Уус Ньараҕа Олоҥхо ыһыаҕар бэлэмнэнэллэр

Быйылгы Олонхо Ыһыаҕа Өймөкөөн улууһун Томтор сэлиэнньэтигэр от ыйын маҥнайгы күннэригэр ыытыллыаҕа. Билигин оройуон тэрээһини үрдүк таһымнаахтык ыытаары бэлэмнэнии үөһүгэр сылдьар. Күн бүгүн нэһилиэктэринэн хайдыһан сорудахтар бэриллибиттэр. Улуус киинигэр Уус Ньараҕа бу хайысхаҕа туох үлэ бара турарый?

Уус Ньаратааҕы "Металлург" култуура киинин иистэнэр сыаҕыгар үлэ күөстүү оргуйар. Өймөкөөн улууһун Томторугар "Көмүс күрүө" этнокультурнай кииҥҥэ, буолаары турар сыл сүрүн тэрээһинигэр бэлэмнэнэн, кулууп дьиэтигэр олбохтор тигилэллэр. Үлэ улахана бүппүт.

Нарыйа Сивцева, "Металлург" култуура киинин методиһа: "Олоҥхо ыһыаҕар анаан олбохтору тиктибит. Закаас быһыытынан 400 устууканы бүтэрдибит. Олбохтор дьыл кэминэн өҥнөөхтөр. Онтон биһиэхэ кыһын түбэспитэ. Онон тыйыс тымныыбытын көрдөрөр күөх өҥнөөх олбохтору тиктибит".

Маны таһынан тустах тэрилтэ үлэһиттэрэ эрэ буолбакка, Уус Ньара олохтоохторо күргүөмүнэн сиэлинэн саламалары сотору кэминэн хатыахтара, араас дьүһүннээх лиэнтэлэри иилиэхтэрэ. Онон билигин бөһүөлэккэ номнуо Олоҥхо ыһыаҕын тыына биллибит.

Уус Ньараҕа биир тарбахха баттанар мас ууһа, маастар, "маһы ыллатар" Дмитрий Айаров эмиэ айар-тутар абылаҥар ылларан, билигин ыһыахха анаан, саха мааныылаах иһитин чорооннору чочуйан таһаарар.

Дмитрий Айаров, маастар: "Мин бэйэм оҕо дьиэтигэр үлэлиибин. Оҕолорго ыһыаҕы көрөдөрө барыахтаахпыт. Онно кымыс иһэллэригэр анаан оҥоробун. Чорооннорбун арыылыыбын, дьэ оччоҕо аһыахха сөп буолар".

Улуу эпоспыт бырааһынньыга быйыл 16 төгүлүн ыытыллар. "Өймөкөөн ыһыаҕын биир сүрүн уратытынан “палаточный городок” буолуоҕа", - диэн тэрийээччилэр иһитиннэрэллэр. Онон улуус хас биирдии  баһылыктарыгар улахан соруктар - сорудахтар бэриллэн тураллар.

Иван Максимов, "Уус Ньара" МТ баһылыга: "Уус Ньара Өймөкөөн улууһун киинэ. Манна төһө да 90% атын омук олордор бэйэбит улуустпут сайдыытыгар кыттыһыахтаахпыт. Өймөкөөммүт сайдарын туһугар манна олохтоох хас биирдии общиналар Олоҥхо ыһыаҕар кыттыыны ылыахтаахтар".

Билигин тутуу үлэлэрэ, тэрээһиннэргэ дьону бэлэмнээһин үлэлэрэ ыытыллан саҕаланнылар. Суол-иис чааһыгар эмиэ улгум үлэ ыытыллара күүтүллэр.