Төрүөх үгэнэ

Кыстык түмүктэнэрэ икки ый хаалла. Бүгүҥҥү күҥҥэ өрөспүүбүлүкэ үрдүнэн  170 тыһыынчаттан тахса төбө ынах-сүөһү кыстаан турар.  Онтон ыанар ынаҕын ахсаана 70 тыһыынчаттан тахса. Билигин ынах маассабай төрөөһүнэ буола турар. Хаһаайыстыбаларга номнуо 13 тыһыынчаттан тахса ньирэй төрөөтө. Ааспыт сылы кытта тэҥнээтэххэ төрөөһүн көрдөрүүтэ куһаҕана суох. Күөххэ үктэнэргэ, ыам ыйа бүтүөр диэри, тиийэр от баар. Бу туһунан тыа хаһаайыстыбатын министиэристибэтигэр иһитиннэрэллэр. 

Саха сирин үрдүнэн уһун тоһуттар тымныылар бүтэннэр, билигин ынах-сүөһү төрөөһүнүн үгэнэ. "Туймаада" хаһаайыстыба үлэһиттэрэ билигин саамай эппиэтинэстээх кэмнэрэ. Түүннэри-күнүстэри хороҕор муостаахтар төрүүллэрин маныыллар. Күн бүгүн хаһаайыстыбаҕа уопсайа 109 ньирэй төрөөн турар.

Татьяна Иванова, биригэдьиир: "Саҥа төрөөбүт ньирэйгэ 15 хонук ийэтин үүтүн иһэрдэбит. Онтон уопсай үүккэ көһөрөбүт. Ньирэйдэр туруктара үчүгэй, күҥҥэ үстэ аһатабыт. Онтон ыйдарын туоллахтарына бороһуок үүккэ көһөртүүбүт".

Улахан хаһаайыстыбаҕа тарбыйах ийэтин кытта сылдьара кыаллыбат буолан. Саҥа төрөөбүт ынах оҕотун көрдөөн аймаммыт диэн, ньирэйи ийэтиттэн тутатына арааран туспа туруораллар.

Саҥа төрөөбүт ньирэйдэри инфрокраснай лаампа анныгар биэс күн туруортууллар. Оччоҕо тарбыйах куурар итиэннэ туһааннаах Д битэмиини ылар.

Сүрүннээн төһө да тымныы кыһын ааспытын иһин хаһаайыстыбалар бары кэриэтэ кыстыгы этэҥҥэ түмүктүүргэ бэлэмнэр. Астарын саппааһа элбэх, билигин ходуһаларга ордубут отторун тиэйии салҕанар.

Николай Шергин, хаһаайыстыба салайааччыта: "Ааспыт сайын 1100 туонна оту бэлэмнээбиппит уонна 800-чэкэ туонна сиилэс уурбуппут. Онтубут кыстыкка тиийэр. Быйыл кыһын сүөлэр этэҥҥэлэр".

Быйыл кыстыкка өрөспүүбүлүкэ үрдүнэн 180-тан тахса тыһыынча ынах киирэн турар. Хаһаайыстыба ааспыт сайын бэлэмнээбит отуттан күн бүгүн  40-ча быраһыана хаалан турар. Ынахтар күҥҥэ 3-тэ аһыыллар, ол курдук аҥардас от эрэ буолбакка, араас иҥэмтиэлээх эбии аһылыгы сииллэр.

Дмитрий Шахурдин, зоотехник: "Биир төбө күҥҥэ 25 киилэ сиилэс, 7 киилэ от уонна 5,5 киилэ  сенаж сиир, ону таһынан 6 киилэ комбикорм. Кыстык саҕаланыаҕыттан ити курдук аһаан тураллар".

Саха сиригэр билиҥҥи туругунан ыанар ынах ахсаана 74619 төбө. Маассабай төрөөһүн дьэ саҕаланан күн-бүгүн төрүөх ахсаана 13 аҥар тыһыынчаҕа тэҥнэстэ, ол уопсай төрүөхтээх ынахтан 18 быраһыана туолла. Сүрүннээн ынахтар муус устар устата төрөөн бүтүөхтээхтэр. Онтон кыстык бүтүө 63 хонук хаалла, сүөһү аһын саппааһа элбэх, онон кыстык этэҥҥэ түмүктэниэ диэн тустаах исписэлиистэр иһитинн эрэллэр.     

Александра Петрова, СӨ ТХМ сүөһү иитиитигэр департаменын сүрүннүүр исписэлииһэ: "Өрөспүүбүлүкэ үрдүнэн оппут саппааһа 158 тыһыынча туонна. Ол аата бэлэмнэммит от уопсай кээмэйиттэн 40% хаалан турар. Онтон сиилэспит 50% уонна сенажпыт 32% хаалла".

Ааспыт сайын кэккэ биричиинэнэн былааннарын толорботох улуустарга Өрөспүүбүлүкэ иһиттэн 50-тан тахса тыһыынча оту булан бэлэмнээбиттэр. Инники сылларга курдук тастан от киирбэтэ. Күн бүгүн отторо тиийбэт улуустарга көмө быһыытынан тиллиэхтээх оттон 85 быраһыана туолла, билигин хаалбыт 15 быраһыаны миэстэтигэр тиэрдэргэ үлэ ыытыллар.