Учуутал күрэҕэ

Саха тылын, литературатын уонна култууратын учууталларын күрэҕэ быйыл иккис төгүлүн ыытыллар. Былырыын биэс эрэ кыттааччы баар буоллаҕына, быйыл кыттааччы ахсаана үс төгүл элбээбит. Барыта 15 учуутал улуустартан анаан-минээн кэллилэр. Күрэх сүрүн сыала-соруга - төрөөбүт тыл уонна литература учууталларын уопуттарын тарҕатыы, үөрэтии саҥа ньымаларын киллэрии, төрөөбүт тылга үөрэтиигэ-иитиигэ болҕомто ууруу. 

Февронья Ядрихинская, С.Н. Донской - II аатынан үөрэҕи сайыннарар уонна идэ таһымын үрдэтэр институт филология кафедратын үрдүкү преподавателэ "Маннык күрэхтэргэ хас биирдии учуутал бэйэтин биир идэлээхтэриттэн саҥаҕа үөрэнэр. Уонна ону үөрэтэр, иитэр үлэтигэр туһанар. Онон бу күрэх олус баай ис хоһоонноох".

Быйыл күрэх түөрт түһүмэҕинэн ыытыллар. Ол курдук учууталлар аһаҕас уруоктары, маастар-кылаастары ыытыахтара. Аан бастаан күрэх кыттыылаахтара бэйэлэрин уруоктарыгар, үөрэтиигэ ханнык-туох сонун ньыыманы туһаналларын экспертэр иннилэригэр көрдөрөллөр. 

Ньурба улууһун Антоновка орто оскуолатын саха тылын уонна литературатын учуутала Светлана Семенова бэйэтин улууһугар ыытыллыбыт "Сыл бастыҥ учуутала" күрэххэ кыайан өрөспүүбүлүкэ таһымыгар кыттар чиэскэ тиксибит. Светлана Семенова учууталлаабыта иккис сылыгар барда.  "Маннык таһымнаах күрэххэ аан бастакыбын кыттар буолан долгутулаах уонна эппиэтинэстээх. Уруогум этэҥҥэ ааста. Саха гимназиятын 5 кылааһын оҕолоругар “Тураахтаах күүдээх” үгэни билиһиннэрдим. Оҕолор олус диэн сэҥээрдилэр", -  диэн эдэр Светлана Семёнова учуутал санаатын үллэстэрэтэр.  

Саха гимназиятын 5 кылааһын үөрэнээччилэрэ аһаҕас уруогу олус интэриэһиргээтилэр уонна сэргээтилэр. "Үгүс саҥаны биллибит", - диэн

Тапталина Иванова, Саха гимназиятын 5-с кылааһын үөрэнээччитэ: "Олус үчүгэй уруок буолла. Үгэттэн бастыҥ доҕор хайдах буолуохтааҕын биллим".

Раиса Уйгурова Өлүөхүмэ улууһуттан кэлэ сылдьар. Кини үөрэх эйгэтигэр үлэлээбитэ 30 тахса сыл буолла. "Оҕону үөрэтиигэ, кини интэриэһин, болҕомтотун тардыы учуутал сүрүн соруга буолар. Уруок бөҕөнү ыытан кэлбит киһи буоллаҕым. Ол эрэн хас биирдии уруок уратылаах, олох атын буолар. Төһө да уопуттаах учуутал буолларгын уруок иннинэ син биир долгуйаҕын.Оҕолору кытта астына-дуоһуйа үлэлээтим",  диэн Өлүөхүмэ улууһун Абаҕа орто оскуолатын саха тылын уонна литературатын учуутала Раиса Уйгурова санаатын үллэстэр.

Кулун тутар 16 күнүгэр саха тылын уонна литературатын бастыҥ учуутала ким буолбута биллиэҕэ. Куонкуруска кыайыы, биллэн турар, чиэс-бочуот. Онтон саамай кылаабынайа, учуутал үрдүкү таһымнаах, идэтигэр бэриниилээх итиэннэ бэйэтин билиитин-көрүүтүн үөрэнээччилэригэр сатаан тиэрдэр кыахтаах буолуохтаах.  Кыайыылаах өрөспүүбүлүкэ чиэһин дойду таһымыгар баран көмүскүөҕэ. Ирина