“Профессионалы” идэ маастарыстыбатын үрдэтиигэ анаммыт чемпионакка бастыҥнары талаллар

Дьокуускайдааҕы медицинэ коллеһыгар "Профессионалы" диэн идэ маастарыстыбатын үрдэтиигэ анаммыт аан бастакы чемпионат эригийиэннээҕи түһүмэҕэ ыытылла турар. Бу үөрэх кыһатын базатыгар сүүмэрдээһини ааспыт устудьуоннар, уопсайа 7 салаанан күрэхтэһэллэр. Бэлиэтээн эттэххэ, бу сылтан дойду үрдүнэн, Вордскиллс оннугар саҥа чемпионат ыытыллар.

Бу күннэргэ Саха сирин үрдүнэн кулун тутар 26 чыыһылатыгар диэри "Профессионалы" идэтийии күрэҕин Бүтүн Россиятааҕы хамсааһынын чэрчитинэн эригийиэннээҕи түһүмэҕэ аан бастакытын ыытыллар. Уопсайа биир тыһыынчаттан тахса күрэхтэһээччи барыта 126 хайысханан күрэхтэһэллэр. Чемпионат былассааккаларынан 27 үөрэх кыһата буолар. Олор истэригэр Дьокуускайдааҕы медицинэ коллеһа баар.

Кирилл Тимофеев, Дьокуускайдааҕы медицинэ коллеһын преподавателэ: «биһиги хайысхабыт “Лабораторно-медицинский анализ” диэн. Устудьуоннар нэдиэлэ устата үс муодулунан сорудах тороллор».

Медицинэ коллеһын базатыгар сүүмэрдээһини ааспыт устудьуоннар уопсайа 7 хайысханан күрэхтэһэллэр. Олор истэригэр лабораторнай диагностика, эмтиир дьыала, тиис бырааһа, фармация, эстетическэй еҥө технологияларын салаалара киирсэллэр. Нуриза Адикеева косметолог идэтин баһылыаҕа, кини билигин бастакы куурус устудьуона. "Эстетическай косметология" салаатыгар кыргыттар бэриллибит бириэмэҕэ кэккэ сорудахтары үрдүк таһымҥа толоруохтаахтар.

Нуриза Айдекеева, Дьокуускайдааҕы медицинэ коллеһын 1 кууруһун устудьуона: "Бастакы сорудахха сылдьабын. Манна костетиканы сирэйтэн  хайдах сөпкө  ыраастааһыны көрдөрөбүт. Салгыы массаас оҥоробут".

Эстетическай өҥө технологияларын салаата 2017 аһыллыбыта. Сыллата бу үөрэх саамай куонкурустааҕынан биллэр. Оттон визаж уонна стилистика компетенциятыгар күрэхтэһээччилэр макияж онорууга бэйэлэрин үөрүйэхтэригэр холоноллор. Стелла Петрова сыбаайба5а анаан кырааскалыыр. Манна сүрүн болҕомто сирэй өҥүн табыыга сытар, өҥ-дьүһүн барыта сырдык, харахха быраҕыллыбат буолуохтаах.  "Аныгы кэмҥэ наадалаах идэҕэ үөрэнэрбиттэн үөрэбин. Бастакы кууруска тыҥырах оҥорорго үөрэтэллэр, онтон иккискэ макияж уонна бүтэһик кууруска массаас", - диэн санаатын Дьокуускайдааҕы медицинэ коллеһын 1 кууруһун устудьуона Стелла Петрова үллэстэр.

Күрэхтэһээччилэр чемпионакка икки ый устата бэлэмнэнэн бэйэлэрин тургуталлар. Билиҥҥи кэмҥэ орто анал идэлээх исписэлиистэргэ наадыйыы улахан. Оттон медицинэ хайысхата оччоттон баччаҕа диэри инники күөҥҥэ сылдьар. Бүгүҥҥү күҥҥэ Дьокуускайдааҕы медицинэ коллеһыгар икки тыһыынчаттан тахса устудьуон үөрэнэр.

Дмитрий Алексеев, Дьокуускайдааҕы медицинэ коллеһын дириэктэрэ: “Биһиги 11 салаалаахпыт. Улуустарга үс араас идэҕэ үөрэтэбит. Ол курдук биэлсэр, лабараан уонна сиэстэрэ идэлэригэр. Онтон Дьокуускайга 8 исписээлинэскэ бэлэмниибит. ”

Маны тэҥэ автодорожнай техникум устудьуоннара "Харыстабыллаах оҥорон таһаарыы" диэн компетенциянан кытта сылдьаллар. Бу хайысха өрөспүүбүлүкэҕэ 3 сыллааҕыта киирбитэ. Манна оҥорон таһаарыыны үрдэтиигэ анаммыт араас ньымалары, харыстабыллаах инструменнары туттуохтаахтар.   

Наталья Тарабукина, "Бережливое производство" компетенция сүрүн эксперэ: “Биһиги техникуммут дойду эригийиэннэриттэн  бастакынан “Эффективный  регион” диэн федеральнай бырайыакка киирбитэ. Бу бырайыак иитинэн номнуо 17 бырайыагы олоххо оҥордубут. Итиэннэ ол чэрчитинэн устудьуоннарбытын “Основы бережливого производства” диэн анал дисциплинаҕа үөрэтэбит”.

"Профессионалы" чемпионакка икки категория үөрэнээччилэр кытталлар. Орто үөрэх устудьуоннара уонна юниордарга 14 саастарын туолбут оскуола үөрэнээччилэрэ. Региональнай түһүмэх кэннэ, аны сайын Бүтүн Россиятааҕы финалга киирсэргэ сүүмэрдээһин ыытыллыаҕа. Онтон финал аны күһүн Санкт-Петербург куоракка тэриллиэҕэ.