Дыгын оонньуутугар сүүмэрдиир түһүмэх

Саха төрүт үгэһин тутуһан, өбүгэ оонньууларын күрэхтэһиитэ быйыл эмиэ киэҥ хабааннаахтык ыытыллара былааннанар. Бу күннэргэ Дьокуускай куоракка бастакы сүүмэрдиир түһүмэх ыытыллар. Манна уопсайа 23 боотур кэлэн илиҥ-кэлиҥ түсүһэр.

Өбүгэ оонньууларын оройуттан өрө туппут 23 боотур кэлэн, аны сайын буолуохтаах "Дыгын оонньууларыгар" путевка иһин киирсэллэр. Быйыл уопсайа 16 улуустан сайаапка киирбит, хаһааҥҥытааҕар да элбэх саҥа холонооччу баар диэн тэрийээччилэр этэллэр. Мантан сайын өбүгэ төрүт оонньуларыгар саҥа ааттар тахсаллара күүтүллэр.

"Саҥа эдэр уолаттар тахсан, бу саха норуотун төрүт оонньууларыгар, бэйэлэрин кыахтарын, күүстэрин-уохтарын көрдөрөллөрүн баҕарабын уонна инникитин даҕаны биһиги, саха норуота, өбүгэ эрдэхтэн кэлбит национальнай көрүҥнэрбитин үрдүк таһымҥа тутан оҕолорбутугар, дьоҥҥо-сэргэҕэ тиэрдиэхпитин баҕарабыт", - диэн Дьокуускай куорат спорт салалтатын салайааччыта Эдуард Ефимов иһитиннэрдэ.

Сүүмэрдиир күрэхтэһии бастакы күнүгэр боотурдар 3 көрүҥҥэ кииристилэр, ол курдук  үс төгүл үс, тутум эргиирэ уонна мас тардыһыыта.  Үс төгүл үскэ Кэбээйи улууһуттан Яков Дмитриев, онтон тутум эргииригэр Ботуур спортивнай кулууп иитиллээччитэ Артем Дьяконов бастыҥ буоллулар. Кыттааччылар «Дыгын оонньууларыгар» баар түһүмэхтэринэн барытынан сүүмэрдээһини ааһаллар.

"Уопсайа 7 көрүҥнээхпит. Ол курдук үс төгүл үс ыстаныы, тутум эргиирэ, мас тардыһыыта, оҕунан ытыы, сүүрүү, хапсаҕай уонна таас көтөҕүүтэ. Билигин манна кытта сылдьар уолаттарга бэлиэтээн көрдөххө, Николай Матаннанов, Артем Варданян, Николай Обоев, Дмитрий Петров курдук, Дыгын оонньуутугар кытта сылдьыбыттар бааллар. Ону тэҥэ, билигин инники күөҥҥэ сылдьар эдэр уолаттар бааллар", - диир "Дыгын оонньууларын" 7 төгүллээх кыайыылааҕа Иван Белолюбскай.

Быйылгы күрэхтэһии быраабылатыгар туох да уларыйыы киирбэтэ. Сүүмэрдээһин иккис күнүгэр 400 миэтирэҕэ сүүрүү, хапсаҕай уонна тааһы көтөҕүү буолуоҕа. Ол түмүгүнэн, 4 путевканы ким ылбытын билиэхпит.  Бастакы күн түмүгүнэн, бары кэриэтэ тэҥ бааллаахтар, онон ким Дыгын оонньууларыгар кыттара билигин да чопчу биллибэт, киһи сэрэйэн да көрөр кыаҕа суох диэн сүрүн судьуйа этэр.

"Бу үс көрүҥ түмүгүнэн көрдөххө, уолаттар бэлэмнэрэ олох үчүгэй. Холобура, 10 иһигэр киирэ сылдьар уолаттар көрдөрүүлэрэ лаппа үрдүк. Мин саныахпар, аны сайын буолар оонньууга уолаттар бэлэмнэрэ билиҥҥиттэн көстөр", - диэн күрэхтэһии сүрүн судьуйата  Иван Горохов үллэстэр.

Бастакы 3 путевканы номнуо Саха сирин төрүт спортивнай оонньууларын чөмпүйэнээтигэр 3 бастакы кыайыылаах ылбыт уонна өссө биир путевканы «Дыгын оонньууларын» ааспыт сыллааҕы кыайыылааҕар Алексей Уваровскайга биэрбиттэр. Онон хаалбыт 8 путевканы бу курдук кыттыан баҕалаахтар бэйэ-бэйэлэрин кытары киирсэн, өбүгэ оонньууларын сүрүн күрэхтэһиитигэр киирэргэ дьулуһаллар. Бүгүн бастакы сүүмэрдиир күрэхтэһии түмүгүнэн, 4 путевка хаһаайыттара биллиэхтэрэ.