Кулун тутарга ардаата

Кубулҕаттаах кулун тутар. Бу күннэргэ халлаан эмискэ сылыйан, ардах түһэн дьону соһутта. Онтон сылтаан муус кэбирээһинэ түргэтиир. ГИМС инспиэктэрдэрэ мууска уонна уу эбийиэктэригэр нэһилиэнньэҕэ сэрэхтээх буолууну өйдөтөр-сэрэтэр рейдэлэрин күүһүрдэллэр.

Өрөспүүбүлүкэ үгүс улуустарыгар сайыҥҥылыы ардах түһэн олохтоох дьону соһутта. Саха сиригэр кулун тутарга ардах түһүүтэ эриэккэс көстүү. Ол эрэн учуонайдар этэллэринэн манна киһи соһуйара туох да суох. Бу килиимэт уларыйыыта уонна сис былыттар кэлиилэриттэн буолар. "Инники да сылларга маннык көстүү баара. Улахан сис былыттар кэллэхтэринэ эрдэ ардыан сөп. Сылыйыыттан эрэ буолбакка урут да олус сэдэхтик баар буолааччы", - диэн ирбэт тоҥу үөрэтэр институт дириэктэрин солбуйааччы, георгафическэй наука дуоктара Александр Федоров этэр.

Халлаан лаппа сылыйан, муус эмиэ кэбирээтэ. ГИМС инспектордара мууска сэрэхтээх буолууга туһуламмыт анал рейдэлэрин күүһүрдэллэр. Ол курдук дьон сөбүлээн тоҕуоруһа сылдьар сиригэр мууһунан оҥоһуллубут оонньуур сирдэргэ сэрэхтээх буолууну оҕолорго кэпсииллэр. Бу нэдиэлэҕэ оҕолор каникуллара буолан сынньалаҥнарын үксүн таһырдьа атаараллар.

Дьокуускай куорат эргин куйуурдааччылары эмиэ сэрэтэллэр. Көҥүллэммэтэх сиргэ тахсан балыктыыр бобуулааҕын уонна кутталааҕын санаталлар. Аны мантан саас муус чарааһаабытын кэнниттэн сүрүн болҕомто кинилэргэ ууруллуо. Хас сылын ахсын сүүһүнэн киһи быраабыланы тутуспатыттан сылтаан балыксыттар бэйэлэрэ араас таһымнаах эчэйиилэри ылаллар. Ол эрэн билигин муус халыҥ, куйуурдааһын көҥүллэнэр.

Захар Колодезников, Дьокуускай куорат олохтооҕо: "Сааскы ылааҥы күннэр турбуттарынан эбэбитигэр тахсан балыктыы олоробун. Билиҥҥитэ хаптара иликпин. Муус халыҥа 1,5 миэтэрэҕэ чугаһыыр эбит".

Билиҥҥи туругунан өрөспүүбүлүкэ үрдүнэн 51 кыһыҥҥы муус суоллара үлэлии тураллар. Ол курдук 5 федеральнай суолталаах, 4 суол өрөспүүбүлүкэ бас билиитигэр уонна 41 муниципальнай суоллар. Ол эрэн сорох суоппар бу анал көҥүллэммит сирдэринэн буолбакка, өрүһү, үрэҕи туоруурга анамматах сирдэринэн туорууллара бэлиэтэнэр, кинилэргэ административнай протокол, ыстыраап түһэриллэрин санаталлар.

Майя Алексеева, ЫБММ алын суудуналарга иниспиэксийэ салайааччыта: “Көҥүллэммэтэх сиринэн туораабыт дьон административнай миэрэҕэ тардыллаллар. Ол курдук чааһынай сирэйдэр 3000-5000 солкуобай, онтон дуоһунастаах сирэйдэр 20000-30000 солкуобайга дылы уонна юридическэй сирэйдэр муҥутаан мөлүйүөҥҥэ диэри ыстараапка тардыллыахтарын сөп”.

Саха сиригэр баар кыһыҥҥы муус суоллар үксэ, быһа барыллаан этэллэринэн, муус устар 15 күнүттэн сабыллыахтара. Онтон хоту улуустарга күн-дьыл туругуттан көрөн муус устар бүтүүтэ сабыахтарын сөп.

 Муус устар 3 күнүттэн Дьокуускай – Аллараа Бэстээх хайысханан уйугу 30 туоннаҕа диэри түһэриэхтэрэ. Онтон 10 чыыһылаҕа 20 туоннаҕа диэри уонна муус устар 15 толору сабыахтара.