"Өбүгэ оонньуулара" бэстибээл үгүс оҕону түмтэ

52

Дьокуускайга 20-с төгүлүн "Өбүгэ оонньуулара" бэстибээл ыытылынна. Үбүлүөйдээх күрэххэ Саха сирин хас да улууһуттан Бүлүүттэн, Уус Алдантан, Сунтаартан, Намтан, Хаҥаластан уонна Мэҥэ Хаҥаластан оскуола оҕолоро кэлэн саха төрүт спорт көрүҥнэригэр бастыыр иһин кииристилэр.

Артем Сивцев кыра эрдэҕиттэн саха төрүт спордун көрүҥнэринэн сөбүлээн дьарыктанар. Хабылыктан саҕалаан хапсаҕайга тиийэ утумнаахтык бэлэмнэнэн бүгүҥҥү күрэххэ улууһун аатын ситиһиилээхтик көмүскүү сылдьар. Төһө да бу күрэххэ бастакытын кыттыбытын иһин, бастакы холонууга көрдөрүүтэ үрдүк.

 Артём Сивцев, күрэх кыттыылааҕа: "Кыра сааспыттан спордунан үлүһүйэн дьарыктанабын. “Хатан” спортивнай кулуупка эрчиллибитим 2 сыл буолла. Онтон бу күрэххэ мас тардыһыытыгар финалга киирдим".

Саха төрүт үгэһин тутуһан, национальнай спорт көрүҥнэригэр бэстибээл ыытыллыбыта быйыл 20-с сыла. Бу күрэххэ улуустартан сүүмэрдэнэн биирдии кыыс уонна уол талыллан кэлэн улуустарын аатын көмүскүүллэр. Кинилэр үс төгүл үс, тутум эргиир, хапсаҕай уонна да атын уопсайа 7 спорт көрүҥүгэр бастыыр иһин киирсэллэр.

Семён Николаев, Баһылай Манчаары аатынан спорт национальнай көрүҥнэрин киинин спортивнай эрэллэри бэлэмниир салаатын салайааччыта: "Бу күрэххэ бэйэлэрин улуустарыгар сүүмэрдиир түһүмэххэ кыайбыт оҕолор кэллилэр. Орто уонна үрдүкү кылаас оҕолоругар анаан ыылыллар бэстибээл".

Бүлүү улууһун Дьөккөн орто оскуолатыттан 1 оҕо кэлэн кытта сылдьар. Кини бастакы күн түмүгүнэн хас да көрүҥҥэ бастыҥын көрдөрбүт. Кинини уопуттаах физкультура учуутала Вячеслав Иванов эрчийэн, бэлэмнээн аҕалбыт. Хаһыс да төгүллэрин бастыыр Бүлүүлэр быйыл да кыайар санаалаахтар.

Вячеслав Иванов, Бүлүү улууһун Дьөккөн орто оскуолатын физкультураҕа учуутала: "6 муҥутуур чемпиону уонна 8 призеру иитэн таһаардым. Саха төрүт көрүҥнэрин сайынарар сыаллаах үлэлии -хамныы сылдьабын. Ыччаттар эт-хаан өттүнэн сайдыылаах буоллаларын баҕарабын. Уолум хабылыкка, хаамыскаҕа бастаата уонна атах оонньуутугар. Бэрэмэдэйдээх сүүрүү, тутум эргиир, хамсаҕай хааллылар".

Саха төрүт оонньуулара киһи күүһүн-уоҕун, сымсатын тургутар. Ким илиитэ-атаҕа күүстээх бастыҥ буолар. Бу күрэхтэһии сүрүн сыала-соруга - эдэр кэнчээри ыччакка спортка тапталы иҥэрии, саха төрүт үгэһин үөрэтии.

Николай Гурьев, "Юные якутяне" өрөспүүбүлүкэтээҕи ресурснай киин спорт салаатын салайааччыта: "Бу күрэҕи үөрэх министиэристибэтин иһинэн “Саха сирин кэчээри ыччата” тирэх киин уонна спорт министиэристибэтэ буолан кыттыһан ыытабыт. Сүүмэрдээһини ааспыт үчүгэй бэлмээх оҕолор кэлэн кытта сылдьаллар, онон көрөргө сүрдээх үчүгэй".

Тэрийээччилэр этэллэринэн хас сылын ахсын күрэхтэһии таһыма, кыттааччыларын бэлэмнэрэ үрдээн иһэр. Спорт национальнай көрүҥүнэн дьарыктаныыга болҕомто күүһүрэр, оҕолор да улахан да дьон бу хайысхаҕа ситиһиилээхтэр. Онон саҥа ааттар өссө да тахса туруохтара.