Хотугу тыйаатыр олоҕуттан

Өймөкөөн улууһун киинигэр өрөспүүбүлүкэҕэ биир тарбахха баттанар норуодунай тыйаатыр үлэлээбитэ 60 сылтан таҕыста. 30 кэриҥэ артыыс олохтоохторго күннэтэ саҥа туруорууну көрдөрөөрү бэлэмнэнэр.

Сотору кэминэн, Өймөкөөн улууһугар саҥа туруоруу. Валентин Красногоров "Золотая лавина" айымньытынан тустаах оройуон норуодунай тыйаатыра дьон дьүүлүгэр саҥа испиктээги таһаарыаҕа. Билигин  Уус-Ньаратааҕы култуура киинигэр бэлэмнэнии күннэтэ барар. Тыйаатыр салайааччыта,  режиссер Анна Бубякина бу испиктээги сыанаҕа туруоруох буолбут баҕа санаата ырааппыт. Россия тыйаатырдарыгар сэдэхтик турбут, урут Новосибирскай тыйаатырыгар  уонна биирдиилээн театральнай институт выпускниктара туруора сылдьыбыттарын, сотору кэминэн Өймөкөөн улууһун олохтоохторо көрүөхтэрэ. Гротесковай жанрдаах комедия тыйаатыр артыыстарын барытын түмтэ.

Уус-Ньаратааҕы норуодунай тыйаатыр историята баай, дириҥ. Ааспыт сылга төгүрүк даататын 60 сааһын ылбыта. Оттон бу тыйаатыр бастаан драматическай куруһуок курдук үлэлээн саҕалаабыта. 

"Гулаг дойдута этэ. Иннэ гынан манна интеллигенция, араас режиссердар, артыыстар, устудьуоннар, худуоһунньуктар, фотографтар бааллара. Кэлин кинилэри босхолообуттарын да иһин, ыыппаттар эбит. 2-3 сылы быһа сылдьаллар бөһүөлэккэ. Ол түмүгэр, драматическай куруһуок тэрийэллэр.  Бу кэнники сайдан иһэн, геологтар илиилэригэр киирэр", - диэн Уус-Ньаратаҕы норуодунай тыйаатыр салайааччыта Анна Бубякина кэпсээтэ.

Артыыстар араас эйгэҕэ үлэлииллэр - ким эрэ артыалга, ким эрэ дьаһалтаҕа, оскуолаҕа оттон да атын эйгэҕэ үлэлиир дьон-сэргэ, ол эрэн кинилэри барыларын тыйаатыр түмэр, сомоҕолуур. Билигин кинилэр Уус-Ньаратааҕы "Металлург" култуура киинин иһинэн үлэлии-хамсыы сылдьаллар.

"Биһиэхэ култуура киинигэр 3 норуодунай коллективтаахпыт. Норуодунай  тыйаатыр, “Золотинка” диэн үҥкүү норуодунай ансаамбыла уонна цирковой студиялаахпыт. Цирковой студиябыт Өрөспүүбүлүкэбитигэр тэриллибит саамай бастакы цирковой студия диэххэ сөп", - диир "Металлург" култуура киинин салайааччыта Мадлена Николаева.

Өрөспүүбүлүкэҕэ, биир бастакынан, норуодунай ааты ылбыт кэллэктииптэр билигин күннэтэ бэлэмнэнэнэр аакка сылдьаллар. Маныаха сорохтор, номнуо бу сайын 16 төгүлүн ыытыллар Олоҥхо ыһыаҕар кыттарга бэлэмнэнэллэр.