Уус Ньаратааҕы киин дьиэ кэргэн сылаас тыынын солбуйар

2018 сыллаахтан Өймөкөөннөҕү дьиэ кэргэҥҥэ иитиигэ көмөнү оҥорор кииҥҥэ олорор Сергей Кривошапкин бииргэ олорор дьиэ кэргэнигэр сарсыардааҥҥы чэбдигирдэр дьарыгы оҥотторор. Уол оҕо эдьийин кытары олох ыарахан очуругар оҕустаран, 5 сыллааҕыта Уус Ньаратааҕы оҕо киинин булбута. Билигин Сергей манна күн солото суох киһи. Кини үөрэҕин кэнниттэн сөбүлүүр тустуутугар сүүрэр.

Сергей Кривошапкин, Өймөкөөннөҕү дьиэ кэргэҥҥэ иитиигэ көмөнү оҥорор киин иитиллээччитэ: "Тустууга сылдьабын. Тренербыт Дьулустаан Гаврильевич диэн. Үгүстүк араас күрэхтэһиилэргэ сылдьабыт. Ол курдук Дьокуускай, Пятигорск уонна Биробиджан куораттарга күрэхтэһиилэргэ кыттыбытым. Онно 3 миэстэлэри ылбытым".

Күн бүгүн Өймөкөөннөҕү дьиэ кэргэҥҥэ иитиигэ көмөнү оҥорор кииҥҥэ Сергей Кривошапкин курдук  уопсайа 23 оҕо 5 дьиэ кэргэнинэн хайдан быр бааччы олороллор. Манна өрөспүүбүлүкэ бары муннугуттан иитиллэччилэр кэлэллэр. История кэрэһэлииринэн, аан бастаан 1947 сыллаахха Өймөкөөн улууһун Өймөкөөнүгэр бастакы оҕо дьиэтэ арыллыбыта. Ол кэнниттэн 1960 сыллаахха бу дьиэ оройуон киинигэр көһөрүллэн, билигин өрөспүүбүлүкэҕэ тарбахха баттаннар социальнай хайысхалаах тэрилтэнэн ааҕыллар.

Уус Ньаратааҕы оҕо киинэ өрөспүүбүлүкэҕэ аан бастакынан Гмайнеровскай иитии барылынан үлэлээн саҕалаабыта. Ол эбэтэр дьиэ кэргэнинэн арааран олордууну олоххо Уус Ньаралар киллэрбиттэрэ. Холобура, бииргэ төрөөбүттэр арахсыбакка биир ыалга киирэллэр. 1983 сыллаахтан үлэтигэр бэриниилээхтик, номнуо үтүмэн оҕону алаһа дьиэттэн көтүппүт "Доҕордоһуу" уордьан кавалера, 1995 сыллаахтан оҕо киинин салайааччыта амарах сүрэхтээх Людмила Неустроева бу иитии барыла көдьүүстээҕин тоһоҕолоон этэр.

Людмила Неустроева, Өймөкөөннөҕү дьиэ кэргэҥҥэ иитиигэ көмөнү оҥорор киин салайааччыта: "Бырааттыылар арахсыбакка бииргэ олороллор. Итинник олорбуппут ыраатта, 1990 сылтан дьиэ кэргэнинэн оҕону иитии ньыматыгар көспүппүт. Выкускниктарбыт элбэхтэр. Холобура, мин отучча оҕолоохпун. Онтуларым номнуо улахан дьоннор. Сорохторо 50 саастарын ааспыт дьон. Кинилэр бары кэргэннээх, оҕолоох дьон. Үгүстэрэ үрдүк үөрэхтээхтэр, бары үлэһиттэр".

Биллэн туран, олох ыарахан моһолугар түбэспит кыра дьону көрүү-истии улахан эппиэтинэс. Киин үлэһиттэрэ, кырдьык, үлэлэригэр бэринилээхтик үлэлииллэр. Хас биирдии оҕоҕо улахан болҕомто. Хас да хайысханан. Онно саамай сүрүнэ - уйулҕа чааһа.

Светлана Николаева, Өймөкөөннөҕү дьиэ кэргэҥҥэ иитиигэ көмөнү оҥорор киин педагог-психолога: "Биһиги сүрүннээн уйулҕаны уоскутар ньымалары туһанабыт. Тоҕо диэтэр оҕолорбут бары истиҥ сыһыаҥҥа олус диэн наадыйаллар. Бу ньымаларбыт оҕо бастаан кэлэн баран саҥа усулуобуйаҕа үөрэнэригэр уонна кэлин олоххо бэйэтин миэстэтин булуутугар олус көмөлөһөллөр".

Хас биирдии оҕоҕо төрөппүт наада. Кыра киһи олоҕор - төрөппүт оруола сүҥкэн. Эрэнэбит, Уус Ньаратааҕы оҕо киинин иитиллээччилэрэ, олус үчүгэй көрүүгэ-истиигэ сылдьан, бары этэҥҥэ олох киэҥ аартыгар үктэниэхтэрэ, олохторун суолун сөптөөхтүк тобулуохтара.