"Мин сулуһум" инклюзивнай муода тыйаатырдарын бэстибээлэ ыытылынна.

Искусство кэрэ эйгэтигэр уһуйуллар оҕолор истэригэр өрөспүүбүлүкэтээҕи "Мин сулуһум" инклюзивнай муода тыйаатырдарын бэстибээлэ ыытылынна. Бу күрэхтэһиини иккис сылын өрөспүүбүлүкэтээҕи истибэт оҕолор оскуолалара тэрийэн ыытар.  Быйылгы күрэххэ 100-тэн тахса оҕо кэлэн бэйэлэрэ тикпит таҥастарын уонна эскизтарын көрдөрдүлэр.

Айар куттаах, иискэ дьоҕурдаах оҕолор бэйэлэрэ тиктибит таҥастарын симэнэн, муода көрдөрөллөр. Инклюзивнай муода тыйаатырдара билиҥҥи кэмҥэ сайданнар, элбээннэр бу бэстибээлгэ 14 улуустан кэлэн кытта сылдьаллар. Билиҥҥи оҕо оскуола пуорматын хайдах көрөрүн, күннээҕи олоххо-дьаһахха туттуллар таҥас хайдах буолуохтааҕын эскизтаан, тигэн үлэлэрин киэҥ эйгэҕэ таһаараллар.

Оксана Винокурова, өрөспүүбүлүкэтээҕи истибэт оҕолор оскуолаларын дириэктэрэ: "Бу маннык оскуола иһинэн үлэлиир муода тыйаатырдарын хас биирдии оскуолаҕа көрүөхпүтүн баҕарабыт. Тоҕо диэтэр оҕо кыра сааһыттан тутта-хапта сылдьарга үөрэннэҕинэ истиилгэ, үчүгэй быһыыга-майгыга үөрэнэнэн олоҕун тухары туһанар".

Муода тыйаатырын күрэхтэһиитэ 4 көрүҥҥэ арахсар. Ол курдук "оскуола пуормата", "авангард", "киэһээҥҥи таҥас" уонна "национальнай көстүүм" буолаллар. Хас биирдии хамаанда ураты буочардаах, туспа көрүүлээх, үрдүк маастарстыбалааҕын мустубут дьон сэҥээрэ көрдүлэр.

Юлия Алексеева, өрөспүүбүлүкэтээҕи истибэт оҕолор оскуолаларын технологияҕа учуутала, бэстибээл тэрийээччитэ: "Манна доруобуйаларыгар хааччахтаах оҕолору кытары доруобай оҕолор тэҥҥэ күрэхтэһэллэр. Бу биһиги үөрэнээччилэрбитигэр уопут атастаһыыта буолар. Инники олохиторугар бары биир тэҥник сырыттыннар диэн бэлэмнээһин".

Хас биирдии таҥаһы, оҥоһугу оҕолор бэйэлэрэ оҥорбуттар. Оскуолаларын иһинэн үлэлиир муода тыйаатырдарыгар, куруһуоктарыгар сылдьан ылбыт сатабылларын, билиилэрин бу күрэххэ аҕалан тургутан көрөллөр. Кинилэр тигээччи, оҥорооччу эрэ буолбакка, сыанаҕа тахсан модель эмиэ буолаллар.

Дели Иванов, өрөспүүбүлүкэтээҕи истибэт оҕолор оскуолаларын 12-с кылааһын үөрэнээччитэ, күрэх кыттыылааҕа: "Мин туос оҥоһуктары оҥорор куруһуокка сөбүлээн сылдьабын, 5-с кылаастан саҕалаан утумнаахтык дьарыктанан араас күрэхтэргэ кыттарбын ордоробун. Бу хаалтыһы мин бэйэм оҥорбутум. Аан бастаан туоһу ылан ыраастыыбыт уонна оһуордарын уруһуйдаан баран наадата суоҕун быһан быраҕабыт. Марилканан кырааскалаан баран, кыракый киэргэллэри сыһыарабыт, онон бүтэр".

Эскизтар күрэхтэригэр сүрүннээн оҕолор кэтэхтэн олорон кыттыбыттар, уопсайа 90-тан тахса үлэ киирбит. Дьүүллүүр сүбэ бэлиэтииринэн, былырыыҥҥыны кытары тэҥнээн көрдөххө, быйыл аныгы технологиянан туһаммыт оҕо элбэх, аны оҕолор мээнэ кумаахыга эрэ уруһуйдааһын буолбакка, графическай уруһуйу баһылыыр буолбуттар.

Надежда Кривошапкина, эскизтар күрэхтэрин сүрүн судьуйата: "Тыһымнара үрдүк. Араас интэриэһинэй үлэ элбэх. Онон сыаналыырга уустук буолара буолуо. Үксүн акварель кыраасканы туһанан эскизтары уруһуйдаабыттар уонна аҕыйах графическай үлэлэр бааллар".

Оҕолор бары тэҥҥэ алтыһан, доруобуйаларынан хааччахтаах диэн арахсыбакка, уопут атастаһалларыгар туһуламмыт күрэх буолар. Инникитин идэлэрин талалларыгар бу маннык хабааннаах тэрээһиннэр төһүү күүс буолаллар.