Саха сиринээҕи уопсастыбаннай хамсааһын киинигэр үлэ күөстүү оргуйар

38

Анал байыаннай дьайыыга ыҥырыллыбыт эр дьоммутугар көмөлөһөр сыаллаах-соруктаах уопсастыбыннай, бэйэ баҕа өттүнэн тэриллибит, аһымал  ыстааптар үлэлэрэ салҕанар. Билигин дьон түмсэн, төһө кыалларынан биир дойдулаахтарбытыгар туһа диэн, бэйэлэрин кылааттарын киллэрэллэр. 

Тэрилтэлэртэн, улуустартан, түмсүүлэртэн уонна биирдилээн дьонтон көмө тохтообокко киирэ турар. Онтон ийэлэр, эбээлэр  ким бириэмэлээҕинэн солбуйса сылдьан  кииҥҥэ кэлэн иистэнэллэр.

Мария Лыткина өр сылларга тыйаатырга иистэнньитинэн үлэлээбит буолан уопуттаах, түргэн-тарҕан туттуулаах.  Күҥҥэ хас да мөһөөччүгү, таҥаһы тигэр. Кини бу хамсааһын саҕаланыаҕыттан бэйэ баҕатынан кыттыһар.

"Биһиги саллаат оҕолорго рюгзак тигэн бэлэмнии сылдьабыт. Аармыйаҕа сылдьар оҕолорбутугар, буойуттарбытыгар, көмүскээччилэрбитигэр. Бары этэҥҥэ төннөн кэлиэхтэрэ диэн дууһабытын ууран туран үлэлиибит. Кыргыттар барытын түмэн ыыталлар, махтал кинилэргэ", - диэн иистэнньэҥ Мария Лыткина кэпсиир.

Ыстаапка эдэр ыччат да саастах дьон бары кэлэн биир сомоҕо буолан күүс-көмө буолаллар. Дарья Яковлева волонтердар ыстаабтара тэриллиэҕиттэн кэлэн көмөлөһөр. Көмө дьоннортон, тэрилтэлэртэн тохтообокко киирэ турар диэн этэр.

Итиэннэ волонтердар таҥас сыыһыттан маннык сетка оҥорон бэлэмнииллэр. Хас биирдии илим хараҕар баайыллар буолан, олус уустук. Онон күҥҥэ ортотунан иккини бүтэрэллэр. 

“Биһиги манна элбэхпит, отучча буолан үлэлиибит. Саамай көмүскүүр сеткаҕа, илимҥэ тиһэбит, оҥоробут. Уолаттарбыт кэлэн барытын көрдөөн ыла тураллар. Олох элбэҕи оҥордубут, бүтэ турар”, - диир Дьокуускай куорат олохтооҕо Ньургустаана Ксенафонтова.

Итиэннэ кииҥҥэ кэлбит маллары суулаан, сааһылаан  массыынаҕа тиэйэн хомуурга ыҥырыллыбыт дьоҥҥо ыыталлар. Хас биирдии киһи дойдулаахпын, миигин өйүүр дьон баар диэн саныылларын курдук маннык үлэ тиһигин быспакка ыытыллар.

"Өрөспүүбүлүкэ салалтатын кытта ыкса бииргэ үлэлээммит, туох баар боппуруостарбыт барыта кыаллар эбиттэр. Биһиги кыайбаппытын кинилэр көмөлөһөн биэрэллэр. Кинилэр сатаабаттарын, биһиги киирэн суһаллык киирсэбит. Ол иһин маннык бииргэ үлэлиирбит олус табыгастаах. Былырыын да, баһаар кэмигэр инник үлэлээбиппит. Ол схеманы күүскэ тутуһа сылдьабыт ", - диэн "Саха сирэ эйигинниин" уопсастыбаннай хамсааһын бэрэссэдээтэлэ Айыл Дьулурҕа иһитиннэрдэ.

Хас биирдии бэйэтин көмөтүн аҕалбыт киһи, хомуллубут көмө тустаахха  тиийиэҕэ,  байыастарбыт туох да улахан кыһалҕаны көрсүбэккэ дойдуларын чиэстээхтик көмүскүөхтэрэ диэн эрэнэллэр.