Түөкүннээһин элбиир

29

Саха сиригэр түөкүннээһин салҕанар. Кэлиҥҥи кэмҥэ интернет, сибээс нөҥүө олохтоох нэһилиэнньэни албыннаан, уоран-халаан барыһырыы  аччаабат. Ис дьыала министиэристибэтин үлэһиттэрэ этэллэринэн күннэтэ харчыларын уордарбыт дьонтон сайабылыанньа киирэ турар. Төһө да өйдөтүү-сэрэтии үлэтэ барбытын үрдүнэн ордук аҕам саастаах дьон угаайыга киирэн биэриилэрэ үгүс.

Клавдия Гаврильева, СӨ ИДьМ ураты суолталаах дьыалалары силиэстийэлиир салаа үлэһитэ, юстиция хапытаана: "Билигин дойду үрдүнэн төлөппүөнүнэн түөкүннээһин олус элбэх".

Төлөппүөн нөҥүө нэһилиэнньэни албынныыр дьону булар ыарахаттардаах. Бу соторутааҕыта Клавдия Гаврильева биир улахан холуобунай дьыаланы бүтэрбит. Ол курдук төһө да  буруйу оҥоруу иһин   хаалла сыппытын үрдүнэн,  дьону 900-тан тахса тыһыынчаҕа албыннаабытын, күүстээх силиэстийэ түмүгүнэн булбуттар.

"Соторутааҕыта улахан холуобунай дьыаланы түмүктээтим. 54 сайабылыанньа киирбит дьыалатын. Түөкүн хаайыыга олорон эрэн Дьокуускайга дьиэ куортамныыбын диэн албыннаабыт", - диэн Клавдия Гаврильева холобурдуур. 

Уопсайынан бүтэһик үс сыллаах статистиканы көрдөххө, түөкүттэр аҕыйаабаттар. Саамай элбэх  түбэлтэ 2021 сыллаахха тахсыбыт. Манна 2876 түөкүннэһин  бэлиэтэммит, онно 292 мөлүйүөнү олохтоохтортон уорбуттар, онтон ааспыт сылга 256 мөлүйүөн ороскуот дьону албыннааһынтан  тахсыбыт.

Валентин Удинов, СӨ ИДьМ пресс-сулууспатын референэ: “Өрөспүүбүлүкэҕэ бу сыл икки ыйыгар 371 түөкүннээһин уонна баан картатыттан уоруу таҕыста.Уопсай хоромньу 46 мөлүйүөнтэн тасха буолла. ”

Билигин буола турар быһыыны-майгыны хара санаалаах дьон эмиэ туһанар буолбуттар. Маны тэҥэ күн түүн  интернет, төлөппүөн нөҥүө дьону албыннааһын саҥа ньымалара киирэ тураллар. 

Түөкүттэр аны саха тыллаахтары итэҕэтэр туһуттан сахалыы суруйан албынныыллар. Олохтоох дьону түргэнник араас ньыманан харчыны үлүннэриини кэпсээн итэҕэтэллэр.

Дьон быстах санааҕа киирэн, оруна суохха итэҕэйэн  үйэлэрин тухары муспут үптэриттэн ытыс соттон хаалаллар.  Эбиитин кредиткэ киирэн судаарыстыбаҕа иэстээх буолаллар.  Онон түөкүттэр угаайыларыгар киирбэт туһуттан  болҕомтолоох уонна мээнэ дьоҥҥо итэҕэйбэт буолуҥ диэн тустаах үлэһиттэр сэрэтэллэр.