Өймөкөөҥҥө бэйэ дьыалатын арыныы сайдар

58

Өймөкөөн улууһугар 90-тан тахса киһи социальнай хантыраагы баттаһан олорор. Судаарыстыбаттан көрүллэр көмө бырагыраамма улууска табыгастаахтык туһаныллар. Өймөкөөҥҥө сөбүлэҥи биир үксүн бэйэ дьыалатын арынарга  баттаһаллар.

Андросовтар дьиэ кэргэн, ыал аҕата Афанасий Андросов уонна ыал ийэтэ Елена Андросова биир сомоҕо буолан, 5 сыл анараа өттүгэр бэйэ дьыалатын арынарга быһаарыммыттара. Ол кэмтэн ыла кэргэнниилэр төрөөбүт Өймөкөөннөрүн киинин бэйэ бородууксуйатынан хааччыйаллар.

Елена Андросова, эргиэмсик: "Дьиэ кэргэн дьыалатын саҕалыырга быһаарыммыппыт. Ол иннинэ кэргэним балык уонна эт атыылыыр этэ. Онтон кэҥиир сыалтан бэлэм эт аһы оҥорон саҕалаабыппыт. Үлэлии-үлэлии өрөбүллэрбэр оҥорорум. Онтон үчүгэйдик ылалларын иһин уурайан, кэргэммэр көмөлөһөргө быһаарыммытым".

Манна улахан төһүү - улуустааҕы социальнай харалта салалтатын нөҥүө социальнай хантыраагы баттаһыы. Андросовтар бэйэ дьыалатын арыналларыгар 300-тан тахса тыһыынчаны  ылары ситиһэн, күн бүгүн кинилэр сыахтаахтар, эт эрбиир оборуудабанньалаахтар уонна кыра маҕаһыын арыйбыттар.

Адросовтар сыахтарыгар оҥоһуллан тахсыбыт кэтилиэттэр, пельменнар, эриллибит эттээх биэрэс уонна да атын бородууксуйалара маҕаһыыннарыгар атыыланар.

Билигин бу лааппыларыгар дьон сырыыта тохтообот, бэйэлэрин төрөөбүт Ньараларыгар оҥоһуллан тахсыбыт бородууксуйаны дьон хамаҕатык атыылаһар. Атыыланар ас-үөл арааһа да киһини үөрдэр.

Афанасий Андросов, эргиэмсик: "Сыл аайы тупсан иһэр. Иэстэрбитин түтэрдибит да диэххэ сөп. Социальнай харалтаттан көмөнү ыыһыыр тэрил ылбытым. Сотору кэминэн онтубун үлэлэтэн маҕаһыыннарга балыктарбын туттарыам. Кыһыҥҥы өттүгэр эт эрбэтэр өҥөнү оҥоробун. Онтон саас шашлык буһаран атыылыыбын. Инниктин сылы эргиччи ыыһыыр былааннаахпын".

Өймөкөөн улууһа бу хайысхаҕа утумнаах үлэни ыытар.  Ол курдук ааспыт 2022 сылга оройуон үрдүнэн уопсайа 92 киһи хантыраак оҥорсубут. Онтон үгүстэрэ чааһынай дьыала арыммыттар, сорохтор кэтэх хаһаайыстыбаҕа анаан ылбыттар, атыттар олох ыарахан очурдарыгар түбэһэн хапсыбыттар. Оттон бу судаарыстыбыннай бырагыраамманан билигин Андросовтар дьиэ кэргэн этэҥҥэ туһана сылдьаллар.

Прасковья Аммосова, Өймөкөөн улууһун социальнай харалтатын салайааччыта: "Бэйэ дьыаланы арынааччыларга бу курдук өйөбүл баара олус үчүгэй дии саныыбын. Маныаха Адросовтар холобур буолаллар. Кинилэр курдук бэйэ дьыалатын арынан ситиһиилээхтик олорор ыал элбииригэр үлэлиибит".

Манна даҕатан этэххэ, тустаах улууска ааспыт сылга социальнай хантыраак нөҥүө илии баттаһан, уопсайа 15 мөлүйүөн солкуобайдаах үлэ ыытыллыбыт. Саҥа сылга эмиэ сайаапкалар киирэ тураллар.