Кыһыҥҥы суолу баттаһа таһаҕы тиэйии үгэнэ

Арктика уонна хоту улуустарын тыын суолталаах аһынан үөлүнэн хааччыйыы ситимнэхтик барыытыгар эргиэн-логистика кииннэрин үлэҕэ  киллэрэллэр. Бүгүҥҥү күҥҥэ дойду 25 региона бу салааны бэйэлэрэ быһааран олороллор. Онтон билигин хотугу тиэйии туһунан тустаах сокуону ылыныы тула үлэ барар.

Кыһыҥҥы суол сабыллыар диэри балтараа ый кэриҥэ баар. Билигин бары муус суолларыгар муҥутуур уйук көҥүллэнэн турар. Онон хаалбыт кэми баттаһа тиэйии-таһыы күүскэ барар. Орто Халыма улууһугар хочуолунайдарга уонна уот станцияларыгар уматыгы тириэрдии былдьаһыктаах күннэрэ. Манна аҥардас нэһилиэктэргэ таас чох 20 тыһыынчаттан тахса туонна тириэрдиллиэхтээх. 

Петр Антипин, Орто Халыма улууһун баһылыгын бастакы солбуйааччы: "Таас чоҕу тиэйии бытаарда. Күн бүгүн көрдөрүү 40% тэҥтэһэр, онтон ааспыт сыл баччатыгар 70% тиэллибитэ. Маны сэргэ уот станцияларыгар уматыгы тиэйии былааннаахтык баран иһэр".

Уматыгы сэргэ  аһы-үөлү тириэрдии - тыын суолталаах сорук.  Арктика уонна хотугу улуустарга тыын суолталаах бородуукта уопсайа быйыл 11800 туонна тириэрдиллиэхтээх. Онтон 7200 кыһыҥҥы суолунан. Инники сыллары кытары тэҥнээтэххэ, бу сылга былаан улааппыт. Маныаха атыы-эргиэн логистика кииннэрин олоххо киллэрии саппааһы улаатыннарыыга түрүөт буолар. Быйыл 5 логистика киинэ үлэҕэ киириэҕэ. Бу Арктика министиэристибэтэ иһитиннэрэринэн олохтоохторго икки төгүл көдьүүстээх буолуохтаах. 

Сергей Неустроев, СӨ Арктика сайдыытын уонна Хотугу норуоттар дьыалаларыгар миниистирин бастакы солбуйааччы: "Логистика кииннэригэр олохтоохтортон сир аһа, былык тутан, манна төптөрү аҕалан батарыыны олоххо киллэриини былаанныыбыт. Оччоҕо олохтоохторго эбии үлэ миэстэтин оҥоруо этибит".

Онтон 2025 сылга диэри 13 улууска бырытыгар эргиэн-логистика киинэ  тутуллан олоххо киириэҕэ.  Ааспыт сылга үлэлээн саҕалаабыт 2 киин тиһигин быспакка, олус көдьүүстээхтик үлэлии тураллар. Холобура, Уус Куйгаттан Дьааҥы уонна Эбээн Бытантай ыраах сытар нэһилиэктэригэр аһы-үөлү таһаллар. Онтон Белай Гораттан Аллайыаха уонна Муома улуустарыгар. Бу уустук дьыаланы дойду таһымнаах сокуонунан сүрүннээһин үлэтэ барар.  Хотугу таһаҕаһы тиэйии сокуонун барыла ылыллан олоххо киирдэҕинэ, үбүлээһин улаатыахтаах итиэннэ логистика сааһылыаныахтаах.

Иннокентий Андросов, СӨ нэһилиэнньэҕэ куттал суох буолуутун хааччыйар  судаарыстыбаннай кэмитиэт бэрэссэдээтэлин солбуйааччы: "Бу кэмнэргэ диэри хотугу тиэйиинэн бэйэбит эрэ дьарыктанан кэллибит. Дойду таһымнаах хотугу тиэйии сокуона олоххо киирдэҕинэ үбүлээһин уонна ситимнээһин сааһылыаныа диэн эрэрнэбит".  

Хотугу таһаҕаһы тиэйии сокуона олоххо киириитин күн бүгүн  дойду 25 региона кэтэһэр. Онтон сокуону судаарыстыбаннай дума  ылыннаҕына эһиилгэттэн күүһүгэр киириэ.