Өймөкөөн улууһугар буруйу оҥоруу ахсаана аччыыр.

33

Салгыы бу курдук сылдьан полиция үлэһиттэрэ үгүс аадырыстары кэрийдилэр. Манна даҕатан эттэххэ, тустаах оройуоҥҥа уопсайа 125 киһи учуокка турар. Онон бу оперативнай тэрээһин чэрчитинэн элбэх ыал бэрэбиэркэлэннэ.

Анжелика Ксенофонтова, Өймөкөөннөөҕү полиция салалтатын участковай боломуочунайа, полиция капитана: «Мин учаастагым Октябрьская уулусса. Бу дьиэлэр хаарбах дьиэлэр оннуларыгар тутуллбуттара. Онон учуокка турар дьон элбэх. Сэрэтии үлэтин тиһигин быспакка ыытабыт».

10-ус сылын Уус Ньараҕа участковайынан үлэлии сылдьар Анжелика Ксенофонтова, төһө да ыарахан үлэлээх буоллар, сулууспатын суобастаахтык толорон, күн бүгүн кини учаастагар буруйу көрдөрүү ахсаана аччаабыт. Маны таһынан тустаах тэрээһини кытары бу күн "Түөкүннээһин" аахсыйата эмиэ ыытыллынна.

Василий Готовцев, Өймөкөөннөөҕү полиция салалтатын участковайдарын уонна сокуоннай саастарын ситэ илик оҕолор салааларын  салайааччыта, полиция майора: «Аадырыстарынан сылдьан түөкүннэһитэн сэрэтэр иһитиннэриини түҥэтэбит. Хайдах, хантан эрийэн албынныахтарын сөбүн сэрэтэбит».

Өймөкөөн улууһа былыр былыргыттан ис дьыала уорганнарын үлэһиттэрин болҕомтотугар икки бүк турар. Көмүсчүттэр, артыал үлэһиттэрэ, Магадаан диэки барааччыллар аартыктарыгар, бырамыысаланнас үлэһиттэрэ тоҕуоруһар сирдэригэр сокуон үлэһиттэригэр үлэлэлэрэ баһаам.

Николай Илларионов, Өймөкөөннөөҕү полиция салалтатын салайааччытын быстах кэмҥэ солбуйааччы: «2022 сылга буруйу оҥоруу 12 % түһэн турар. 2021 сыллаахха 139 буруйу оҥоруу бэлиэтэммит буоллаҕына, ааспыт сылга 123 буруйу оҥоруу таҕыста. Ити барыта салаабыт үлэһиттэрин тэрээһиннээх үлэлэрин түмүгэ».

Өймөкөөн улууһун ис дьыала уорганнарын үлэһиттэрин көдьүүстээх, оперативнай үлэлэрин түмүгүнэн ааспыт сылга судаарыстыба хааһынатыгар 14 мөлүйүөн солкуобай үп төннүрүллүбүт. Оттон бу үлэ хас биирдии үлэһиттэн тутулуктаах, онно төһүү - миэстэтигэр үлэ.