Доруобуйаларыгар хааччахтаах дьон ГТО нуорматын туттараллар

Дьокуускайга доруобуйаларыгар хааччахтаах дьоҥҥо үлэҕэ уонна оборуонаҕа бэлэм буолуу (ГТО) нуорматын туттарыы  өрөспүүбүлүкэтээҕи бэстибээлэ саҕаланна. Күрэх быйыл иккис сылын ыытыллар. Саха сирин араас муннугуттан 100-тэн тахса инбэлииттээх киһи кытта кэллэ.

Доруобуйаларыгар хааччахтаах дьон ортотугар араас таһымнаах спортивнай күрэхтэр куруук ыытыллаллар. Онтон биирдэстэрэ ГТО бэстибээлэ буолар. Бэстибээл түмүгүнэн ГТО нуорматын туттарбыттар, бу сайын Амма улууһугар ыытыллыахтаах, "Дьулуур" спартакиадаҕа кытта барар чиэскэ тиксиэхтэрэ. ГТО нуорматын туттарыы саастарынан, доруобуйаларынан арахсан көрүҥнэрэ тус-туспа буолар.

Эмилия Иванова, үлэҕэ уонна көмүскэнэргэ бэлэм буолуу (ГТО) нуорматын тутар киин үлэһитэ: "ГТО нуорматын харахтара мөлтөхтөр, истибэттэр уонна уҥуох-сүһүөх ыарыылаахтар диэҥҥэ арааран тута сылдьабыт.  Көрбөттөргө миэстэҕэ туран сүүрүү диэн хайысхалаахпыт. Онтон кэлээскэҕэ олоро сылдьааччылар эмиэ бэйэлэригэр туһуламмыт нуорманы туттараллар". 

Мэҥэ Хаҥалас улууһун хамаандатыттан Валентин Борисов ГТО бэстибээлигэр анаан-минээн эрдэттэн бэлэмнэнэн кэлбит. Бары көрүҥүн ситиһилээхтик туттаран иһэр.

Валентин Борисов, ГТО бэстибээлин кыттыылааҕа: "Сүрдээх элбэх киһи кэлбит, кыттааччы үгүс эбит. Маассабай буолбута киһини үөрдэр. Оҕо эрдэхпитинэ ГТО диэн баар этэ. Ол ону санатар. Бэстибээл дьону түмэр уонна эт-хаан өттүнэн сайдарбытыгар туһалаах".

Амма улууһуттан үлэҕэ уонна оборуонаҕа бэлэм буолуу нуорматын туттара  5 киһи кэллэ. Николай Захаров спордунан дьарыктаммыта ыраатта.

"Быйыл сайын ыытыллыахтаах спартакиадаҕа билиҥҥэттэн бэлэммит Улууска доруобуйаларынан хааччахтаах дьоҥҥо спордунан дьарыктанарга туох баар уссулуобуйа барыта баар, күрэхтэргэ, күрэх иннинээҥҥи бэлэмҥэ барарбытыгар куруук өйүүллэр, көмөлөһөллөр", - диэн Амма улууһун хамаандатын хапытаана Николай Захаров этэр.

Аны сайын "Дьулуур" адаптивнай спорт спартакиадатыгар, билиҥҥи туругунан, 26 хамаанда, ол иһигэр тыһыынчаттан тахса киһи кыттара былааннанар.