Өймөкөөҥҥө сылгы кыстыга этэҥҥэ ааһан эрэр

20

Саха сирин үрдүнэн 230 тыһыынчаттан тахса сылгы кыстаан турар. Быйыл үгүс улууска уустук кыстык ааһан иһэр. Эрдэ эбии аһылыкка киирэн, билигин өрөспүүбүлүкэ үрдүнэн сылгы 30% - на эбии аһылыгынан хааччыллар. Өймөкөөн улууһун сыспай сиэллээхтэрэ номнуо иҥэмтиэлээх аһы аһыыллар.

Саха сылгытын тутар Кондаковтар хаһаайыстыбыларыгар эбии аһылыгы биэрэр кэм тосхойор. Үөрдэр ыраахтан, хайа диэкиттэн үүрүллэн кэлэн, аһылык саҕаланар. Дьөһөгөй оҕолоро барахсаттар эбиэһи минньигэстик сииллэр. Сороҕор астарын былдьаһан иирсэн ылаллар.

Сылгы тутар сир Уус Ньараттан 20 килэмиэтир тэйиччи сытар Балаҕаннаахха баар. Быйылгы кыһын олус томороон тымныылаах да буоллар, күн бүгүн манна  саха сылгытын боруодатын үс үөрэ кыстыгы этэҥҥэ туораан эрэр.

Виталий Кондаков, сылгыһыт: "Кыстыгы этэҥҥэ туораатыбыт диэххэ сөп. Сылгы туруга үчүгэй. Өрөбүл аайы кэлэн эбиэстэтэбит, мантан саас от биэртэлиэхпит. Дьиҥ саха сылгыта биһиэхэ баар. Атыттартан быдан тулуурдаахтар, дьоҕурдаахтар. Биһиги курдук уустук усулуобуйаҕа эбии аһылык көрдөөбөккө хаһан аһаан кыстыыр. Саас төрүөх эрэ саҕана бурдугунан, отунан аһатабыт".

Манна даҕатан эттэххэ, саха сылгытын боруодата - аан дойду үрдүнэн биир соҕотох тыйыс тымныыны тулуйар дьиэ кыыла буолар. Кыра уҥуохтаах, киппэ көрүҥнээх, модьу-таҕа. Ол да иһин буолуо хайаны хайа диэбэккэ хаһан, мэччийэн аһыыр. Унньулҕаннаах уһун кыһын устата аһын бэйэтэ булунан аһыыр. Күн уһаан истэҕин аайы, сааскы кэми баттаһа эбии аһылыкка киирэр.

Кондаковтар Өймөкөөн улууһугар саха сылгытын тутар  биир тарбахха баттанар хаһаайыстыба. Манна Уус Ньараҕа аҕыйах үөр баар эбит буоллаҕына сүрүнэ Сордоҥнооххо турар.  Маны таһынан сылгыһыт Кондаковтар өссө атын дьоҥҥо эмиэ көмөлөһөллөр.

Павел Винокуров, Уус Ньара олохтооҕо: "Дьонтон убаһа ылан көрөн кыстаттыбыт. Биһиги аймах бары сылгынан дьарыгырбыт дьон. Саха сылгыта тулуурдаах буолан улахан көрүүтэ суох. Бу сылдьалларын курдук кыһыны быһа хаһан аһыыллар".

Уопсайынан өрөспүүбүлүкэ үрдүнэн кыстыгы 181 тыһыынчаттан тахса сылгы этэҥҥэ туораан эрэр. Күн бүгүн 55 тыһынчаттан тахса сыспай сиэллээх эбии аһылыкка  киирдэ.

Александра Петрова, СӨ ТХМ сүөһү иитиитигэр департаменын сүрүннүүр исписэлииһэ: "Хаар олус халыҥ буолан сылгы кыстыга ыархаттардаах. Онон биһиги хас биирдии улууска сурук суруйан турабыт, кэтэх хаһаайыстыбалаах да улахан хаһаайыстыбалаах дьон сылгыгытын эбии аска киллэрин диэн".

Кыстык түмүктэнэрэ 60-тан тахса хонук хаалла. Тыа хаһаайыстыбатын министиэристибэтэ сылгылаах хаһаайыстыбалаахтары болҕомтоҕо ууран, биирдилээн үлэни ыытар.