Тоҥ атыытыгар кыралаан да буоллар сыана түһэр

Күн биллэ уһаан, халлаан сылыйан саас тыына номнуо биллэр. Ону кытта Дьокуускайга тоҥ эт-балык атыыта күннэтэ уустугурар. Ол эрээри олохтоох аһынан эргинэр сүрүн ырыынакка атыыһыттар сыананы түһэрэргэ тиэтэйбэттэр.

"Бааһынай ырыынагар дьон сылдьыыта биллэ аҕыйаата",- диэн атыыһыттар кэпсииллэр.

Өрөбүл да күннэргэ кэлии-барыы көҕө суох. Оттон ырыынакка киирдэххэ ас-үөл дэлэй, долбуурдар хотойорунан эгэлгэ балыгынан кыстанан тураллар. Холобура, собону улаханыттан көрөн киилэтин 250-300 солкуобайтан саҕалаан быспыттар. Күндүөбэйи эмиэ итиччэ сыанаҕа атыылаһыахха сөп. Быраҥаатта киилэтэ 500 солкуобай. Чыыр балык олох кырата 850 саҕалаан сыанаҕа  турар. 81 саастаах Алдан улууһуттан төрүттээх Артамон Григорьев Дьокуускайга олорор. "Дөрүн буола-буола ырыынактан кэлэн ботуччу соҕустук балык атыылаһан барабын",-  диэн кэпсиир.

Дьэ кырдьык, Саха сирин күөллэригэр, өрүстэригэр үөскүүр балыгы амсайыан баҕалаах талбытын ылар кыахтаах. Харчы эрэ баар буоллар. Халлаан сылыйбытынан даҕаны сыана түспүтэ көстүбэт. Мария Левина ырыынакка 95 сыллаахтан үлэлиир.

"Ааспыт сылтан бэттэх атыы мөлтөх, дьон чэпчэки сыаналааҕы көрдүүр",-  диэн санаатын үллэстэр.

Таһырдьа тоҥ эт, балык ас түргэнник салгылыырынан сорох атыыһыттар сыананы кыралаан да буоллар түһэрэллэр эбит. Холобура, кыһыҥҥыны кытта тэҥнээтэххэ, убаһа этэ киилэтэ 600 солкуобайга турар, кыһынын 800 солкуобай этэ. Ынах этэ киилэтэ 600 солкуобайтан саҕаланар, мииҥҥэ аналлаах уҥуохтаах эт 350, эриллибит эт 800 гыраама - 500. Маны тэҥэ сибиинньэ, таба этэ, ынах иһэ, хаан, харта, быар эмиэ аҕыйаҕа суох. Амма улууһуттан кэлэ сылдьар Михаил Старостин эмиэ балык амсайаары уонна таба этин ылаары ырыынакка кэлбит.

"Сыана билиҥҥи бириэмэҕэ орто. Онтон чыыры көрө да барбаппын. Эти атын сиртэн ылабын", - диэн Михаил Старостин балык таларын быыһыгар сыана туһунан санаатын үллэстэр.

Сааскы киһи салбаммытынан. Сотору өссө сылыйан ууллардаҕына, таһырдьа тоҥ ас атыыта тохтуура күүтүллэр