Вести – саха информационнай биэрии эпииргэ тахсыбыта 18 сыла

Еймекеен -50 кыраадыһын ахсарбакка үлэ күөстүү оргуйар. Омос көрдөххө, сылаас курдук эрээри экран нөҥүө үлэһиттэргэ олус тымныы. Тымныы буолуохтааҕар  устуу  кэмигэр араас буолуон сөп. Хас биирдии каадыр күндү.

Каадыртан биир кыра халбарыйыы, үлэ барыта саҥаттан барар. Онон телевидение үлэһитэ өлбөөдүйбэт, кытаанах санаалаах, тулуйумтуо буолуохтаах. Биһиги ГТРК «Саха» хампаанньа корреспонденнара өрөспүүбүлүкэ араас муннуктарыгар тиийэн үлэлиибит. Бүтэһик улахан командировка Өймөкөөн улууһун киинигэр Уус Ньараҕа ааста. Миэстэтигэр тиийэн, дьон олоҕун көрөн устан кэллибит.

Иван Максимов, "Уус Ньара" МТ баһылыга: «ГТРК “Саха” биһиэхэ кэлэн дьону сэргэхситтигит. Уус Ньара олоҕун киэҥ эйгэҕэ сырдатаргытыттан олус диэн махтанабын. Өссө да кэлэ утар буолаарыҥ, биһиги мэлдьи аһаҕаспыт».

Оруобуна 18 сыл анараа өттүгэр кулун тутар 14 күнүгэр ГТРК «Саха» хампаанньа бастакытын быһа эпииргэ тахсар. "Вести-Саха" информационнай биэрии тутатына дьон болҕомтотун тардар.

Күннээҕи сонуннары сытыытык, дьэҥкэтик көрдөрөр биэрии билигин даҕаны ол саҕанааҕы тиэмпэтин ыһыктыбакка үлэлиир. Күн аайы сахалыы сонуннар Россия-1 ханаалга сарсыарда 9 чааска, онтон нууччалыы биэриилэр сарсыардаттан саҕалаан киэһээҥҥи диэри тахсаллар. Маныаха Россия-24 ханаалга эмиэ "Вести-Саха" сонуннара тахса тураллар.

3 сыллааҕыта сана саҕахтары саҕан "Сахам сирин сарсыардата" биэрии күөх экраҥҥа тахсыбыта. Чаас аҥардаах быһа эпиир биэриитигэр үгүс ыалдьыттар кэлэннэр, күннээҕи буола турар быһыы-майгы, кыһалҕа, ситиһии, кыайыы тула кэпсэтэллэр. Билигин биэриини 4 ыытааччы, режиссер уонна 2 шеф-редактордар таһаараллар. Маныаха олоҕу кытары тэҥҥэ хаамсан ГТРК «Саха» хампаанньа саҥа саайтын үлэлэтэр.

Нюргуяна Феоктистова, ГТРК «Саха» хампаанньа шеф-редактора, ыытааччы: «Кэм – кэрдии уларыйан истэҕин аайы информация саайт нөҥүө элбэхтэ бэриллэр буолла. Биһиги хампаанньа буруолуу сылдьар саайтанныбыт. Онно биэриилэр, сонуннар тута киирэллэр. Корреспонденнарбыт матырыйааллара быһаччы онно тахса турар. »

Россия ханаала Смотрим.ру платформаҕа дойду регионнарын бииргэ түмэн араас марафоннары ыытар. Кыайыы күнүгэр, дойдуга тапталга, оҕолорго аналлаах бырайыактар олоххо киирэллэр. Россия күнүгэр  ыытыллыбыт "Ийэ дойду туохтан саҕаланар" 12 чаастаах марафоҥҥа биһиги хампаанньабыт тэрийиитинэн  Саха сирин бастыҥ ырыаһыттара кыттыбыттара. Биһиги өрөспүүбүлүкэбититтэн талыллыбыт 3 ырыа Россия регионнарын, араас норуоттарын ортолоругар дойду үрдүнэн дуорайбыта.

Нюргуяна Феоктистова, ГТРК «Саха» хампаанньа шеф-редактора, ыытааччы: «Ол бырайыакпыт төрөөбүт дойдуга туһунан ырыаларга аналлаах этэ. Итиннэ биһиги Сахабыт сирин олус күүскэ сырдаппыппыт. Ити курдук Смотрим.ру платформаҕа биһиги өрөспүүбүлүкэбит дойду атын регионнарын кытта тэҥҥэ хардыылыыр».

Атын регионнар филиалларын кытары 18 сыл устата тэҥҥэ үлэлии олорор ГТРК «Саха» сайдар, үүнэр. Билигин биһиги бэриилэрбитин телевизорга эрэ буолбакка, ГТРКСАХА.ру саайтка уонна СМОРТИМ.Ру сыһыарыыга көрүөххүтүн сөп.