Дьокуускайга “Үрүҥ таба төннүүтэ” оҕолорго аналлаах туруорууну көрдөрдүлэр

Киин куоракка Ольга Петровна Иванова-Сидоркевич аатынан Амматааҕы айар-сайдар киин "Возвращение белого оленя" диэн оҕолорго аналлаах музыкальнай испиктээкили көрдөрдө. Туруорууга Ольга Иванова-Сидоркевич ырыалара, "Амма чэчирэ" ансаамбыл репертуара барыта аныгылыы тэтиминэн саҥардыллан туруоруллунна.

"Амма чэчирдэрэ" этнографическай-фольклорнай үҥкүү, ырыа-тойук ансаамбыла Ольга Иванова – Сидоркевич икки остуоруйанан туруоруутун холбоон  “Үрүҥ таба төннүүтэ” диэн саҥардан туруорууну киэҥ эйгэҕэ таһаарда.

Айымньы сүрүн санаата - айылҕаны харыстааһын, Кыыс Амманы көмүскээһин. Маҥнайгы туруоруу өссө 1989 сыллаахха Москва куоракка Останкинаҕа анал ыҥырыынан тиийэн көрдөрбүттэрэ. Оччолорго бутун Сойуус киэҥ сэҥээриитин ылбыта. 

Иванна Шестакова, О. П. Иванова-Сидоркевич аатынан Амматааҕы айар-сайдар киин дириэктэрэ: "Москваҕа баран туруораллар. Онно нууччалыы тылбаастаабыттар. Дьиҥэ бастаан сахалыы тылынан турбут эбит. Бу билиҥҥи туруорууга коллектив барыта үлэлээтэ уонна төрөппүттэрбит улахан көмө буоллулар".

Испиктээкилгэ Ольга Петровна ырыалара, «Амма чэчирэ» ансаамбыл бу сылларга илдьэ кэлбит репертуара, барыта аныгылыы тэтиминэн, музыканан саҥардыллан туруоруллунна. Ипсиктээкил нууччалыы барар, ол эрэн ырыата, үҥкүүтэ барыта сахалыы туруоруллубут. 

Евгения Попова, СӨ култууратын туйгуна, испиктээкил режиссёра: "Ольга Петровна "Белый олень"  айымньытын сэргэ "Хорсун кыыс Сардаана" диэн остуоруйатын эмиэ Останкиноҕа устубуттара. Бу икки остуоруйалартан сүрүн өйдөбүлүн ылан, билиҥҥи бириэмэҕэ сөп түбэһэр гына, төрөөбүт дойдуга тапталы иҥэрэр, Ийэ айылҕаны  харыстыырга үөрэтэр саҥардыллыбыт көрүҥүн туруордубут".

Дарина Стручкова Сардаана оруолун оонньуур. Дарина кыра эрдэҕиттэн сценаҕа улааппыт оҕо буолан уопуттаах. Ол эрэн улахан сценаҕа уонна сүрүн оруолга бастакы холонуута. "Онон долгутуулаах уонна эппиэтинэстээх",-  диэн сүрүн оруолу толорооччу Дарина Стручкова этэр.

Испиктээкил ессе биир сүрүн оруолун Кыыс Кыскыйдааны Сайаана Фелегонова оонньуур. Кини "Амма чэчиригэр" кыра эрдэҕиттэн сылдьар. "Бу сыллар устата араас оруолу оонньоон көрдүм, ол эрэн Абааһы кыыһын аан бастакыбын оонньуубун. "Амма чэчиригэр" кыра сааспыттан сылдьабын. Испиктээкилгэ Кыыс Куону уорабын, ону балтыта Хорсун Сарадаана быыһыы кэлэр", -  диэн сүрүн оруолу толорооччу Сайаана Фелегонова этэр.

Ольга Иванова-Сидоркевич сатабыллаах салайааччы, ырыа айааччы, режиссер. Кини талаан арааһын таһымнаан "Амма чэчирдэрин" үлэлэппит, үүннэрбит кэмнэрин бары өйдүү-саныы сылдьаллар. Саалаҕа "Амма чэчирэ" араас сыллардааҕы иитиллээччилэрэ кэлэн ааспыты ахтан-санаан ыллылар.

Марина Корнилова, СӨ үтүөлээх артыыһа: "Бу ансаамбылга сылдьыбыт уонна үөрэммит дьоллоохпун. Туох баар олохпор, билиҥҥи үлэбэр ансаамбылым күүс-көмө буолар".

"Үрүҥ таба төннүүтэ" диэн олоҥхолуу тутулланан 40-чэ сыл буолан баран сценаҕа төннүбүт испиктээкили көрөөччүлэр биир тыынынан көрдүлэр.