Дьахталларга волейбол чемпионата

Дьокуускайга дьахталлар ортолоругар волейболга бүтүн өрөспүүбүлүкэтээҕи чемпионат буолла. Бастакы лига күрэҕэр Саха сириттэн саамай күүстээх хамаандалар күөн көрүстүлэр. Тэрээһин өрөспүүбүлүкэҕэ физкультурнай хамсааһын 100 сылын чэрчитинэн ыытыллар.

"Кыайыы 50 сыла" спорт дыбарыаһыгар чэппиэртэн баскыһыанньаҕа диэри волейбол чемпионата бастыҥтан бастыҥнары түмтэ. Күрэхтэһиигэ уопсайа 8 хамаанда кытынна. 8 хамаандаттан алтата ааспыт сылтан бастакы лигаҕа баар хамаанда.  Чурапчы уонна Өлүөхүмэ улуустарын күүстээх волейболисткалара күрэхтэһэллэр. Тыҥааһыннаах киирсиигэ Чурапчылар хотон иһэллэр. Лилиана Борисова Чурапчы улууһун сүүмэрдэммит хамаандатыгар киирбитэ 3 сыла.

Лилиана Борисова, Чурапчы улууһун сүүмэрдэммит хамаанадатын чилиэнэ: "Бастакы партияны кыадыбыт. Салгыы үгүгэйдик оонньуохпут диэн эрэнэбит".

Ханнык да хамаанда иннин биэриэн баҕарбат. Өлүөхүмэлэр эмиэ тилэх баттаһа иһэллэр.

Чемпионатка хамаандара икки бөлөххө арахсан оонньууллар. Ол курдук бастакыга Дьокуускай, университет, Мэҥэ Хаҥалас, Амма хамаандалара киирэллэр. Онтон иккискэ Уус Алдан, Чурапчы,Нам уонна Өлүөкүмэ. Бэлиэтээн эттэххэ,бу хамаандалар ааспыт сылга Уус Алдаҥҥа Саха сирин норуоттарын спортивнай оонньууларыгар көрсөн тураллар. Онно эрэллээх кыайыыны Уус Алдан сүүмэрдэммит хамаандата ситиспитэ. Онтон бу сырыыга үчүгэй көрдөрүүнү Хотугулуу-Илиҥҥи федеральнай университет уонна Дьокуускай хамаандалара көрдөрөн иһэллэр.

Барыллаан оонньуу түмүгүнэн университет уонна куорат хамаандалара күүстээх саастааптаахтарын бигэргэттилэр. Чурапчы, Өлүөхүмэ кэннэ университет уонна Амма хамаандалара мээчиги хайдах баһылыылларын көрдөрүөхтэрэ. Алгыстаана Алексеева университет сүүмэрдэммит хамаандатыгар киирсэн дьарыктаммыта 5 сыла.  Бастакы күн куораттарга 3-0 ахсааҥҥа хотторбуттар. Ол эрээри кыайыыга эрэллэрэ улахан.  

Алгыстаана Алексеева, ХИФУ волейболга сүүмэрдэммит хамаандатын чилиэнэ: «Кыттыыбыт үчүгэй. Полуфиналга тахсарбыт биллэр. Ааспыт сыл бастаабыппыт, быйыл эмиэ кыайыылаах үрдүк аатын ыларга эрэлбит улахан».

Тэрээһин өрөспүүбүлүкэҕэ физкультурнай хамсааһын 100 сылын чэрчитинэн ыытыллар. Саха сиригэр уруккуттан баччааҥҥа диэри волейболунан үлүһүйүү көрдөрүүтэ аччаабат. Ордук тэрилтэлэринэн, улуустарга, нэһилиэктэргэ бэрт көхтөөхтүк оонньууллар. Онон спорт маассабай көрүҥнэриттэн инники күөҥҥэ сылдьар диэтэхпитинэ алҕаһаабаппыт буолуо.

Константин Гаврильев, күрэхтэһии кылаабынай судьуйата: "Саха сиригэр биир саамай маассабай көрүҥ. Волейболу оҕотуттан кырдьаҕаһыгар диэри оонньууллар. Аҥардас билиҥҥи кэмҥэ өрөбүл аайы, нэһиликэтэринэн, киин куоракка араас хабааннаах турдирдар бара тураллар. Ол да этэр маассабай көрүҥ буоларын. Саха сирин норуоттарын онньууларыгар волейбол баар, онно саамай күүстээхтэртэн күүстээхтэр кэлэн кыттааччылар".

Хамаанадалар бары бэрт бэлэмнээхтэрин, кыайыыга дьаныардаахтарын көрдөрдүлэр. Маннык күрэхтэһиилэр Саха сиригэр волейбол сайдыытыгар олук уураллар.