Дуобакка 500 дуоскаҕа тэҥинэн оонньооһун рекордун олохтууллар

Ааспыт өрөбүллэргэ Өрөспүүбүлүкэ хас да улууһуттан дуобаты сэҥээрээччилэр мустан, 8 гроссмейстеры утары оонньоотулар. Маннык элбэх киһилээх тэҥинэн оонньуу хаһан да ханна да буола илигэ. Тэрийээччилэр Россия уонна аан дойду рекордун олохтуур былааннаахтар.

Өрөспүүбүлүкэҕэ оскуола иннинээҕи саастаах оҕолоругар анаан ыытыллыбыт дуобат күрэҕин кыайыылааҕа, 5 саастаах Айсена Федорова, 99 саастаах Наум Слепцовтуун нуучча дуобатыгар оонньоон, бэйэлэрэ туспа рекорд олохтууллар. Ол курдук саамай саастаах кыттааччы уонна саамай эдэр оонньооччу оонньуулара хаһан да ханна да буолбатаҕа. Уһун тыҥааһыннаах киирсии түмүгүнэн, Наум Трифонович эрэллээх кыайыыны ылары ситистэ.

"Кини бу Кыайыы 66 сылыттан саҕалаан, сыл аайы дуобакка уонна шахмакка бэтэрээннэргэ уонна эдэр ыччакка диэн күрэхтэһиини көҕүлээбитэ. Быйыл 14 төгүлүн эмиэ буолуохтаах. Наум Трифонович куруутун бэйэтэ тэрийсэр уонна кыттар. Онон кини 97 сааһыгар спорт маастарыгар кандидат буолбута. Маннык саастаах киһи кандидат буолбута диэн эмиэ суох", - диир СӨ дуобатка федерациятын вице-президиэнэ Юрий Никифоров.

Саха сирэ 2012 сыллаахха туруорбут рекордун хатылыыр. Ол курдук 11 сыл аннараа өттүгэр, 300 дуоскаҕа тэҥинэн оонньооннор аан дойду рекордун олохтообуттара, билигин 500 киһи 8 аан дойду таһымнаах гроссмейтерын утары биир тэҥ оонньоотулар. Маннык рекорду Саха сиригэр физкультурнай хамсааһын тэриллибитэ 100 сылыгар аныыллар.

"Альтернативнай диэн ааттаах. Тоҕо иннэ диэний? Бары соһуйаллар. Бу гроссмейстердар бэйэ бэйэлэрин кэннилэриттэн хаамааһын буолар. 500 киһи бу 8 гроссмейстеры барыларын кытта оонньууллар. Ол аата, холобур, биир гроссмейстер хаампытын кэнниттэн, иккис гросмейстер иккис хаамыыны оҥорор. Үһүс гроссмейстер үһүс хаамыыны оҥорор. Онон гроссмейстердарга ыарахан соҕус буолар. Иннигэр хаампыт гроссмейстер тугу толкуйдуурун, кэннигэр иһэр киһи билимиэн сөп. Ол иһин кыайыылаах эмиэ элбэх буолуон сөп", - диэн рекорд тэрийээччитэ Светлана Винокурова сырдатта.

Оонньуу түмүгүнэн 26 киһи кыайыылаах буолла уонна 121 киһи тэҥ-тэҥҥэ хаалла, уоннааҕылары гроссмейстердар кыайдылар. Спорт маастардара этэллэринэн, 500 киһини кытары тэҥинэн оонньуур ыарахан, мээнэ киһи тулуйбат дэһэллэр.

"Бу тэрээһин биһиэхэ сахаларга, дуобат хайдах курдук сайдыбытын көрдөрөр. Маннык элбэх дуобаты таптааччы, уһуйаан оҕотуттан саҕалаан кырдьаҕас дуобаччыттары кытта кэлэн кытта сылдьаллар", - диир СӨ дуобатка сүрүн тренерэ, аан дойду таһымнаах гроссмейстер Гаврил Колесов.

Историяҕа биирдэ буолар түгэни, дуоматы сөбүлээччилэр мүччү туппакка,  кыратыттан аҕам саастаахтарыгар тиийэ кэлэн, уһун уочараты ааһан, оонньоон- дуоһуйан, бэйэлэрин тургутан көрдүлэр.

Рекорд олохтоммутун туһунан "Интеррекорд" тэрилтэ 10 күн иһигэр камералары көрөн, боротокуолу бэрэбиэркэлээн баран, быһаарыыны ылыныахтаах. Тэрийээччилэр уопсайа 8 камеранан устан анал хамыыһыйаҕа ыытан, эппиэти күүтэллэр.