Мария Кузьмина: "Бииртэн биир хатыламмат оруолларбын олус таптыыбын"

Опера уонна балет тыйаатыра олохтоохтору кэрэ эйгэҕэ угуйбута 50-тан тахса сыл буолла. Наталья, Аксинья Посельскайалартан саҕалаан биһиги өрөспүүбүлүкэбитигэр дьон балет искусствота диэн тугун билбитэ. Күн бүгүн Саха сирин балетын труппата 60-тан тахса киһилээх. Мария Кузьмина олортон биирдэстэрэ, кини биир бастыҥ эдэр кэскиллээх балет артыыһа буолар.

Балет  бэйэтэ туспа иэйиилээх, туспа дьоҕурдаах, суоллаах-иистээх, искусство буолар. Мария Кузьмина бу искусство кэрэ эйгэтигэр умсубута номнуо 20 сыл буолла. Кини 7 сааһыгар  Наталья, Аксинья Посельскаялар ааттарынан балетнай оскуолаҕа киирэн, аан бастакы хардыылары оҥорбута.

Мария Кузьмина, Опера уонна балет тыйаатырын артыыһа, СӨ култууратын туйгуна: "2004 сыллаахха үөрэнэ киирбитим. 7 сааспыттан уопсайга олорбутум. Колледжы 2015 сыллаахха түмүктээбитим. Учууталым Попова Зинаида Николаевна, кини кылааһын бүтэрбитим. Онтон ыла тыйаатырга үлэлиибин".

Онтон бу кэмтэн ыла Мария балет артыыһын быһыытынан үлэтэ саҕаламмыта. Араас оруоллары ылсан, кини салгыы сольнай партиялары толорорго тиийэ үүммүтэ. Биллэн турар бу барыта сыралаах үлэттэн тахсар. Манна даҕатан эттэххэ, балет артыыстара күннэтэ тэҥинэн хас да испиктээкилгэ бэлэмнэнэллэр.

"Ортотунан биир туруорууга 1 ый барар", - диэн Мария этэр.

"Күҥҥэ хас да балет туруоруутугар бэлэмнэнэбит. Онон күн иһигэр хаста да уобараскын уларытаҕын. Холобура, сарсыарда Хара куба, иккис репетицияҕа Золушка эдьийэ, онтон киэһэ чыычаах буолаҕын. Үлэбит онтунан олус интэриэһинэй", - диэн Мария астына кэпсиир.

Мария бэйэтэ Чурапчы улууһуттан төрүттээх. Бииргэ төрөөбүт аҕыстар. Кини сэттис оҕонон күн сирин көрбүт. Билигин бэйэтэ эдэр ийэ. Үлэтэ элбэх бириэмэни эрэйэр буолан, иллэҥ кэмин бүтүннүү оҕотугар аныыр. Эдэр балерина оҕо көрөр уоппускаттан үлэтигэр эрдэ тахсыбыт буолан, билигин ийэтэ күүс-көмө буолар. 

"Биһиги идэбит олус кылгас. Онон бу эйгэҕэ ситиһиилээх буолуоххун баҕарар буоллаххына тохтообот ордук дии саныыбын. Эрдэ үлэлии тахсыбыппыттан олох кэмсиммэппин. Ийэм көмөлөһөр, ол иһин холкутук үлэбэр кэлэбин. Киниэхэ оҕобун толору эрэнэбин", - диэн эдэр балерина санаатын үллэстэр.

Кырдьык да, балет артыыһын идэтэ сүрдээх чаҕылхай ол эрэн кылгас. Онон артыыстар бу кэрчик кэм иһигэр туох баар талааннарын, дьоҕурдарын, кыахтарын арыйан үлэлииллэр. Итиэннэ кэрэ эйгэтин дьоно буолан куруук бэйэлэрин көрүнэ сылдьаллар. Манна даҕатан эттэххэ, оҕону балетка ыларга балетмейстердар кыра сааһыттан этин-сиинин көрөн талаллар.

"Биһини талалларыгар төрөппүттэрбитин көрбүттэрэ. Кинилэр быһыыларынан-таһааларынан биһигини сыаналаабыттара. Ол иһин эттээх дьон оҕотун ыла сатаабаттар. Илиилэрэ, атахтара уһун синньигэс оҕолору ордук талаллар", - диэн кытаанах сүүмэрдээһин сүрүн ирдэбиллэрин үллэстэр.

Онон балет артыыһа буоларга талааны, дьоҕуру, дьаныардаах үлэни таһынан тас көрүҥ эмиэ улахан оруолу ылар. Киһи эрэ барыта бу идэҕэ ылсан үлэлээбэт. Оттон бу искусство көрүҥэр олохторун улахан аҥаарын анаабыт дьон бэйэлэрин дьоллооҕунан ааҕыныахтарын сөп.