Аммалар сылгыһыт күрэҕэр бастаатылар

Быйылгы өрөспүүбүлүкэтээҕи сылгыһыт күрэҕин кыайыылаахтара ааттаннылар. Сыл бастыҥ тэрээһинэ Амма улууһугар ыытылынна. Манна уопсайа 11 улуус түөрэм туйахтааҕа илин кэлин түһүстэ. Итини сэргэ дьөһөгөй оҕотун быыстпаката, атыыта, сылгыны иитии боппуруостарын тула мунньах ыытылынна.

Саха бастыҥ сылгылара уонна ат миинээччилэрэ. Аммаҕа өрөспүүбүлүкэтээҕи сылгыһыт күнүгэр анаан саха сиригэр сылгыны иитиинэн дьарыктанааччылар уонна сэҥээрээччилэр муһуннулар. Быйылгы сылгыһыт күрэҕэ уопсайа 11 улуустан 19 хамаанданы түмтэ.

Ион Кононов, Амма улууһун тыа хаһаайыстыбатын салалтатын салайааччы: “Амма чугас буолан кыттаааччы ахсаана элбэх. Хамаандалар бары бэлэмнэрэ үрдүк диэн бэлиэтиибин. Орто Халыматтан уонна Өймөкөөнтөн племенной хаһаайыстыбалар сылгыларын аҕалбыттара быыстапка таһымын үрдэттэ, ыраахтан кэлбит саха маанылаах кыыллара бырааһынньыгы киэргэттилэр. ”

Күрэхтэһии эстафета быһыытынан барда, кыайыылааҕы ким төһө түргэнник кэлбитинэн быһаардылар.

Ол эрэн төһө түргэнник кэлбиттэринэн эрэ буолбакка, хас биирдии түһүмэҕи төһө сөптөөхтүк ааспыттарын эмиэ көрөллөр. Хас  сыыһа аайы 5 сөкүүндэ эбиллэр, онон хаачыстыба эмиэ улахан оруолу оонньуур. Сылгыһыт сатабылын, үөрүйэҕин тургутар тэрээһин кыттааччыттан үрдүк болҕомтону уонна сэрэҕи эрэйэр. Сылгы үрдүттэн сууллан түһэн атын куоттарбыт кыттааччылар эмиэ бааллар.

Быйылгы күрэхтэһии бириистэрин уопсай сууммата 5 мөлүйүөҥҥэ тэҥнэһэр. Үһүс миэстэҕэ "бураан", иккискэ УАЗ массыына онтон кыайыылаах "Бөлөрүүс" тыраахтары уонна 2 мөлүйүөн солкуобайы ылар. Ол курдук тыҥааһыннаах киирсии түмүгүнэн Амма улууһун бастакы хамаандата, "ДАВИДОФФ" хааччахтаммыт эппиэтинэстээх тэрилтэ муҥутуур кыайыылаах буолан таҕыста.

Анатолий Баишев, күрэх кыайыылааҕа: "Кыайыы кэлбититтэн олус диэн үөрэн турабын. Бэккэ кытынныбыт, ол эрэн икки сиргэ кыра алҕастар тахсыталыы сырыттылар. Ол курдук сылгыбыт халтарыйан ылла уонна дьон үмүөрүһэн турар сириттэн сиргэннэ. Сүүйбүт тыраахтарбытын сайын окко туһаныахпыт".  

Бу күн быыстапкаҕа турбут сылгылар эмиэ күрэхтэстилэр. Ол курдук бастыҥ саха сылгыта ааты ыраах Өймөкөөн улууһуттан кэлбит "Чолбон" диэн ааттаах сылгы ылла. Көрөөччүлэр күрэхтэһиини төһө да тымныытын, тыаллааҕын аахсыбакка сэҥээрэ, тиһэҕэр диэри көрөн дуоһуйдулар.

Сылгыһыт күнүн 2017 сылтан саҕалаан бэлиэтиир буолбуттара. Онтон ыла хас сылын ахсын өрөспүүбүлүкэ сылгыһаттара бу күн мустан уопут, санаа атастаһар, күрэхтэһэр бырааһынньыктара буолбута.

Руслан Федотов, СӨ ат сүүрдүүтүн спордун Федерациятын президенэ: "Сылгыһыт күрэҕэр үгүс киһи мустубута, элбэх хамаанда кыттыбыта дьөһөгөйбүт оҕотугар сүгүрүйэрбитин, өрө тутарбытын уонна түмсүүлээхпитин көрдөрөр. Маннык тэрээһиннэр тыа сирин дьонугар сүрдээх көмө буолаллар".  

Ону тэҥэ Амма улууһугар сүөһү аһын бэлэмнээһининэн дьарыктанар хаһаайыстыбаларга уопсайа 11 саҥа "Бөлөрүүс" тыраахтардары туттаран тэрээһини өссө киэргэттилэр.