Хатаска хас да тутуу тэҥинэн барар

Нэһилиэккэ оскуола салҕааһына уонна спортивнай саала тутуута тэҥинэн барар. Икки эбийиэккэ билигин үлэ тэтимнээхтик барар. Онтон быйыл Саха сиригэр уопсайа барыта 17 оскуола тутуллар, маны сэргэ 3 үөрэх кыһытыгар салҕааһын үлэҕэ киириэҕэ.

Хатас иһэ тутуу тыаһынан тигинээн олорор. Онон нэһилиэк иһэ күө-дьаа. Икки сыллааҕыта тутуллан саҕалаабыт спорт саалата номнуо ыраахтан саһаран көстөр нэһилиэк биир көстүүлээх эбийиэгэ буолбут. Тимир каркаас үлэтэ түмүктэнэн, эркиннэр тураннар, тутааччылар үрдүн бүрүөһүнүгэр киирбиттэр. Икки биригээдэ солбуйсан былааны баттаһыыга түбүгүрэллэр.

Спорт саалата «Физическай култуура уонна спорт сайдыыта» диэн Саха сирин судаарыстыбаннай бырагыраамматынан тутуллар. Эбийиэк уопсай иэнэ 2300 кыбыдыраатынанй миэтэрэ. Манна 400 киһи олорор улахан саалалаах буолуоҕа.

Бу тутууну Хатастар өр сылларга туруорустулар, кэтэстилэр. 2016 сыллаахха аарка саалара умайыаҕыттан эргэ оскуолаҕа дьарыктанан кэллилэр. Ол эрэн дьиэ суоҕун кыһалҕата спортка ситиһии кэлэригэр улахан харгыс буолбата. Усулуобуйа суох диэн олорон биэрбэккэ, түөрт көрүҥҥэ ситиһиилээхтик оҕолору эрчийии барар. Онтон саҥа комплекс үлэлээтэҕинэ үрдүк чыпчааллары дабайыы кыаҕа өссө улаатыа.

Евгений Гоголев, 7№-дээх оҕо спортивнай оскуолатын дириэктэрэ: “Иккис этээскэ улахан дьарыктанар саала уонна тустууктары эрчийэр анал саала баар буолуоҕа. Уопсайынан, Хатаска суох улахан эбийиэк буолуохтаах”.

Бырайыак быһыытынан таһырдьа  саала уҥа өттүгэр дьоҕус стадион тутуллуоҕа. Халлаан сылыйда эрэ манна үлэ саҕаланыаҕа.

Онтон оскуола сыһыарыы тутуутугар дьэ хамсааһын таҕыста. Саҥа бэдэрээдинэй тэрилтэ ананан, үлэ  саҕаламмыта ый кэриҥэ буолла. 3 мэндиэмэннээх 120 миэстэлээх үөрэх кыһатын бэлэмэ күн бүгүн 12% диэн сыаналанар.

Айсен Оросин, тутар хампаанньа прораба: “Бетоммутун аҕаллыбыт, онтубутун арааран саҕалыахпыт. Билигин бетон кутуутугар бэлэмнэнии үлэлэр бара тураллар. Икки биригээдэ үлэлии сылдьар”.

Хатас оскуолатын сыһыарыыта атыттартан уратыта диэн хас мэндиэмэн аайы улахан оскуоланы кытта ситимнэһэр көрүдүөр баар буолуоҕа. Манна 18 үөрэнэр кабинет, остолобуой, спорт уонна аактабай саалалар оҥоһуллуохтара. Оскуола салалтата уонна тутар хампаанньа бииргэ үлэлэһиилэрин түмүгэр бырайыак барыта бигэргэммит.

Николай Слепцов, Хатас орто оскуолатын дириэктэрэ: “Дизайн бырайыагы бэдэрээдинэй хампаанньаны кытта оҥордубут. Ис, тас өттүн бырайыага бигэргэннэ. Ону таһынан сүрүн оскуолабыт быйыл хапытаалынай өрөмүөҥҥэ барар. Онон икки эбийиэк биир көстүүлээх буолуохтара”.

Икки эбийиэк түмүктэнэр болдьохторо бу сыл төрдүс кыбаартала. Онон  Хатас олохтоохторо сыл түмүгэр икки улахан тутууну малааһынныахтара.