Хатас оскуолатыгар “Профессионалы” чемпионат сүүмэрдиир түһүмэҕэ барар

33

"Профессионалы" диэн Бүтүн Россиятааҕы идэ таһымын көрөр чемпионат регионнааҕы түһүмэҕэ барар.  Бу күрэх быйылгаттан баар буолла, урукку Ворлдскиллс оннугар. Үөрэх тэрилтэлэригэр араас хайысхаҕа арахсан сүүмэрдиир түһүмэхтэр тэтимнээхтик бараллар. Чемпионакка бу сылтан 14 саастарыттан кыттар кыах баар буолла.

Сибэкки дьөрбөтүн үөрүйэхтик тутан-хабан кыргыттар букет хомуйуутугар күрэхтэһэллэр. Флористика -  искусство биир көрүҥэ. Онон бу түһүмэх сатабылы тэҥэ  кэрэни сатаан көрөрү ирдиир. Сүүмэрдиир түһүмэххэ барыта 8 кыыс кыттар. Бастаабыт дойду таһымыгар барар. Онон көрдөххө олус кэрэ, уу налыччы күрэх эрээри олус быһаарыылаах уонна тыҥааһыннаах.  Быйыл кыттааччылар сэттэ араас улуустан кэлбиттэр. Бүлүү Лөкөчөөнүттэн сылдьар Надежда Иванова сааскы дьэрэкээн өҥнөөх сибэккилэри хомуйбут.

Надежда Иванова, "Профессионалы" күрэх кыттыылааҕа: “Розовай, фиолетовай өҥнөрү туһанным. Уонна манна араҕас өҥ барсар диэммин эбэн биэрдим”.

Онтон улуустааҕы таһымҥа бастаан, улууһун Уус Алдан чиэһин көмүскүүр Кэскилээнэ Троева биир бастакынан хомуйан бүтэрдэ. Түргэн -тарҕан туттуулаах кыыс букета олус нарын өҥнөөх, улахан кээмэйдээх. 

Кэскилээнэ Троева, "Профессионалы" күрэх кыттыылааҕа: "Сибэккилэри мин бэйэм олус үчүгэйдик ылынабын. Сайын аайы үүннэрэбин. Кэптэнигэ флористикаҕа сыһыаннаах учуутал баар. Кинилиин ыкса билсэн, маннык үчүгэй күрэххэ кытта сылдьабыт".

Ити курдук бэриллибит кэмҥэ аҕыс араас - араас бэйэ бэйэтигэр маарыннаабат кэрэ букеттар оҥоһуллаллар. Онтон кыргыттар сатабылларын экспертар тута бэлиэтэнэллэр. Манна сүрүннээн хомуйуу техникатын сөптөөхтүк туһаныы сыаналанар.

Станислав Окоемов, эксперт: "Оскуола оҕолоро диэтэххэ үлэлэрэ олус үчүгэй, бэлэхнээхтэрэ көстөр. Букеты хомуйуу анал техниката баар. Холобура, тэҥнии уонна хардары тутан. Мантан биир көрөҥүн туһаммыт буолуохтаахтар. Маны сэргэ букет тас көстүүтүн сыанатын эмиэ көрөбүт".

Хатас оскуолата быйыл "Флористика" диэн хайысхаҕа күрэҕи иккис сылын ыытар. Сыл аайы түһүмэх уларыйар, эбиллэр. Бу үөрэнээччилэр идэҕэ маастарыстыбаларын үрдэтэр сыалтан. Агро-бизнес хайысхалаах оскуола быйыл кытааччылар флористиканы бизнес биир көрөҥүн быһыытынан баһылыылларыгар туһаайыллар түһүмэҕи эптэ.

Диана Васильева, Хатас орто оскуолатын дириэктэри агро хайысхаҕа солбуйааччы: "Быйыл кыттааччылар бэлэмнэрэ үчүгэй диэн көрдүбүт. Быйылгы күрэхпит уратыта – сибэккини атыылыыр түһүмэх киирдэ. Манна кыргыттар табаардарын сааһылаан, сыана быһан, маҕаһыынныы витрина оҥорон күрэхтэһэ сылдьаллар".

Итини сэргэ кыргыттар сүктэр кыыс иилинэр киэргэлин итиэннэ дьоро тэрээһиннэргэ остуол киэргэлин сибэкки дьөрбөтүттэн оҥорон күрэхтэһиэхтэрэ. "Флористика" хайысхатын ыытыллар сиринэн Хатас оскуолата талыллыбыта мээнэҕэ буолбатах. Бу агро үөрэх кыһатыгар сылы эргиччи сибэккини үүннэриигэ наука өттүнэн дьарыктаныы барар. 

Николай Слепцов, Хатас орто оскуолатын дириэктэрэ: “Агро-бизнес оскуола буоларбыт быһыытынан сибэккинэн оҕолор дьарыктаналлар. “АгроКуб” лабораториятыгар ханнык баҕарар үүнээйини клоннааһын, атын суорду таһаарыы усулуобуйата барыта толору баар”.

Бу «Флористика» хайысхатын сэргэ Хатас оскуолата өссө 3 көрүҥҥэ сүүмэрдиир түһүмэҕии тэрийэн ыытыа. Ол курдук "Агрономия", "Сити фермер" уонна быйыл саҥа эбиллибит  "Визаж уонна стиль". Онтон бары хайысхаларга кыайыылаахтар ааттара бу ый 27 күнүгэр биллиэҕэ