Быйыл Өрөспүүбүлүкэ үрдүнэн 260 км. тахса суолу өрөмүөннүөхтэрэ

Барыта 8 миллиардтан тахса үп көрүллүөҕэ, онтон 4 аҥаар миллиардтан тахсата федеральнай харчы. 2019 сылтан Саха сиригэр "Куттала суох хаачыстыбалаах массыына суоллара" национальнай бырайыак үлэлиир. Ол чэрчитинэн, кэккэ улууска уонна киин куоракка суоллар саҥардыллыахтара.

Дьокуускайга суол өрөмүөнүн сезона саҕаланан, үлэ күөстүү оргуйар. Быйыл киин куоракка уопсайа 17 уулуссаны саҥардан биэриэхтэрэ, ол эбэтэр уопсайа 22 километры оҥоруохтара. 17 эбиийэктэн 10 бу сылга бүтэриэхтэрэ, онтон хаалбыт 7 кэлэр сылга көһөн, салгыы өрөмүөннэниэҕэ. Бу үлэлэргэ барыта икки миллиардтан тахса үп тыырыллан турар. Улахан болҕомто куорат киинигэр сытар уулуссалары буолбакка, кытыы оройуон суолларыгар эмиэ ууруллар. Холобура, бу ГРЭС оройуонугар баар Бабушкина уулуссаҕа хаһыы үлэлэрэ саҕаланан бара тураллар.

Суол сабыллыыта айан сырыытын хааччахтыыр. Онон улахан мэһэй үөскээбэтин туһуттан, суолу кэрчиктэргэ арааран уочаратынан сабыахтара. Холобура, быйыл Ленин проспегар үлэ саҕанар буолан, учаастагынан эмиэ сабыллара күүтүллэр. Оттон Можайского уулуссаҕа өрөмүөн барарыгар кыйа ааһар быстах хайысхалары бэлэмниэхтэрэ. Эмиэ элбэх сырыылаах, киин сытар Пояркова суолун оҥоруу эмиэ салҕаныаҕа. Бу суолга үлэлэри түүҥҥү кэмҥэ ыытар соруктаахтар.

"Аҕыс эбийиэкпитигэр билигин күүстээх үлэ бара турар. Хас биир эбийиэккэ подряднай тэрилтэлэрбит матырыйаалларын таһан, кумахтарын тиэйэн, бардюрдарын хааччына сылдьаллар. Ол үрдүнэн, өссө эбии 24 сыллардааҕы эбийиэкпитигэр эмиэ контрактация бара турар. Ону оҥорорбутугар биһиэхэ бу куораты, тыраанспар министиэристибэтин кытта күүстээх үлэ ыытыллыбыта", - диэн "Главстрой" тэрилтэ суол тутуутугар салаатын салайааччы Владимир Макаров кэпсээтэ.

Оттон өрөспүүбүлүкэ үрдүнэн быйыл уопсайа 260 км. тахса суолу өрөмүөннүөхтэрэ. Барыта 8 милиардтан тахса үп көрүллүөҕэ, онтон 4 аҥаар миллиардтан тахсата федеральнай харчы.

"Билигин региональнай суолларга, Амма, Нам, Умнас, Харбалаах суолун, Тиксии аэропордун оҥоруохтаахпыт. Уонна Бүлүү улууһугар Лючинскай хайысхатыгар. Итиэннэ Кыһыл Сыырга үлэлэри ыытыахпыт", - диир СӨ транспорт уонна суол-иис хаһаайыстыбатын миниистирин бастакы солбуйааччы  Анатолий Потапов.

Ону тэҥэ бу сылга, суоллары кытта өрүстэр, үрэхтэр  нөҥүө хас даҕаны муоста тутуллан киириэхтээх. Бэлиэтэн эттэххэ, "Куттала суох хаачыстыбалаах массыына суоллара" национальнай бырайыак 2019 сыллаахтан олоххо киирбитэ. Ол кэмҥэ куорат уонна куорат таһынааҕы бөһүөлэктэр суолларын 30 эрэ бырыһыанара нормативка эппиэттиирэ. Онтон 2024 сылга диэри бу көрдөрүү өссө эбии үрдээн, 80 бырыһыаҥҥа диэри тиийиэхтээх. Өрөмүөн үлэтэ хаачыстыбалаахтык ыытылларыгар улахан болҕомтону ууруохтара, ол курдук  суол-иис ирдэбилгэ эппиэттирин Суол Салалататын кытта общественниктар хонтуруоллуохтара.