Намҥа уйулҕа киинэ арылынна

Ил Дархан Айсен Николаев соруйуутунан Саха сиригэр нэһилиэнньэ уйулҕатын бөҕөргөтүүгэ туһуламмыт үлэ барар. Ол чэрчитинэн Нам улууһугар өрөспүүбүлүкэтээҕи уйулҕа киинин филиала "Дьиэ-кэргэн уонна ыччат социальнай-психологическай өйөбүлүн" киинэ бэйэтэ туспа эбийиэктэннэ. Арыллыы үөрүүлээх тэрээһинигэр бырабыыталыстыба, саҥа киин үлэһиттэрэ, улуус бэрэстэбиитэллэрэ кыттыыны ыллыллар.

Өбүгэ үгэһинэн  арыллыы сиэрэ-туома уот, алаһа дьиэ иччилэригэр сүгүрүйүүттэн саҕаланар. Нам улууһун киинигэр Намҥа бэлиэ күн тосхойдо. Өрөспүбүлүкэтээҕи уйулҕа киинин Намнааҕы филиала  бэйэтэ туспа уораҕайданна. Бу иннинэ атын тэрилтэлэргэ кыбыллан олорбут буоллахтарына, билигин 100-кэ кыбадыраатынай миэтирэ иэннээх дьиэлэннилэр. Оттон бу барыта "Муниципальный психолог" бырагыраамма чэрчитинэн олоххо киирдэ. Нам улууһа бу бырайыакка өрөспүүбүлүкэ бары улуустарыттан бастакынан кыттыста.

Юрий Слепцов, "Нам улууһа" МТ баһылыга: "Үөрүүлээх, ол эрэн олус эппиэтинэстээх түгэн. Улуус олохтоохторун олоҕо тупсуутугар ыытыллар үлэ биир хайысхата буолар. “Муниципальнай психолог” диэн бырайыак Нам улууһугар үтүө көрдөрүүлээхтик үлэлиэ диэн эрэнэбин".

Санатар эбит буоллахха, ааспыт сыл бүтэһик күннэригэр өрөспүүбүлүкэтээҕи уйулҕа киинэ уонна Нам улууһа "Кылаабынай муниципальнай психолог" диэн  бырайыагынан сөбүлэҥ түһэрсибиттэрэ. Бу тустаах барыл Ил Дархан Айсен Николаев соруйуутунан бигэргэтиллэн үлэлиир.

Владимир Скрябин, өрөспүүбүлүкэтээҕи уйулҕа киинин салайааччыта: “Нам улууһугар бу бастакы бырайыакпыт буолар. Улуус өйөөн киин үлэҕэ киирбититтэн олус диэн үөрэбин уонна махатанабын. Ил Дархан Айсен Николаев дьаһалынан нэһилиэнньэ уйулҕатын бөҕөргөтүүгэ туһуланар бырагыраамманан үлэлии сылдьабыт. Хайа баҕар эйгэ психологтара бары бииргэ түмсэн үлэлиэхтээхпит”.

Онон бу саҥа арыллыбыт киин "Кылаабынай муниципальнай психолог" олоххо киириитигэр үлэлэһиэҕэ. Ол эбэтэр улуус психологтарын барытын түмэн, биир ылыллыбыт бырагыраамманан үлэ барыаҕа.

Анна Васильева, "Дьиэ-кэргэн уонна ыччат социальнай-психологическай өйөбүлүн" Намнааҕы  киинин сүрүн психолог — педагога: «Бырайыакпыт билигин олоххо киирбитэ тоҕоостоох,  уйулҕа үлэһиттэрин көмөбүтүгэр наадыйааччы элбээбит кэмигэр. Кииҥҥэ биирдиилээн кэпсэтиилэри, бөлөҕүнэн дьарыктары ыытыахпыт. Араас хабааннаах семинардары ыытабыт. Маны сэргэ үөрэҕирии эйгэтин психологтарын кытта ыкса үлэлэһэбит».  

Бу дьоро күҥҥэ Нам улууһугар суобастаахтык үлэлии сылдьар психолог идэлээх исписэлиистэр наҕараадаланнылар. Ыччат министиэристибэтэ, өрөспүүбүлүкэтээҕи уйулҕа киинэ, улуус нэһилиэктэрин баһылыктара малааһын дьоро күнүнэн бэлэхтэри туттардылар, салгыы үлэлэһэргэ кэпсэтистилэр. Манна даҕатан эттэххэ, билигиҥҥи ыгым кэмҥэ, дойдуга уларыйыы-тэлирийии барар турар бириэмэтигэр, психологтар үлэлэрэ күүһүрэрэ саарбаҕа суох. Онон бу Нам улууһун холобурунан атын улуустар эмиэ арынар кэмнэрэ үүннэ.