Сөбүлүүр дьарыктан дохуот

Бэйэ дьыалатынан дохуот. Өймөкөөн улууһугар аччыгый бизнеһы олохтоохтор сайыннараллар. Уус Ньара олохтооҕо Тамара Федорова көстүүнэй уонна иис дьыалатын арынан үлэлиир-хамсыыр. Дьиэ кэргэн дьоҕус бизнеһа сыллата сайдар, кэҥиир.

Уус Ньараҕа 7 сыллааҕыта Аартыктан көһөн кэлбит Тамара Федорова, ытык сынньалаҥар тахсан баран, таах быар куустан олорбокко, бэйэ дьыалатын арынарга санаммыт. Санаммыт санаатын олоххо киллэрэр сорук туруоран, түргэн баҕайытык  көстүүнэй арыммыт.

Тамара Фёдорова, эргиэмсик: "Көстүүнэйбит 36 миэстэлээх. Хас хос аайы телевизор, интернет баар. Хостор 2-3 миэстэлээхтэр. Онтон элбэх миэстэлээххэ үксүн “Артыаллар” тохтууллар. Кыһыҥҥы тымныы ыйдарга дьон аҕыйыыр, онтон олунньуттан саҕалаан наар толору буолабыт".

Тамара Егоровна бу дьыалатын соҕотох арымматах, күүс -көмө, өйөбүл буолар дьоно - кэргэнэ уонна уола. Дьону көрсөөһүнү, көстүүнэйи хомуйууну, сууйааһыны-тарааһыны Федоровтар дьиэ кэргэн бары бииргэ оҥороллор.

Маны тэҥэ кыратык иллэҥсийдэ да, Тамара Егоровна иис абылаҥар ылларар. Бэйэ дьыалатын арыныан иннинэ кини оскуолаҕа эбии үөрэхтээһиҥҥэ үлэлии сылдьыбыт. Оҕолору иискэ, сиэлгэ сыһыаран үгүс куонкурустарга, күрэхтэргэ кыттыбыт.

"Оҕо эрдэхпиттэн иистэнэрбин олус сөбүлүүбүн. Иннэни туппатым эрэ тугум эрэ тиийбэт курдук буолар. Билигин эскизтарбын балтыларым оҥорон көмөлөһөллөр. Оҕолору сиэлинэн хатыыга, өрүүгэ үөрэппитим. Олус элбэх үөрэнээччи сэҥээрэн сылдьыбыта. Онтон биир кыыһым хас да научнай кэмпириэнсийэҕэ кыттан ситиһиилэрдэммитэ. Ону тэҥэ “Хотугу сулус” күрэххэ кыттан бастаабыппыт, Москва, Санкт-Петербург куораттарга эмиэ куонкуруска кыттан бастаан турардаахпыт", - диэн Тамара Егоровна киэн тутта кэпсиир.

Дьэ, бу курдук эргиччи талааннаах Тамара Федорова төрөөбүт Өймөкөөнүн сайдарыгар бэйэтин кыра кылаатын киллэрэ сылдьар.