Саха тыйаатыра саҥа туруоруулары бэлэмниир

Өрөспүүбүлүкэҕэ тыйаатыр күнүн сыллата киэҥ далааһыннаахтык бэлиэтииллэр. Бүгүҥҥү күҥҥэ Саха сиригэр 11 тыйаатыр баар, манна уопсайа 10 тахса тыһыынча кэриҥэ үлэһит култуура эйгэтигэр үлэлии-хамсыы сылдьар. Театр Аан дойдутааҕы күнүн чэрчитинэн үгэс быһыытынан Дьокуускайга култуура уонна искусство үлэһиттэрин  чиэстээтилэр. Маны тэҥэ, араас тэрээһиннэр буоллулар.

Бу күннэргэ Саха сирин култууратын уонна искусствотын деятеллэригэр судаарыстыбаннай наҕараадалары туттардылар. Ол курдук "Саха норуодунай артыыһа" үрдүк ааты СӨ үтүөлээх артыыһа Мария Николаева ылла.

Мария Егоровна култуура эйгэтигэр үлэлээбитэ 50-тан тахса сыл буолла. Кини күн бүгүҥҥээҥҥи диэри саха тыйаатарыгар айымньылаахтык, бэриниилээхтик үлэлээн кэллэ.

Мария Николаева, саха норуодунай артыыһа,  П.А. Ойуунускай аатынан саха тыйаатырын артыыһа: "1966 сыллаахха Щепкин аатынан театральнай училищены бүтэрбитим. Бииргэ үөрэммиттэр бары тутуспутунан кэлэммит  Ньурбаҕа тыйаатыр аспыппыт. Онтон алта сыл буолан баран Саха тыйаатырыгар кэлбитим. Култуура үлэһитэ дьону туохха эрэ үчүгэйгэ тардыахтаах дии саныыбын".

Тыйаатыр күнүн көрсө артыыстар өр сылларга саха тыйаатарын дириэктэринэн үлэлээбит, СӨ үтүөлээх артыыһын Степан Емельянов үрдүк аатын санаан, ахтан ыллылар.  Олорбут дьиэтигэр өйдөбүнньүк бэлиэ туруордулар. Степан Иннокентьевич саха тыйаатыра сайдарыгар сүҥкэн кылааты киллэрсибиттэртэн биирдэстэрэ буолар.

Анатолий Николаев, РФ үтүөлээх артыыһа, саха норуодунай артыыһа: "Степан емельянов биһиги тыйаатырбытын өрө таһаарбыт киһи. 1983 сылтан 1998 дириэктэрдээбитэ. Ити кэмҥэ биһиги тыйаатырбыт бастакы Сэбиэскэй сойуус судаарыстыбаннай бириэмийэтин ылбыта, дойду таһыгар бастакы гастролларыгар сылдьыбыта. Маны сэргэ 1985 сыллаахха Москва куоракка улахан гастролу тэрийбитэ. Ону барытын тэрийсибит киһибит Степан Иннокентьевич Емельянов".

Былатыан Ойуунускай аатынан саха тыйаатыра быйыл көрөөччүлэригэр элбэх саҥа туруорууну бэлэмнээтэ. Артыыстар киин улуустартан гастролтан айаннаан кэлэн, аны саҥа туруорууга бэлэмнэнэллэр. Муус устар ыйга көрөөччүлэргэ Далан айымньытынан "Тулаайах оҕо" испиктээги көрдөрүөхтэрэ. 

Руслан Тараховскай, П.А. Ойуунускай аатынан саха тыйаатырын режиссёра: "Муус устар 27 күнүгэр саҥа туруоруубут тахсыаҕа. Далан төрөөбүтэ 95 сылыгар уонна Өрөспүүбүлүкэ күнүгэр анаан “Тулаайах оҕону” бэлэмниибит. Ол кэннэ Дмитрий Коркин туһунан испиктээкили Сергей Потапов туруоруохтаах. Салгыы “Дархан Уус” диэн туруоруунан Навруз диэн фестивальга кыттыахтаахпыт".

Быйыл Саха сиригэр  култуура министиэрстибэтэ тэриллибитэ 70 сылын бэлиэтиир. Онон быйылгы сыл култуура үлэһиттэригэр уонна көрөөччүлэргэ ураты ис хоһоонноох сыл.