2024 сылга диэри сымыыты 100 мөлүйүөҥҥэ тириэрдии

Дьокуускайдааҕы көтөр фабрикатыгар улахан уларытыы үлэлэрэ ыытыллан, саҥа сыах үлэҕэ киирдэ. Баараҕай бырайыагы ситиһэргэ тустаах тэрилтэ уонна тыа хаһаайыстыбатын министиэристибэтэ биир ситимнээх үлэлэһэллэр. Онуоха бастакы олук уурулунна.

Кыһыл лиэнтэ быһыллан, көтөр фабрикатын саҥа сыаҕын арыйыытын сиэрэ-туома саҕаланар. Дьокуускайдааҕы көтөр фабрикатын 2021-2024 сыллааҕы стратегическай баараҕай былаанын олоххо киллэрэр соруктаах, 18 нүөмэрдээх сыах саҥалыы тыыннанна. Бу күн тустаах тэрилтэ үлэһиттэрин эҕэрдэлии, үлэ хаамыыта хайдах барбытын көрө-истэ үгүс ыалдьыттар кэллилэр.

"Ааспыт сылга бу эбийиэги реконструкция былааныгар киллэрэммит, тутуу чааһын уонна оборуудабанньатын уларыттыбыт. Оборуудабанньабытын 7 сыл курдук үлэлэспит итальянскай хампаанньабытыттан ыллыбыт. Кинилэр биһиэхэ куруутун кэлэн куонкурс быһыытынан кыайаллар. Кырдьык, хаачыстыба да өттүнэн, сыанатынан даҕаны үчүгэй", - диэн СӨ бырабыытылыстыбатын бэрэссэдээтэлин солбуйааччы Михаил Никифоров иһитиннэрдэ.

Саҥалыы тыыннаммыт сыах 1980 сылаах тутуу. 1799 кыбадыраатынай миэтирэ иэннээх. Саҥа турбут оборуудубанньа толору автоматизированнай. Көтөрдөрү аһатыы, уулаатыы барыта кнопка нөҥүө барар.

Аҕыйах кэм иһигэр Андрей Зимин салайыылаах биригээдэ үлэтин суобастаахтык, түүннэри-күнүстэри толорон, чопчу былааннаммыт болдьоҕор бүтэрдэ.  Ол түмүгэр, өссө эбии 29 тыһынча көтөр миэстэтэ таҕыста.

"Бу иннинэ турбут оборуудабанньабыт 38 тыһыынча куурусса олорор миэстэлээх этэ. Билигин биһиги 5 мэндиэмэннээх оборуудабанньаны туруордубут. Уопсай сыах оҥорон таһаарыыта улаатыаҕа. Уонна бу сыах үлэҕэ киирбитинэн, биһиги ааспыт сылы кытта тэҥнээтэххэ, 2023 сыл түмүгүнэн 7 мөлүйүөнүнэн элбэх сымыыты ылыахпыт. Биһирээтибит оборуудабанньа тимирэ кытаанаҕын уонна барыта автоматическай. Холобура, аһылыгын тарҕатыыта буоллун, сымыытын хомуллуута буоллун, барыта автоматика. Аныгы ирдэбилгэ барытыгар эппиэттиир", - диир Дьокуускайдааҕы көтөр фабрикатын генеральнай дириэктэрэ Наталия Дягилева.

Баараҕай үлэ тыа хаһаайыстыбатын министиэристибэтин кытта биир ситиминэн ыыттыллан барда. Уопсайа бу үлэлэргэ судаарыстыба бүдьүөтүттэн 50 мөллүйүөн солкуобай субсидия көрүллүннэ.

"Сылын аайы бэйэтин көрдөрүүтүн тупсаран иһэр. Ол эбэтэр 2022 сыл түмүгүнэн, 84 мөлүйүөҥҥэ таҕыста. Бу сылга сымыыт таһаарааһына. 77 этэ,  билигин 109 быраһыаҥҥа таҕыста. Сүрүннээн маннык көрдөрүүлэр, сыахтары модернизациялааһын түмүгэр тахсаллар", -  диэн СӨ ТХМ миниистирэ Александр Атласов бэлиэтээтэ.

Маны тэҥэ, сотору кэминэн убойнай, эдэр көтөрдөргө,  уонна эбии аһылык сыахтарын саҥардыыга үлэлэри ыытыы былааннанар.