“Туой-хайа-2023” кыайыылаахтара ааттаннылар

"Туой Хайа" үтүө үгэскэ кубулуйбут  республикатааҕы ырыа күрэҕэ номнуо 31 төгүлүн буолла. Мирнэй куоракка уонна Арыылаах нэһилиэгэр 21 улуустан барыта 133 ыллыыр талааннаах эдэр дьон кытынна. Хас да күннээх ырыа толоруутун түмүгүнэн Хаҥалас улууһун Булгунньахтаах нэһилиэгиттэн сылдьар Анна Торохова тэҥнээҕин булбакка, Гран-при бирииһин ылан 200 тыһыынчаны ылар чиэскэ тигистэ. Кыайыылааҕы тэҥэ, номинацияларынан бастыҥнар ааттаннылар.  

Анна Торохова, “Туой – Хайа-2023” муҥутуур кыайыылааҕа: “Бу күрэххэ ыллыыр дьоҕурдаах дьон хайаан да кыттыахтарын наада. Олус үчүгэй күрэх. Бу күннэр усталарыгар бэйэ бэйэбитин кытта билсэн, уопсайынан туохха да тэҥнэммэт үтүө өйдөбүлү хаалларда”. 

3 сыллааҕыта фестиваль тэрийээччилэрэ куонкурус тутулун кэҥэтэн туспа бөлөххө оҕолору кытыннарар буолбуттара. Оҕо бөлөҕөр быйыл 49 оскуола үөрэнээччитэ кытынна. Кыайыылааҕынан Уус Алдан улууһун Дүпсэ нэһилиэгиттэн Иван Старостин буолла. Кини 100 тыһыынча харчынан бириэмийэлэннэ.