Таһырдьа тахсыах иннинэ тиэхиниэкни чочуйуу

48

Хаалыктаах хаамыы- чэгиэн турук төрдө. Киһи этин-сиинин чэбдигирдэр биир бастыҥ спорт көрүҥэ буолар. Үлүһүйээччилэр сылы эргиччи биир күнү көтүппэккэ дьарыктаналлар. Онтон билигин халлаан сылыйан таһырдьа маассабай дьарыкка тахсыах иннинээҕи тиэхиникэни чочуйаллар.

Омос көрдөххө көннөрү хаамыы. Ол эрэн манна туһааннаах тиэхиникэни тутуһан хамсаннахха киһи 95% былчыҥа үлэлиир. Бу көрүҥ туһата оннооҕор сүүрүүтээҕэр ордук диэн исписэлиистэр бэлиэтииллэр.  "Стимул" хаалыктаах хамыы күнүскү дьарыга. Манна үксүн доруобуйаларын көннөрөөччүлэр түмсүбүттэр. Ким эпэрээссийэ кэннэ, ким уҥуох-сүһүөх дьарҕаатын ама гынаары. Варвара Мекюсярова сааһыгар сөбө суох чэпчэкитик хамсанан 3,5 килэмиэтири холкутук хаамар. Кини манна дьарыктанарын таһынан өссө үҥкүүлүүр. Тренерын Владимир Ивановы кытта араа - бараа бу көрүҥүнэн дьарыктанан саҕалаабыттар. 

Варвара Мекюсярова, "Стимул" хаалыктаах хаамыы кулуубун кыттыылааҕа: "Хаамыыга сылдьыбытым 9 сыл буолла. Владимир Ильич тренер быһыытынан олус кыахтаах. Ол иһин куруук кинини батыһа сылдьабын. Хаамтым да этим-сииним уһукта түһэр. Мин сааһым 78".

Бу "Стимул" диэн кулууп кыттыылаахтарын сорҕото. Дьокуускай үрдүнэн тыһыынча киһи бу түмсүүгэ киирэн дьарыктанар. Кулууп филиаллара улуустарынан эмиэ бааллар, онно уон тыһыынча киһи хаалыктаах хаамыыны баһылыыр.  Владимир Иванов кулууп хара тэриллиэҕиттэн баҕалаахтары дьарыктыыр. Кини өрөспүүбүлүкэҕэ биир бастакынан сертификаттаах инструктор.  Владимир Ильич үгүс сыллар тухары мунньуммут билиитин күннэтэ нэһилиэнньэ туругун чэбдигирдиигэ аныыр.

Владимир Иванов, "Стимул" хаалыктаах хаамыы кулуубун тренерэ: "Хаамыы туһата диэн элбэх. Элбэх улахан кыһалҕалаах дьон кэлэллэр. Ким ходрозтаах, ким артрозтаах, ким артриттаах. Кинилэр бары хаамыы көмөтүнэн туруктарын тупсараллар. Тиэхиникэни тутуһан хаамыы киһи доруобуйатыгар туһалаах. Көннөрү хаамыахха сөп,ол эрэн онно былчыҥ 46% эрэ үлэлиир".

Онон уопуттаах тренер этэринэн, бу хаамыы кистэлэҥэ техниканы сатааһыҥҥа сытар. Ол иһин халлаан сылыйыан иннинэ, таһырдьа тахсыахтарын иннинэ хайаан да сатабылы чочуйуу барар. Оччоҕо эрэ скандинавскай хаамыы туһата тахсар. Дьарык буор босхо барар. Кулууп нэһилиэнньэ чөл туруктаах буолуутугар сыалланан үлэлиир, онон баҕалаахтары барыларын хабарга кыһаллар. Светлана Алексеева бочуоттаах сынньалаҥҥа барыаҕыттан бу көрүҥүнэн дьарыктанар. Инники спортка улахан сыһыана суох киһи дойду таһымнаах күрэхтэһиигэ иккитэ кыайан турар.

Светлана Алексеева, «Стимул» хаалыктаах хаамыы кулуубун кыттыылааҕа: "Москва куорат аһаҕас турнирыгар 2 миэстэни ылбытым, 65 саастарыттан үөһэлэргэ. Дьиэҕэ дьарыгырарбыт биһиэхэ хаамыы тиэкиникэтин тутуһарбытыгар уонна сэрээккэлээн эппит-сииммит тупсарыгар олус туһалаах. Бука бары хаамыҥ, үйэҕитин уһатыҥ".

Хаамыы техникатын чочуйуу кэннэ, халлаан сылыйдаҕына, бу ый бүтэһигиттэн хаалыыктаах хаамааччылар пааркаҕа тахсыахтара.  Мантан саас хаамыан баҕалаах өссө элбиэ турдаҕа.