Айар куттаах Айаров

Өймөкөөн улууһун Уус Ньаратыгар тарбаҕар талааннаах маастар Дмитрий Айаров олорор. Оскуола эрдэҕиттэн сөбүлээн дьарыгырар уһаныыта күн бүгүҥҥэ диэри аргыс буолан сылдьар. Маастар араас оҥоһуктары бэйэтигэр эрэ буолбакка, дьоҥҥо эмиэ оҥорор.  

Сунтаар улууһун Тойбохойуттан төрүттээх, УусНьараҕа олохсуйбута ыраатан, билигин бэйэтин "Өймөкөөммүн" дэнэр "маһы ыллатар", айар куттаах Дмитрий Айаров өссө биир оҥоһугун чочуйар. Кини илиититтэн бу сыллар тухары мастан, сэлии муоһуттан, аһыытыттан, тайах муоһуттан үгүс элбэх сиэдэрэй, сахалыы тыыннаах оҥоһуктар тахса тураллар. Оттон бу дьарык оскуола кэмнэриттэн саҕаламмыта

Дмитрий Айаров, маастар: "Оскуолабытыгар “Умелые руки” диэн куруһуок баара. Онно 5 кылаастан сылдьыбытым. Учууталым Нюрбина Петровна уруһуйга, чеканкаҕа уһуйар этэ. Мин “Манчаары” диэн чеканка оҥорбутум уонна хамаанданан чаппараах тикпиппит Москваҕа ВДНХ-ҕа баран миэстэлэспитэ".

Ол түгэнтэн Дмитрий Ильич кыннаттанан, сөбүлүүр дьарыгар улугумнук ылсыбыта. Уһаныы ымпыгын барытын билэн-көрөн, үөрэнэн,  билиитин кэҥэтэн, билигин бэйэтэ туспа буочардаах маастар.

Биллэн туран, бу курдук сиэдэрэй оҥоһуктары олоххо киллэрэргэ, күүс-көмө наада. Дмитрий Ильичка  кэргэнэ Елена Дмитриевна өйөбүл буолан, минньигэстик тото-хана аһатан, күүһүгэр күүс эбэн, айар аартык саҕылла турар.

"Биһиги Уус Ньараҕа кэлэн баран билсибиппит. Онтон холбоспуппут, икки оҕолоохпут. Кинилэр номнуо улаатан үлэһит буолан барбыттара. Дмитрий үлэтиттэн иллэҥ буолла эрэ уһаммытынан барар. Онон иккиэн сөбүлүүр дьарыктаахпыт", - диэн Дмитрий кэргэнэ Елена Дьяконова үллэстэр.

Дмитрий Ильич төһө да сөбүлүүр дьарыктаах буоллар, сүрүн үлэтигэр үлэлиирин тохтоппот. Кини Өймөкөөннөҕү дьиэ кэргэҥҥэ иитиигэ көмөнү оҥорор кииҥҥэ үлэлиир. Онно оҕолору эмиэ, бастакы учууталын Нюрбина Петровна курдук, уһаныы эйгэтигэр сыһыарар. Уолаттары кыһарга, уһанарга үөрэтэр-такайар. Билигин кини үлэтэ өссө икки бүк элбээн турар. Бу сайын буолаары турар Олоҥхо ыһыаҕар кини саха мааныылаах иһиттэрин - чорооннору чочуйар.

"Оҕо дьиэтин иитиллээччилэрин Олоҥхо ыһыаҕар илдьиэхтээхпит. Онно оҕолорум кымыс амсайалларыгар анаан чороон оҥортуу сылдьабын", - диэн Дмитрий астына санаатын үллэстэр.

Айылҕа уһанар дьоҕуру дэҥҥэ иҥэрэр буоллаҕа. Киһи барыта уус буолан төрөөбөт. Ол иһин айар доҕурдаах Айаров, туйаҕын хатаараччылары уһуйан, эмиэ маска, муоска сыһыарар былааннаах.