Муниципальнай тэриллиилэр сэбиэттэрин IX сийиэһэ ыытылла турар

34

Дьокуускайга муниципальнай тэриллиилэр сүбэлэрин уонна бэрэстэбиитэллээх уорганнарын депутаттарын сийиэһэ ыытыллар. Бүтүн нэдиэлэ устата араас хабааннаах киэҥ тэрээһиннэр буолуохтара. Өрөспүүбүлүкэ үрдүнэн - нэһилиэктэртэн, улуустартан барыта 500 киһи кыттар. Сүрүн болҕомтону олох-дьаһах хайысхаларын сайдыытыгар, чуолаан тыа хаһаайыстыбатын, экология, бэйэни салайыныы, үөрэҕирии, дьиэ кэргэн, оҕону иитии боппуруостарыгар ууруохтара.

Муниципальнай тэриллиилэр бэрэстэбиитэллээх уорганнарын депутаттарын бастакы сийиэһэ алта сыллааҕыта 2017-ҕэ ыытыллан турар. Онтон 2020 сыллаахха ыытыллыахтааҕын пандемиянан  көһөн бу саҥа тэриллиннэ. Саха сирин улуус уонна нэһилиэк таһымнаах депутаттарын бу иккис улахан түмсүүлэрэ буолар.

Алексей Винокуров, Нам улууһун депутаттарын сэбиэтин бэрэссэдээтэлэ: "Бу сийиэстэн биһиги элбэҕи кэтэһэбит уонна эрэйэбит. Тоҕо диэтэххэ бу тэриллибит былаһааккалар бары хайысхаларга күүстээхтик үлэлиэхтээхтэр. Инновационнай менеджмент үрдүкү оскуолата эдэр баһылыктары уонна депутаттары үөрэтэр. Бу кинилэр инники үлэлэригэр олус туһалаах буолуо дии саныыбын".

Депутат дьонун-сэргэтин итэҕэлин уонна эрэлин сүгэн сылдьар киһи буолар. Кини улууһун уонна нэһилиэгин күннээҕи олоҕун-дьаһаҕын, кэскилин баһылыгын кытары тэҥҥэ түстэһэр эппиэтинэстээх. Онон сийиэс сүрүн сыала-соруга улуус уонна нэьилиэк депутаттарын статуһун үрдэтиигэ туһуланар. Нэдиэлэ устата сийиэс чэрчитинэн араас тэрээһиннэр ыытыллаллар. Ол курдук төгүрүк остуоллар, керсүһүүлэр, куурустар, сессиялар, семинардар.

Юрий Дьяконов, Нам улууһун Хатырык нэһилиэгин баһылыга: "Бу иикс сийиэһим буолар. Бастакыга эмиэ кыттыыны ылбыппыт. Хомойуох иһин, хамсыгынан сибээстээн тохтоон дьэ бу саҥа буолан эрэр иккис сийиэс. Бу сийиэстэн биһиги сүрдээх элбэҕи ылабыт. Бэйэбит интэриэһиргиир хайысхаларбытыгар кыттыһан үлэлэһэбит".

Нэһилиэктэртэн, улуустартан барыта 500 киһи кыттар. Депутаттар сийиэстэрин тэҥэ улуус сүбэлэрин 9 сийиэһэ эмиэ ыытыллар. Мунньахха сүрүн болҕомтону олох-дьаһах хайысхаларын сайдыытыгар, чуолаан тыа хаһаайыстыбатын, экология, бэйэни салайыныы, үөрэҕирии, наука, дьиэ кэргэн, оҕону иитии боппуруостарыгар ууруохтара. Дмитрий Габышев Өлүөхүмэ улууһун Троицкай нэһилиэгин баһылыгынан талыллан ааспыт күһүҥҥүттэн үлэлиир.

Дмитрий Габышев, Өлүөхүмэ улууһун Троицкай нэһилиэгин баһылыга: "Нэһилиэкпит кыра, күн бүгүн 300 киһи олорор. Сүрүннээн тыа хаһаайыстыбатынан, булдунан, балыгынан дьарыктанабыт. Нэһилиэкпитигэр суотабай сибээс киирбитэ, онтон билигин оптоволокно ситимэ киирэрин күүтэбит. Маны сэргэ Өлүөхүмэ улууһун гаастааһын былааныгар киирбиппит, онон күөх төлөн кэлиитин нэһилиэнньэ олус диэн кэтэһэр".

Ил Түмэн уонна улуус, нэһилиэк депутаттара хардарыта бииргэ үлэлээһиннэрин концепциятын уонна резолюциятын бастакы сийиэскэ ылыммыттара. Онон тыа сирин депутаттара Ил Түмэни кытта ыкса ситимнээхтик норуот туһа диэн үлэлииллэр. Оттон киэҥ тэрээһин бээтинсэ күн «Түмүү» диэн сиэр-майгы бигэ туруктаах буолуутугар анаммыт общественность кыттыылаах мунньаҕынан түмүктэниэҕэ.