Кыһыҥҥы суолу баттаһа

Устар бөлөх Өймөкөөн улууһугар үлэлиир. Манна улахан кыамталаах толору тиэммит массыналар уһун айаҥҥа тохтоон тураллар. Кыһыҥҥы муус суолунан таһаҕаһы тиэйии бүтэһик кэмнэрэ. Билигин Арктика уонна хотугу оройуоннарга таһаҕаһы тиэйии ураты хонтуруолга ылыллар. Күн бүгүн былааннаммыт 404,1 тыһыынча туоннаттан 288,5 тыһыынча туонната, ол эбэтэр 71 % миэстэтигэр тиэрдилиннэ. Билигин түмүктүүр түһүмэххэ бары хайысхаларынан, олоххо - дьаһахха киэҥник туттуллар таһаҕаһы тиэйии тэтимнээхтик барар. Сабаҕалааһын быһыытынан өрөспүүбүлүкэ киин өттүгэр, быһа холоон, муус устар 15 күнүгэр итиэннэ Арктическай, хотугу улуустарга муус устар 20 күнүгэр диэри муус туругуттан көрөн үлэ ыытыллара былааннанар.

Никита Павлов, СӨ нэһилиэнньэтин олоҕор - дьаһаҕар куттал суох буолуутун хааччыйар судаарыстыбыннай кэмитиэт бэрэссэдээтэлин солбуйааччы: "Кыһыҥҥы суолунан сырыы саҕаланыаҕыттан ураты хонтуруолга сылдьар боппуруостар бааллар. Ол курдук суоллары оҥорон кэмигэн аһыы уонна кыс устата саҥардыы. Кулун тутар 28 күнүнээҕи туругунан 103 учаастакка 10927 килэмиэтир усталаах 15-40 туоннаҕа диэри уйуктаах суоллар үлэлии тураллар. Быйыл Уус Майа Эдьээнигэр, Муома Хонуутугар, Дьааҥы Табалааҕар, Өймөкөөн Сордоҥнооҕор уонна Кэбээйи Сэбээн Күөлүгэр айан суолун тэрийии боппуруостара сытыытык турбуттарын бэлиэтиэхпин баҕарабын. Билигин суол сулууспаларын өттүттэн буурҕа кэннэ суолу ыраастааһын үлэлэригэр дьуһуурустуба тэрилиннэ".

Үлэ тэтимин  улаатыннарар туһуттан олоҕу-дьаһаҕы хааччыйар таһаҕаһы, сүрүннээн уматык саппааһын, ордук Арктика уонна хотугу улуустарга тиэйиигэ эбии техниканы булан үлэлэтии  ыытыллар. Күн-дьыл усулуобуйатын учуоттаан, ону тэҥэ намыһах температура кэмигэр, ордук тохсунньуга таһаҕас таһыыта намтаабыта. Онтон төрүөттэнэн күн бүгүн техника ахсаана 750 диэри элбэтилиннэ. Уунан таһаҕаһы тириэрдиигэ эмиэ билиҥҥэттэн үлэ барар.

Туяра Мордосова, СӨ нэһилиэнньэтин олоҕор - дьаһаҕар куттал суох буолуутун хааччыйар судаарыстыбыннай кэмитиэт судаарыстыбыннай сулууспатын салаатын кылаабынай исписэлииһэ: "2023 сыллааҕы навигацияҕа уу тырааныспарын тэрилтэлэрэ 733 уу аалын уонна өрүс портарыгар 45 кырааны үлэҕэ таһаарар былааннаахтар".

Манна даҕатан эттэххэ, быйыл Дьааҥы, Индигир, Халыма уонна Бүлүү бөлөх оройуоннарыгар 709 тимир көлөлөҕө техническэй көрүү ыытыллынна.