, нуорманы тутуһан былыктыыллар.