Оҕуруотчут сүбэтэ

Номнуо быкпыт рассадалары көрүү-харайыы, ыһыллар кэмэ кэлбит үүнээйини олордуу. Ботаническай саадка саас бу курдук үгүс үлэнэн саҕаланар. Тэрилтэ уопуттаах үлэһитэ Александра Ермолаева хас биирдии рассадатын сиэмэттэн саҕалаан оҕолуу бүөбэйдээн улаатыннарар.   Өлгөм үүнүүнү ылыы сиэмэни сөптөөхтүк талыыттан улахан тутулуктаах.

Александра Ермолаева, ХИФУ ботаническай саадын декоративнай үүнээйи салаатын салайааччы: "Сиэмэ үс көрүҥҥэ арахсар. Ол курдук бытархай, орто уонна улахан. Бытархай сиэмэни көмпөккө эрэ олордуллар. Онтон ортону уонна улаханы бэйэтин кээмэйин саҕа халыҥнаахтык көмүллэр. Билигин эрдэ ситэр помидор сиэмэтин ыһыахпыт".

Уопуттаах оҕуруотчут Александра Ермолаева помидор сиэмэтин ыһан көрөдөрөр. Бу оҕуруот аһа билигин саамай ыһыллар бириэмэтэ. Олордуохтаах иһитин түгэҕэр үүнээйи тыыннын эбэтэр сөптөөх сииги таһаардын диэн керамзит кутар. Сиэмэни олордууга  саамай сүрүнэ буорун бэлэмнээһин.

"Рассадабытын ыһарбытыгар буорбут сымнаҕас, ууну үчүгэйдик аһарымтыа буолуохтаах. Манна оҕуруоттан буор ылабыт, уонна кумах эбэбит. Маҕаһыын буоруттан кыратык эбиэхпитин сөп", - диэн Александра Ермолаева сүбэлиир.

Маны сэргэ хатыҥ чараҥтан ылыллыбыт сэбирдэх дьапталҕатын көөнньөрөн, буорга эбии гыннахха олус иҥэмтиэлээх буолар диэн Александра Николаевна үллэстэр. Онтон өҥ буорга анньыллыбыт сиэмэ 22-24 кыраадыс сылааска турара наада. Ол кэннэ быкпытын, дьиннээх сэбирдэхтэрэ тахсыбыт кэннэ кыраадыһы 18-19 түһэрэр табыгастаах. Онтон хайа баҕар үүнээйи сөптөөх уоҕурдууга наадыйар. Александра Николаевна этэринэн туһунан иһиккэ көһөрүөххэ диэри аһатыы наадата суох.    

"Үүнээйи сэбирдэҕэ доруобай күөх буоллаҕына аһын биэриитэ үчүгэй буолар. Ол иһин сэбирдэҕэ тупсарыгар анаан аан бастаан мочевинанан уоҕурдуохха сөп. Сайын устат иккитэ аһатар сөп гынар дии саныыбын", - диэн Александра Ермолаева бэйтин уопутуттан үллэстэр.

Үүнээйи силиһэ сайдар кэмигэр фосфор, онтон ас кутар кэмигэр калийдаах уоҕурдуунан аһатар ордук. Уонна биллэн турар, болҕомтолоох сыһыанн эрэйиллэр. Уопуттаах исписэлиис сымнаҕас илиититтэн өрө анньан тахсыбыт оҕуруот астара сотору кэминэн нэһилиэнньэҕэ атыыга тахсыахтара, онтон сибэккитэ Хотугулуу - Илиҥҥи федеральнай университеты киэргэтиэхтэрэ.